ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນບ່າຍ ວັນທີ 17 ມີນາ 2022 ນີ້, ທີ່ຫ້ອງປະຊຸມສະພາປະຊາຊົນແຂວງສະຫວັນເຂດ ໄດ້ຈັດກອງປະຊຸມສະຫຼຸບຕີລາຄາຜົນສຳເລັດການລົງພົບປະ ແລະ ເຜີຍແຜ່ຜົນສຳເລັດກອງປະຊຸມສະ ໄໝສາມັນ ເທື່ອທີ 02 ຂອງ ສພຊ ຊຸດທີ IX ແລະ ສພຂ ຊຸດທີ II ໂດຍໃຫ້ກຽດເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍບັນດານທ່ານ ຄະນະປະຈຳ, ຮອງບັນດາຄະນະກຳມະການ ສພຂ, , ບັນດາທ່ານ ສສຊ-ສສຂ ທີ່ປະຈຳການພາຍໃນນະຄອນໄກສອນພົມວິຫານ, ຮອງເລຂາທິການ ສພຂ,ຫົວໜ້າຂະແໜງ ແລະ ວິຊາການທີ່ຕິດຕາມຄະນະໃນການລົງເຄື່ອນໄຫວເຜີຍແຜ່ຜົນສຳເລັດຂອງກອງປະຊຸມດັ່ງກ່າວເຂົ້າຮ່ວມ.

ທ່ານ ບົວລົມ ອິນທີທະວົງ ຮອງເລຂາທິການສະພາປະຊາຊົນແຂວງ ໄດ້ຂຶ້ນຜ່ານຮ່າງບົດ​ສະຫຼຸບຕີລາຄາການເຄື່ອນໄຫວລົງພົບປະ ແລະ ເຜີຍແຜ່ສໍາເລັດກອງປະຊຸມສະໄໝສາມັນ ເທື່ອທີ 02 ຂອງ ສະພາປະຊາຊົນແຂວງ ຊຸດທີ II ຢູ່ບັນດາເຂດເລືອກຕັ້ງເມືອງ-ນະຄອນ ວ່າ:  ເພື່ອນໍາເອົາຜົນສໍາເລັດກອງປະ ຊຸມສະໄໝສາມັນ ເທື່ອທີ 02 ຂອງສະພາປະຊາຊົນແຂວງ ຊຸດທີ II ໃຫ້ພະນັກງານ-ລັດຖະກອນ, ພະນັກງານບໍານານ, ທະຫານຕໍາຫຼວດ ຕະຫຼອດຮອດພໍ່ແມ່ປະຊາຊົນບັນດາເຜົ່າ ໃນຖານະຜູ້ມີສິດເລືອກຕັ້ງ ໄດ້ຮັບຮູ້ເຊື່ອມຊຶມ. ໃນໄລຍະການພົບປະໃນແຕ່ລະຈຸດໄດ້ມີການສົນທະນາແລກປ່ຽນຄໍາຄິດຄໍາເຫັນ ໃນແຕ່ລະບັນຫາ, ເຮັດໃຫ້ຜູ້ມີສິດເລືອກຕັ້ງໃນແຕ່ລະຈຸດນັບທັງ ອໍານາດການປົກຄອງ ໄດ້ຮັບຮູ້ ແລະ ເຂົ້າໃຈ ຕໍ່ກັບພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ. ນອກຈາກນີ້ ການລົງເຄື່ອນໄຫວພົບປະໃນຄັ້ງນີ້ ຍັງເປັນການຕິດຕາມກວດກາເກັບກໍາຂໍ້ມູນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການລຶບລ້າງຄວາມທຸກຍາກ, ການຈັດຕັ້ງປະຕິບັດບັນດາໂຄງການຕ່າງໆ ນັບທັງພາກລັດ ແລະ ເອກະຊົນຢູ່ຂັ້ນທ້ອງຖິ່ນຮາກຖານ. ລວມທັງການຕິດຕາມກວດກາການຈັດຕັ້ງປະຕິບັດມາດຕະການປ້ອງກັນ, ສະກັດກັ້ນ ແລະ ຄວບຄຸມການແຜ່ລະບາດພະຍາດໂຄວິດ-19 ໃນແຕ່ລະເມືອງຕື່ມອີກ. ຜ່ານການ​ລົງພົບປະຜູ້ມີສິດເລືອກຕັ້ງຄັ້ງນີ້ ໃນນັ້ນຈັດຕັ້ງການພົບປະ ຢູ່ຂັ້ນເທສະບານເມືອງ-ນະຄອນ, ກົມກອງ ໄດ້ 16 ຈຸດ ແລະ ຢູ່ກຸ່ມບ້ານ 42 ຈຸດ, ລວມມີ 58 ຈຸດ, ມີຜູ້ມີສິດເລືອກຕັ້ງເຂົ້າຮ່ວມຮັບຟັງທັງໝົດ ຈໍານວນ 7.183 ເທື່ອຄົນ, ຍິງ 3.014 ເທື່ອຄົນ, ສໍາການລົງເຄື່ອນໄຫວເຜີຍແຜ່ ບັນດາທ່ານສະມາຊິກສະພາແຫ່ງຊາດ ກໍໄດ້ເຜີຍແຜ່ກ່ຽວກັບ ຜົນສໍາເລັດກອງປະຊຸມສະໄໝສາມັນ ເທື່ອທີ 02 ຂອງສະພາແຫ່ງຊາດ ຊຸດທີ IX, ສ່ວນສະມາຊິກສະພາປະຊາຊົນແຂວງ ໄດ້ເຜີຍແຜ່ຜົນສໍາເລັດກອງປະ ຊຸມສະໄໝສາມັນ ເທື່ອທີ 02 ຂອງສະພາປະຊາຊົນແຂວງ ຊຸດທີ II ຕິດພັນກັບການລົງເຄື່ອນໄຫວຄັ້ງນີ້ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແລະ ສະມາຊິກສະພາປະຊາຊົນແຂວງ ຍັງໄດ້ເຄື່ອນໄຫວຢ້ຽມຢາມປະຊາຊົນຢູ່ບ້ານລະເບົາ ທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້າເຊລະນອງ 01, ໄດ້ລະດົມ ແລະ ເຂົ້າຮ່ວມມອບເຄື່ອງຊ່ວຍເຫຼືອ ເປັນຕົ້ນແມ່ນ: ອຸປະກອນປ້ອງກັນພະຍາດໂຄວິດ-19, ເຄື່ອງອຸປະໂພກ-ບໍລິໂພກ, ອຸປະກອນກິລາ  ແລະ ເງິນສົດ ລວມມູນຄ່າ ທັງໝົດ 258.928.000 ກີບ.

ໃນການລົງພົບປະຜູ້ມີສິດເລືອກຕັ້ງໃນຄັ້ງນີ້ ອຳນາດການປົກຄອງເມືອງ, ບ້ານ, ຈຸດສຸມ ແລະ ພໍ່ແມ່ປະຊາຊົນ ໄດ້ສະເໜີມາຍັງອຳນາດການປົກຄອງແຂວງ ແລະ ພາກສ່ວນກ່ຽວຂ້ອງ ເຊີ່ງສາມາດສັງລວມຄຳສະເໜີໄດ້ທັງໝົດ 221 ຄໍາສະເໜີ, ໃນນີ້ ສະມາຊິກສະພາປະຊາຊົນແຂວງ ແລະ ການນໍາຂອງເມືອງ ໄດ້ຊີ້ແຈງໃຫ້ຜູ້ມີສິດເລືອກຕັ້ງແລ້ວ 140 ຂໍ້ສະເໜີ, ສໍາລັບຂໍ້ສະເໜີທີ່ຍັງບໍ່ໄດ້ຊີ້ແຈງ ມີຈໍານວນ 81 ຄໍາສະເໜີ ບັນຫາທີ່ຜູ້ມີສິດເລືອກຕັ້ງສະເໜີຫຼາຍທີ່ສຸດແມ່ນຂົງເຂດໂຍທາທິການ ແລະ ຂົນສົ່ງ, ສຶກສາທິການ ແລະ ກິລາ, ສາທາລະນະສຸກ ແລະ ຂົງເຂດກະສິກໍາ ແລະ ປ່າໄມ້ ເປັນຕົ້ນແມ່ນ ການກໍ່ສ້າງສ້ອມແປງເສັ້ນທາງ, ຂົວ, ການກໍ່ສ້າງສ້ອມແປງໂຮງຮຽນ, ໂຮງໝໍ, ການກໍ່ສ້າງຄອງຊົນລະປະທານ, ເງິນນະໂຍບາຍພະນັກງານລັດຖະກອນຄູ, ຕົວເລກລັດຖະກອນຄູ, ບັນຫາຄູອາສາສອນມາໄດ້ຫຼາຍປີ, ບຸກຄະລາກອນການແພດ, ອຸປະກອນການແພດ, ການຂະຫຍາຍຕາຂ່າຍໄຟຟ້າ, ບັນຫາຄ່າຄອງຊີບ, ອັດຕາເງິນເຝີ້, ການຊື້-ຂາຍດ້ວຍເງິນຕາຕ່າງປະເທດ ແລະ ບັນຫາຢາເສບຕິດ. ພາຍຫຼັງທີ່ຮັບຟັງການຜ່ານບົດສະຫຼຸບຕີລາຄາດັ່ງກ່າວແລ້ວ ບັນດາທ່ານ ທີ່ເຂົ້າຮ່ວມກອງປະຊຸມກໍໄດ້ປະກອບຄຳຄິດຄຳເຫັນ ຢ່າງກົງໄປກົງມາ  ເພື່ອເຮັດໃຫ້ເນື້ອໃນຂອງບົດສະຫຼຸບ ມີຄວາມຖືກຕ້ອງສອດຄອງ ແລະ ມີຄວາມຫັດກຸມຍິ່ງຂຶ້້ນ.