ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

​(ສພຊ) ເພື່ອສະຫຼຸບຜົນງານການຈັດຕັ້ງປະຕິບັດແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດແຫ່ງກົດໝາຍ (ແຜນງານເຊກາ) ອົງປະກອບທີ 2 ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ທີ່ເລີ່ມຈັດຕັ້ງປະຕິບັດແຜນງານດັ່ງກ່າວມາແຕ່ປີ 2018 ຫາ 2022 ເຊິ່ງຈະສີ້ນສຸດໃນທ້າຍປີ 2022 ນີ້; ເພື່ອນຳສະເໜີຜົນງານການຈັດຕັ້ງປະຕິບັດແຜນງານ ໃນໄລຍະ 5 ປີຜ່ານມາ (2018-2022) ໃຫ້ແກ່ບັນດາກໍາມາທິການພາຍໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງຮັບຊາບ ແລະ ຮັບຮູ້ໄດ້ເຖິງຜົນໄດ້ຮັບຜົນສໍາເລັດ, ຂໍ້ສະດວກ ແລະ ສິ່ງທ້າທາຍຕ່າງໆໃນການດຳເນີນງານ; ເພື່ອຖອດຖອນບົດຮຽນຈາກການຈັດຕັ້ງປະຕິບັດແຜນງານເຊກາ ໄລຍະ 1 ເພື່ອກ້າວສູ່ການສ້າງ, ຄົ້ນຄວ້າ, ຮູບແບບວິທີການໃນການຈັດຕັ້ງປະຕິບັດແຜນງານ ໄລຍະ 2 ໃຫ້ໄດ້ຮັບຜົນດີກວ່າເກົ່າ. ວັນທີ 17 ຕຸລາ 2022, ທີ່ໂຮງແຮມຄຣາວພຣາຊາ, ກົມການເງິນ ຄະນະເລຂາທິການສະພາແຫ່ງຊາດ ໄດ້ມີການຈັດພິທີສະຫຼຸບຜົນງານການຈັດຕັ້ງປະຕິບັດແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ) ໂດຍການເຂົ້້າຮ່ວມຂອງທ່ານ ນາງ ປິ່ງຄໍາ ລາຊະສິມມາ ກໍາມະການສູນກາງພັກ, ເລຂາທິການສະພາແຫ່ງຊາດ ແລະ ທ່ານ Anette Knobloch ເອກອັກຄະລັດຖະທູດຜູ້ມີອຳນາດເຕັມ ແຫ່ງສະຫະພາບເຢຍລະມັນ ປະຈຳ ສປປລາວ, ມີທ່ານຮອງເລຂາທິການສະພາແຫ່ງຊາດ; ບັນດາທ່ານຮອງປະທານກຳມາທິການ, ຮອງຫົວໜ້າສະຖາບັນຄົ້ນຄວ້ານິຕິກຳ, ບັນດາເລຂາທິການ-ຮອງເລຂາທິການ ຈາກ 18 ເຂດເລືອກຕັ້ງທົ່ວປະເທດ, ບັນດາທ່ານຫົວໜ້າກົມ-ຮອງຫົວໜ້າກົມ ພາຍໃນສະພາແຫ່ງຊາດ, ພ້ອມດ້ວຍຜູ້ຕາງໜ້າຄູ່ຮ່ວມພັດທະນາຈາກ EU, ຕາງໜ້າຄູ່ຮ່ວມພັດທະນາ SDC, ຄູ່ຮ່ວມພັດທະນາຈາກ BMZ, ຕາງໜ້າແຜນງານ CEGGA-GIZ, ຕາງໜ້າຈາກ UNDP, TAF, Helvetas, WFD, RLS.​
ເນື້ອໃນຂອງການຈັດງານໃນຄັ້ງນີ້ ແມ່ນໄດ້ຮັບຟັງການສະເໜີບົດສະຫຼຸບກ່ຽວກັບຜົນໄດ້ຮັບຈາກການຈັດຕັ້ງປະຕິບັດວຽກງານທີ່ນຳໃຊ້ງົບປະມານຈາກແຜນງານເຊກາ ຂອງສະພາແຫ່ງຊາດ ໂດຍທ່ານ ນາງ ໄກສອນ ແກ້ວມະນີໂຄດ ຮອງຫົວໜ້າກົມພົວພັນລັດຖະສະພາຫຼາຍຝ່າຍ ແລະ ບົດສະຫຼຸບກ່ຽວກັບຜົນໄດ້ຮັບຈາກການປະຕິບັດວຽກງານທີ່ນຳໃຊ້ງົບປະມານຈາກແຜນງານເຊກາ ຂອງສະພາປະຊາຊົນຂັ້ນແຂວງ ໂດຍທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງຜົ້ງສາລີ, ນອກຈາກນີ້ ຜູ້ເຂົ້າຮ່ວມງານ ຍັງໄດ້ຮັບຊົມການສາຍວິດີໂອກ່ຽວກັບຜົນສຳເລັດໃນການຈັດຕັ້ງປະຕິບັດແຜນງານເຊກາ ອົງປະກອບທີ 2 ຂອງສະພາແຫ່ງຊາດ ແລະ ສະພາປະຊາຊົນແຂວງອີກດ້ວຍ.
ທ່ານ ນາງ ປິ່ງຄຳ ລາຊະສິມມາ ໄດ້ມີຄຳເຫັນໃນພິທີວ່າ: ການຈັດຕັ້ງປະຕິບັດແຜນງານທີ່ມີເປົ້າໝາຍຄາດຫວັງຜົນສຳເລັດທີ່ສູງສົມຄວນນັ້ນ ພາຍໃຕ້ສະຖານະການທີ່ບໍ່ສາມາດຄາດຄະເນໄດ້ຂອງການລະບາດພະຍາດອັກເສບປອດສາຍພັນໃໝ່ (ໂຄວິດ-19) ນັ້ນ, ແຜນງານເຊກາ ກໍໄດ້ຫັນທິດຈາກສິ່ງທ້າທາຍດັ່ງກ່າວ ໄປສະໜັບສະໜູນການເສີມສ້າງຄວາມເຂັ້ມແຂງ ທາງດ້ານດີຈີຕອນໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງແທນ. ພວກເຮົາຂໍຊົມເຊີຍແຜນງານ ທີ່ມີຄວາມຍຶດຍຸ່ນນີ້ ທີ່ໄດ້ຕອບສະໜອງການຊ່ວຍເຫຼືອ ໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງຂອງ ສປປລາວ ຕາມແຜນຍຸດທະສາດ ເຊິ່ງຖືໄດ້ວ່າເປັນຄູ່ຮ່ວມງານທີ່ມີຄວາມຮັບຜິດຊອບສູງຮ່ວມກັນ. ຂໍຊົມເຊີຍຜົນສໍາເລັດຂອງແຜນງານເຊກາ ໄລຍະທີ 1 ທີ່ພວກເຮົາໄດ້ທຸ້ມເທເຮັດວຽກຮ່ວມກັນຢ່າງໜັກໜ່ວງ, ​ມີຄວາມມຸ່ງໝັ້ນສູ້ຊົນ ແລະ ໄດ້ຮັບຜົນສໍາເລັດຢ່າງຈົບງາມ ແລະ ສະແດງຄວາມຍິນດີຮັບຕ້ອນແຜນງານເຊກາ ໄລຍະທີ 2 ທີ່ຈະຕໍ່ຍອດຜົນສໍາເລັດຈາກແຜນງານໄລຍະທີ 1.
(ພາບ ແລະ ຂ່າວ: ອານຸສອນ ພູມມີທອນ)