(ສພຊ) – ກອງປະຊຸມສຳມະນາແລກປ່ຽນຄຳຄິດເຫັນ, ບົດຮຽນທີ່ດີກ່ຽວກັບການຮ່າງມະຕິ, ບົດສະເໜີຂອບເນື້ອໃນ ແລະ ເນື້ອໃນອື່ນໆ ໃຫ້ແກ່ການກະກຽມເປັນເຈົ້າພາບຈັດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ໄດ້ຈັດຂຶ້ນໃນວັນທີ 11 ກໍລະກົດຜ່ານມາ ທີ່ສະພາແຫ່ງຊາດ(ສພຊ) ໂດຍການເປັນປະທານຂອງທ່ານ ຈັນທະວົງ ແສນອາມາດມົນຕີ ຮອງປະທານກໍາມາທິການການຕ່າງປະ ເທດ; ເຂົ້າຮ່ວມມີບັນດາທ່ານຄະນະກົມ, ຄະນະພະແນກ ແລະ ພະນັກງານທີ່ກ່ຽວຂ້ອງພາຍໃນ ສພຊ.

ທ່ານ ຈັນທະວົງ ແສນອາມາດມົນຕີ ໄດ້ມີຄໍາເຫັນກ່າວເປີດວ່າ: ຈຸດປະສົງຂອງກອງປະຊຸມ ແມ່ນເພື່ອແລກປ່ຽນບົດຮຽນການກະກຽມບັນດາເນື້ອໃນກອງປະຊຸມໄອປາ ໂດຍສະເພາະແມ່ນການຮ່າງມະຕິ, ບົດສະເໜີຂອບເນື້ອໃນ, ບົດປະກອບຄຳອະທິບາຍໃສ່ຮ່າງມະຕິ, ການກະກຽມຄວາມພ້ອມປິ່ນອ້ອມວຽກງານສອງຝ່າຍ ແລະ ເນື້ອໃນອື່ນໆ ເຊິ່ງຜູ້ເຂົ້າຮ່ວມສຳມະນາຄັ້ງນີ້ ລ້ວນແຕ່ແມ່ນຜູ້ທີ່ເຮັດວຽກຕົວຈິງ, ເປັນເສນາທິການໃຫ້ແກ່ການນຳໃນການກະກຽມເນື້ອໃນກອງປະຊຸມໄອປາ ແລະ ກອງປະຊຸມປິ່ນອ້ອມຕ່າງໆ ເຊິ່ງເປັນໂອກາດທີ່ດີ ແລະ ເປັນເວທີປຶກສາຫາລື, ແລກປ່ຽນຄຳຄິດຄຳເຫັນ ແລະ ​ສົນທະນາຢ່າງກົງໄປກົງມາ.

ຜູ້ເຂົ້າຮ່ວມໄດ້ຮັບຟັງການສະເໜີບົດການກະກຽມເປັນເຈົ້າພາບກອງປະຊຸມໄອປາ ຄັ້ງທີ 45; ການກະ ກຽມເນື້ອໃນຮ່າງມະຕິຂອງກອງປະຊຸມກໍາມາທິການວຽກງານເສດຖະກິດ, ກໍາມາທິການການເມືອງ, ກໍາມາທິການວຽກງານສັງຄົມ. ຈາກນັ້ນ, ກໍມີການສົນທະນາຖາມ-ຕອບລະຫວ່າງວິທະຍາກອນ ກັບ ສໍາມະນາກອນ ຕໍ່ບັນດາຫົວຂໍ້ທີ່ຕົນເອງສົນໃຈ ເພື່ອກຳໄດ້ ແລະ ເຂົ້າໃຈຕໍ່ກັບຮ່າງມະຕິ, ບົດສະເໜີຂອບເນື້ອໃນ, ບົດປະກອບຄຳອະທິ ບາຍເນື້ອໃນຮ່າງມະຕິ ແລະ ການກະກຽມຄວາມພ້ອມປິ່ນອ້ອມວຽກງານສອງຝ່າຍ.
(ຂ່າວ-ພາບ: ສອນສັກ ວັນວິໄຊ)