ໃນລະຫວ່າງວັນທີ 06-07 ພຶດສະພາ 2024 ທີ່ສະພາແຫ່ງຊາດ, ກຳມາທິການບັນດາເຜົ່າ ຮ່ວມກັບກະ ຊວງກະສິກຳ ແລະ ປ່າໄມ້ ໄດ້ຈັດກອງປະຊຸມສະຫຼຸບຜົນການຕິດຕາມກວດກາຂອງຄະນະປະຈຳສະພາແຫ່ງຊາດ ຕໍ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ປະຈຳປີ 2023 ໂດຍການເປັນປະທານຂອງທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ; ມີບັນດາທ່ານປະທານ-ຮອງປະທານກຳມາທິການຂອງສະພາແຫ່ງຊາດ, ລັດຖະມົນຕີ-ຮອງລັດຖະມົນຕີ, ຫົວໜ້າ-ຮອງຫົວໜ້າອົງການ ແລະ ພະນັກງານຈາກພາກສ່ວນທີ່ກ່ຽວ ຂ້ອງ, ຮອງເຈົ້າແຂວງ (ຈຳນວນໜຶ່ງ) ຜູ້ຊີ້ນຳວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ເຂົ້າຮ່ວມຢ່າງຫຼວງຫຼາຍ.

ທ່ານ ພົທ. ສຸວອນ ເລືອງບຸນມີ ໄດ້ມີຄຳເຫັນໂອ້ລົມ ແລະ ກ່າວເປິດກອງປະຊຸມ ເຊິ່ງມີບາງຕອນວ່າ: ກອງປະຊຸມຄັ້ງນີ້ ມີຄວາມສໍາຄັນຫຼາຍໃນລະດັບຍຸດທະສາດຂອງການພັດທະນາ ເພື່ອປະຕິບັດແຜນພັດທະນາເສດ ຖະກິດ-ສັງຄົມ ຄັ້ງທີ IX (2021-2025) ເວົ້າລວມ, ເວົ້າສະເພາະວຽກງານພັດທະນາຊົນນະບົດ ໃຫ້ມີປະສິດທິ ພາບ ແລະ ປະສິດທິຜົນ; ຮຽກຮ້ອງບັນດາຜູ້ເຂົ້າຮ່ວມ ຈົ່ງຍົກສູງຄວາມຮັບຜິດຊອບຂອງຕົນ ເພື່ອຄົ້ນຄວ້າ ແລະ ແລກປ່ຽນຄຳຄິດຄຳເຫັນຢ່າງມີຈຸດສຸມເຂົ້າໃສ່ວຽກງານດັ່ງກ່າວນີ້ຢ່າງຈິງຈັງ.

ກອງປະຊຸມ ໄດ້ຮັບຟັງການສະເໜີເນື້ອໃນທີ່ສຳຄັນຈາກວິທະຍາກອນອ້ອມຂ້າງສູນກາງ ຄື: ຜົນການຈັດຕັ້ງປະຕິບັດບັນດາຄາດໝາຍຂອງວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຕາມມະຕິ 82/ສພຊ, ລົງວັນທີ 30/12/2022 ແລະ ຜົນຂອງການປະເມີນ ຕາມດໍາລັດ 348/ລບ, ລົງວັນທີ 16/11/2017 ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ; ຜົນການຈັດຕັ້ງປະຕິບັດວຽກງານ 03 ສ້າງ ປະຈໍາປີ 2023; ຜົນການຕິດ ຕາມກວດກາຂອງຄະນະປະຈຳສະພາແຫ່ງຊາດ ຕໍ່ການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຕາມມະຕິ 82/ສພຊ. ຈາກນັ້ນ, ບັນດາທ່ານຜູ້ແທນກອງປະຊຸມ ໄດ້ປະກອບຄໍາຄິດຄຳເຫັນເພື່ອແລກປ່ຽນບົດ ຮຽນ, ປະສົບການ ແລະ ທັດສະນະ ເພື່ອເປັນທິດໃນການປັບປຸງຂອດການຈັດຕັ້ງປະຕິບັດວຽກງານດັ່ງກ່າວ ໃຫ້ປະສົບຜົນສຳເລັດພົ້ນເດັ່ນກວ່າເກົ່າ.

(ພາບ-ຂ່າວ: ອານຸສອນ ພູມມີທອນ)