(ສພຊ) ກອງປະຊຸມສະຫຼຸບ-ລາຍງານຜົນສຳເລັດ ແລະ ແລກປ່ຽນບົດຮຽນການສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ໄດ້ມີຂຶ້ນໃນວັນທີ 9 ມິຖຸນາ 2023 ຢູ່ທີ່ສະພາແຫ່ງຊາດ ໂດຍການເປັນປະທານກອງປະຊຸມຂອງທ່ານ ດຣ. ນາງ ວິພາວັນ ພົມວິຫານ ປະທານກອງທຶນຊ່ວຍເຫຼືອສັງຄົມຂອງສະພາແຫ່ງຊາດ; ມີທ່ານ ນາງ ມະນີວັນ ເຍຍປາວເຮີ ຮອງປະທານກຳມາທິການວັດທະນະທຳ-ສັງຄົມ, ຮອງປະທານຄະນະກອງທຶນຊ່ວຍເຫຼືອສັງຄົມຂອງສະພາແຫ່ງຊາດ ທັງເປັນປະທານຄະນະບໍລິຫານງານສະຫະພັນແມ່ຍິງສະພາແຫ່ງຊາດ; ທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ, ມີບັນດາທ່ານຄະນະກອງທຶນຊ່ວຍເຫຼືອສັງຄົມຂອງສະພາແຫ່ງຊາດ, ຜູ້ຕາງໜ້າຈາກ 3 ອົງການຈັດຕັ້ງມະຫາຊົນຂອງສະພາແຫ່ງຊາດ, ບັນດາແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນທີ່ປະຊຸມ, ຕາງໜ້າໃຫ້ແຕ່ລະພາກສ່ວນທີ່ຮັບຜິດຊອບໃນງານສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ຄັ້ງວັນທີ 1 ມິຖຸນາ 2023 ທີ່ຜ່ານມາ ໄດ້ລາຍງານສະພາບການຈັດຕັ້ງປະຕິບັດວຽກງານທີ່ຕົນຮັບຜິດຊອບ. ພ້ອມນັ້ນ, ຜູ້ເຂົ້າຮ່ວມກໍໄດ້ປະກອບຄຳຄິດຄຳເຫັນ, ແລກປ່ຽນບົດຮຽນຢ່າງກົງໄປກົງມາ ໂດຍສະເພາະຍົກໃຫ້ເຫັນດ້ານດີທີ່ຄວນສືບຕໍ່ ແລະ ຂໍ້ຄົງຄ້າງໃນດ້ານຕ່າງໆທີ່ຈະໄດ້ປັບປຸງແກ້ໄຂ ເພື່ອເຮັດໃຫ້ການຈັດງານສະເຫຼີມສະຫຼອງໃນປີຕໍ່ໆໄປ ຫຼື ການເຮັດກິດຈະກຳອື່ນໆມີຄວາມສະດວກ ແລະ ມີຜົນສຳເລັດຕາມລະດັບຄາດໝາຍທີ່ວາງໄວ້.

ໂອກາດນີ້, ທ່ານ ດຣ. ນາງ ວິພາວັນ ພົມວິຫານ ໄດ້ສະຫຼຸບສັງລວມໂດຍຫຍໍ້ກ່ຽວກັບບົດຮຽນຕ່າງໆທີ່ສາມາດຖອດຖອນໄດ້ ທັງມີຄຳເຫັນຊີ້ທິດເຍືອງທາງຕໍ່ທີ່ປະຊຸມ ໂດຍທ່ານໄດ້ສະແດງຄວາມຍ້ອງຍໍຊົມເຊີຍຕໍ່ທຸກພາກສ່ວນທີ່ໄດ້ຮັບຜິດຊອບໃນງານສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ເຊິ່ງໄດ້ປະກອບສ່ວນສຳຄັນເຮັດໃຫ້ງານດັ່ງກ່າວ ມີຜົນສຳເລັດໄດ້ດ້ວຍດີ ທັງໝົດກໍຍ້ອນມີການຊີ້ນຳຢ່າງໃກ້ຊິດຈາກການນຳຂອງສະພາແຫ່ງຊາດ, ມີການແບ່ງງານແບ່ງຄວາມຮັບຜິດຊອບ, ຄວາມເອົາໃຈໃສ່ ແລະ ເປັນພະລັງສາມັກຄີຮ່ວມແຮງຮ່ວມໃຈຂອງທຸກພາກສ່ວນ ທັງພາຍໃນສະພາແຫ່ງຊາດ ແລະ ຜູ້ອຸປະຖຳຈາກພາກສ່ວນຕ່າງໆ. ພ້ອມດຽວກັນນີ້, ທ່ານຍັງໄດ້ເນັ້ນໃຫ້ທຸກພາກສ່ວນນຳເອົາບົດຮຽນທີ່ຖອດຖອນໄດ້ໄປຄົ້ນຄວ້າປຶກສາຫາລືຮ່ວມກັນ ເພື່ອເຮັດໃຫ້ການຈັດກິດຈະກຳ ຫຼື ສະເຫຼີມສະຫຼອງງານຕ່າງໆໃນຕໍ່ໜ້າ ໃຫ້ໄດ້ເນື້ອໃນ ທັງເປັນການປູກຈິດສຳນຶກໃຫ້ແກ່ຊາວໜຸ່ມ-ເຍົາວະຊົນ ແລະ ອະນຸຊົນ, ພໍ່ແມ່ຜູ້ປົກຄອງ ກໍຄືການປົກຄອງ, ການຈັດຕັ້ງທຸກຂັ້ນ ເຫັນໄດ້ຄວາມສຳຄັນຂອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ; ເສີມຂະຫຍາຍສາຍພົວພັນຄອບຄົວ, ພໍ່ແມ່-ລູກ ກໍຄືນະໂຍບາຍຂອງພັກ ແລະ ລັດ ໃນການສຶກສາອົບຮົມ, ປູກຈິດສຳນຶກແນວຄິດຮັກຊາດ, ຮັກບ້ານເກີດເມືອງນອນ ທັງເປັນການປົກປ້ອງສົ່ງເສີມສິດຜົນປະໂຫຍດຂອງເດັກນ້ອຍຢູ່ ສປປລາວ ຕາມລະບຽບກົດໝາຍທີ່ກຳນົດໄວ້.

ໂອກາດດຽວກັນນີ້, ກອງທຶນຊ່ວຍເຫຼືອສັງຄົມຂອງສະພາແຫ່ງຊາດ ຍັງໄດ້ມອບເງິນຈຳນວນໜຶ່ງໃຫ້ 3 ອົງການຈັດຕັ້ງມະຫາຊົນຂອງສະພາແຫ່ງຊາດ ເພື່ອໃຫ້ອົງການຈັດຕັ້ງດັ່ງກ່າວ ໄດ້ນຳໄປເປັນກອງທຶນໃນການເຄື່ອນໄຫວກິດຈະກຳຕ່າງໆຂອງອົງການຈັດຕັ້ງຂອງຕົນ ພາກສ່ວນລະ 10 ລ້ານກີບ ລວມມູນຄ່າ 30 ລ້ານກີບ.

(ພາບ ແລະ ຂ່າວ: ນາງ ປາກາລັກ ພົມມີໄຊ)