ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ສະຖານເອກອັກຄະລັດຖະທູດ ແຫ່ງ ສສ.ຫວຽດນາມ ປະຈຳ ສປປລາວ ໄດ້ຈັດງານລ້ຽງ ເພື່ອສະເຫຼີມສະຫຼອງວັນຊາດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ຄົບຮອບ 77 ປີ (2/9/1945-2/9/2022) ແລະ ປີສາມັກ ຄີມິດຕະພາບ ລາວ-ຫວຽດນາມ 2022 ຂຶ້ນໃນວັນທີ 2 ກັນຍາ 2022 ຢູ່ໂຮງແຮມເມືອງແທັງ ນະຄອນຫຼວງວຽງ ຈັນ ໂດຍການເຂົ້າຮ່ວມຂອງສະຫາຍ ໄຊສົມພອນ ພົມວິ ຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ, ສະຫາຍ ສອນໄຊ ສີພັນດອນ ກຳມະ ການກົມການເມືອງສູນກາງພັກ ຮອງນາຍົກລັດຖະມົນຕີ, ສະຫາຍ ສະເຫຼີມໄຊ ກົມມະສິດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະ ມົນຕີກະຊວງການຕ່າງປະເທດ, ມີພາກສ່ວນກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.
ສະຫາຍ ຫງວຽນ ບ໋າ ຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ.ຫວຽດນາມ ປະຈຳ ສປປລາວ ໄດ້ກ່າວວ່າ: ກ່ອນໜ້ານີ້ 77 ປີ, ປະຊາຊົນຫວຽດນາມ ພາຍໃຕ້ການນຳພາຂອງພັກກອມມູນິດຫວຽດນາມ ສາມາດຍາດໄດ້ໄຊຊະນະ ໃນການປະຕິວັດເດືອນສິງຫາ, ເອົາອຳນາດການປົກຄອງມາສູ່ກຳມືຂອງປະຊາຊົນ; ຫວຽດນາມໄດ້ຜ່ານເສັ້ນທາງ 30 ປີ ແຫ່ງການຕໍ່ສູ້ລຳບາກຍາກເຂັນເພື່ອປົກປ້ອງເອກະລາດ, ປົດປ່ອຍປະເທດຊາດ, ທ້ອນໂຮມປະເທດຊາດເປັນອັນໜຶ່ງອັນດຽວ ແລະ ຂ້າມຜ່ານ 47 ປີ ແຫ່ງການທັງສ້າງສາ ແລະ ພັດທະ ນາປະເທດຊາດ, ທັງປົກປັກຮັກສາອຳນາດອະທິປະໄຕ, ຜືນແຜ່ນດິນອັນຄົບຖ້ວນ ແລະ ຊີວິດການເປັນຢູ່ຂອງປະຊາຊົນມີຄວາມສະຫງົບປອດໄພ. ບົນເສັ້ນທາງ 77 ປີຜ່ານມາ, ຫວຽດນາມຍາມໃດກໍໄດ້ຮັບການບິແບ່ງ, ສະໜັບ ສະໜູນ ແລະ ຊ່ວຍເຫຼືອອັນໃຫຍ່ຫຼວງທັງດ້ານຈິດໃຈ ແລະ ວັດຖຸ ຈາກບັນດາປະເທດໃນໂລກ ແລະ ຈາກຫຼາຍອົງການຈັດຕັ້ງສາກົນ ແລະ ພາກພື້ນ. ປະຊາຊົນຫວຽດ ນາມຍາມໃດກໍຈາລຶກ ແລະ ສະແດງຄວາມຮູ້ບຸນຄຸນຕໍ່ເພື່ອນມິດຫວຽດນາມ. ຕະຫຼອດເວລາກວ່າ 2 ປີການແຜ່ລະບາດຂອງພະຍາດໂຄວິດ-19 ດ້ວຍຄວາມທຸ່ມເທສຸດກໍາລັງ ຢ່າງໜ້າປະທັບໃຈ, ຫວຽດນາມແມ່ນໜຶ່ງໃນສາມປະເທດທີ່ມີອັດຕາການສັກວັກຊິນສູງກວ່າໝູ່ໃນໂລກ ແລະ ເປັນໜຶ່ງໃນບໍ່ພໍເທົ່າໃດປະເທດຢູ່ທະວີບອາຊີ ທີ່ມີການເຕີບໂຕດ້ານເສດຖະກິດເປັນບວກ ດ້ວຍລະດັບສະເລ່ຍໃນ 2 ປີ ແມ່ນເກືອບ 2%, ສ້າງທ່ວງທ່າໃຫ້ແກ່ຫວຽດນາມເປີດປະເທດໃນຕົ້ນປີ 2022, ເຮັດໃຫ້ກິດຈະ ກຳທາງເສດຖະກິດ ກັບຄືນສູ່ສະພາບປົກກະຕິຄືດັ່ງເວລາກ່ອນມີການແຜ່ລະບາດຂອງພະຍາດໂຄວິ-19 ເຊິ່ງໃນ 7 ເດືອນຕົ້ນປີ 2022 ການເຕີບໂຕ GDP ບັນລຸກວ່າ 6%; ມູນຄ່າການນຳເຂົ້າ-ສົ່ງອອກສິນຄ້າບັນລຸ 431,94 ຕື້ໂດລາ (ເພີ່ມ 14,8% ທຽບໃສ່ໄລຍະດຽວກັນຂອງປີ 2021), ມີນັກທ່ອງທ່ຽວສາກົນເຂົ້າມາຫວຽດນາມ ເກືອບ 1 ລ້ານເທື່ອຄົນ (ເພີ່ມຂຶ້ນຫຼາຍກວ່າ 10 ເທົ່າເມື່ອທຽບໃສ່ໄລຍະດຽວກັນໃນປີ 2021) ແລະ ນັກທ່ອງທ່ຽວພາຍໃນກໍເພີ່ມຂຶ້ນ, ການລົງທຶນໂດຍກົງຂອງຕ່າງປະເທດບັນລຸ 11,57 ຕື້ໂດລາ (ເພີ່ມ 10,2%), ລັດຖະບານສາມາດຄວບຄຸມອັດຕາເງິນເຟີ້ໄດ້ເປັນຢ່າງດີ ແລະ ເຮັດໃຫ້ລາຄານ້ຳມັນເຊື້ອໄຟສະຫງົບ ເຂົ້າສູ່ພາວະປົກກະຕິຢ່າງວ່ອງໄວ.
ສະຫາຍ ເອກອັກຄະລັດຖະທູດ ຫວຽດນາມ ປະຈຳລາວ ຍັງໄດ້ກ່າວວ່າ: ປີນີ້, ຫວຽດນາມສະເຫຼີມສະຫຼອງວັນຊາດ ທ່າມກາງບັນຍາກາດອັນຟົດຟື້ນຂອງປີສາມັກຄີມິດ ຕະພາບ ຫວຽດນາມ-ລາວ. ແຕ່ຕົ້ນປີມາເຖິງປັດຈຸບັນ, ໃນທົ່ວປະເທດລາວ ແລະ ຫວຽດນາມ ໄດ້ຈັດຂຶ້ນເປັນຫຼາຍຮ້ອຍກິດຈະກຳ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດຄົບຮອບ 60 ປີ (5/9/1962) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 45 ປີ (18/7/1977); ຜ່ານບັນດາກິດຈະກຳດັ່ງກ່າວນີ້, ຄວາມສາມັກຄີພິເສດ ຫວຽດນາມ-ລາວ, ລາວ-ຫວຽດ ນາມ ນັບມື້ນັບກ້າວເຂົ້າສູ່ລວງເລິກ, ເຊື່ອມຊຶມເຂົ້າຢ່າງເລິກເຊິ່ງ ໃນທຸກຊັ້ນຄົນຂອງສອງປະເທດ.
ພ້ອມນີ້, ສະຫາຍ ຍັງໄດ້ຕາງໜ້າພັກ, ລັດ ແລະ ປະຊາ ຊົນຫວຽດນາມສະແດງຄວາມຮູ້ບຸນຄຸນຕໍ່ພັກ, ລັດ ແລະ ປະຊາຊົນລາວອ້າຍນ້ອງຍາມໃດກໍສາມັກຄີ, ສະໜັບ ສະໜູນ ແລະ ຊ່ວຍເຫຼືອຫວຽດນາມ. ຫວຽດນາມສະແດງຄວາມຂອບອົກຂອບໃຈ ແລະ ຫວັງຢ່າງຍິ່ງວ່າບັນດາປະເທດ ຈະສືບຕໍ່ສະໜັບສະໜູນສາຍພົວພັນ ແລະ ການຮ່ວມມືລະຫວ່າງຫວຽດນາມ-ລາວ ເພື່ອການພັດທະນາຢ່າງຍືນຍົງ, ປະກອບສ່ວນຢ່າງຕັ້ງໜ້າເຂົ້າໃນການສ້າງປະຊາຄົມອາຊຽນ, ຮັກສາສັນຕິພາບ, ຄວາມສະຫງົບ, ຄວາມໝັ້ນຄົງ ແລະ ການຮ່ວມມືໃນສາກົນ.
ໂອກາດທີ່ສຳຄັນນີ້, ສະຫາຍ ສະເຫຼີມໄຊ ກົມມະສິດ ໄດ້ຮັບມອບໝາຍໃຫ້ຕາງໜ້າພັກ-ລັດ ກ່າວປາໄສ ເຊິ່ງມີເນື້ອໃນສຳຄັນບາງຕອນວ່າ: ພັກ, ລັດ ແລະ ປະຊາຊົນລາວ ສຸດທີ່ຍິນດີ ແລະ ຊົມເຊີຍຢ່າງອົບອຸ່ນ ຕໍ່ບັນດາໄຊຊະນະ ແລະ ຜົນສຳເລັດອັນໃຫຍ່ຫຼວງ, ຮອບດ້ານ ທີ່ມີຄວາມໝາຍປະຫວັດສາດຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງ ຍາດມາໄດ້ໃນໄລຍະ 77 ປີ ຜ່ານມາ. ໄຊຊະນະ ແລະ ຜົນສຳເລັດດັ່ງກ່າວນີ້ ແມ່ນແຫຼ່ງກຳລັງໃຈ ແລະ ເປັນກຳລັງຊຸກຍູ້ຢ່າງແຂງແຮງ ໃຫ້ແກ່ພັກ, ລັດ ແລະ ປະຊາຊົນລາວບັນດາເຜົ່າ ໃນພາລະກິດປົກປັກຮັກສາ ແລະ ສ້າງສາປະເທດຊາດ.
ສະຫາຍ ສະເຫຼີມໄຊ ກົມມະສິດ ຍັງໄດ້ຕາງໜ້າໃຫ້​​ພັກ, ລັດ ​ແລະ ປະຊາຊົນ​ລາວ ​ສະ​ແດງ​ຄວາມ​ຂອບ​ອົກ​ຂອບ​ໃຈ​ຢ່າງ​ເລິກ​ເຊິ່ງຕໍ່​ພັກ, ລັດ ​ແລະ ປະຊາຊົນ​ຫວຽດນາມ ທີ່​ໄດ້​ໃຫ້ການ​ຊ່ວຍ​ເຫຼືອ​ໃນ​ທົ່ວ​ປະ​ເທດ​ລາວ​ໃນ​ໄລຍະ​ແຫ່ງ​ການ​ຕໍ່ສູ້​ປົດ​ປ່ອຍ​ປະ​ເທດ​ຊາດ ກໍຄືຍຸກ​ປັດຈຸບັນ​ແຫ່ງ​ການ​ກໍ່ສ້າງ, ປົກ​ປັກ​ຮັກສາ ​ແລະ ພັດທະນາ​ປະ​ເທດ​ຊາດ. ພ້ອມທັງ​ຢືນຢັນ​ວ່າ: ບໍ່​ວ່າ​ສະຖານະ​ການ​ພາກ​ພື້ນ ​ແລະ ​ໂລກ​ຈະຜັນແປໄປຢ່າງສະຫຼັບຊັບຊ້ອນ​ຄື​ແນວ​ໃດ ພັກ, ລັດ ແລະ ປະຊາຊົນລາວ ​ຈະ​ເຮັດ​ຈົນ​ສຸດ​ຄວາມ​ສາມາດ​ພ້ອມ​ກັບ​ບັນດາ​ສະຫາຍ​ຫວຽດນາມ ​ເພື່ອ​ປົກ​ປັກ​ຮັກສາ ​ແລະ ​ເສີມ​ຂະຫຍາຍ​ມູນ​ເຊື້ອ​ສາມັກຄີ​ແບບ​ພິ​ເສດ​ຂອງ​ສອງປະເທດ ລາວ-ຫວຽດນາມ​ ໃຫ້​ມີ​ຄວາມ​ໝັ້ນຄົງທະນົງແກ່ນ​ຕະຫຼອດ​ໄປ.
(ຂ່າວ-ພາບ: ຂ່າວສານປະເທດລາວ)