(ສພຊ) – ວັນທີ 22 ພະຈິກນີ້ ທີ່ສະພາແຫ່ງຊາດ, ສະຫາຍ ຄໍາໃບ ດໍາລັດ ຮອງປະທານສະພາແຫ່ງຊາດ ໄດ້ຕ້ອນຮັບການຢ້ຽມຂໍ່ານັບຂອງສະຫາຍ ເຫີ ທຽນຊາຍ ຮອງປະທານຄະນະປະຈໍາສະພາຜູ້ແທນປະຊາຊົນແຂວງຊານຊີ ແຫ່ງ ສປຈີນ ພ້ອມດ້ວຍຄະນະ ໃນໂອກາດທີ່ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປລາວ.

ສະຫາຍ ຄໍາໃບ ດໍາລັດ ໄດ້ສະແດງຄວາມຍິນດີຕ້ອນຮັບ ພ້ອມທັງຕີລາຄາສູງຕໍ່ການຢ້ຽມຢາມ ແລະ ເຮັດວຽກໃນຄັ້ງນີ້ ທີ່ໄດ້ນໍາເອົາໄມຕີຈິດມິດຕະພາບຂອງພັກ, ລັດ ແລະ ປະຊາຊົນຈີນອ້າຍນ້ອງ ມາສູ່ປະຊາຊົນລາວບັນດາເຜົ່າ ທັງເປັນໂອກາດອັນດີໃນການແລກປ່ຽນບົດຮຽນ ແລະ ປະສົບການອັນລໍ້າຄ່າ ທີ່ຕິດພັນກັບພາລະບົດບາດ, ສິດ ແລະ ໜ້າທີ່ຂອງສອງສະພາ ເຊິ່ງໄດ້ປະກອບສ່ວນສໍາຄັນໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ແລະ ການເປັນຄູ່ຮ່ວມຊາຕາກໍາສັງຄົມນິຍົມ ລາວ-ຈີນ, ຈີນ-ລາວ ໃຫ້ນັບມື້ເປັນຮູບປະທຳ ແລະ ແຕກດອກອອກຜົນຍິ່ງໆຂຶ້ນ.

ສະຫາຍ ເຫີ ທຽນຊາຍ ກໍໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ພ້ອມທັງລາຍງານຜົນການພົບປະເຮັດວຽກ ແລະ ແລກປ່ຽນບົດຮຽນກັບກໍາມາທິການກົດໝາຍ, ແຈ້ງສະພາບການທີ່ພົ້ນເດັ່ນໂດຍຫຍໍ້ຂອງແຂວງ ແລະ ການປະຕິບັດພາລະບົດບາດຂອງສະພາຜູ້ແທນປະຊາຊົນແຂວງຊານຊີ ໃຫ້ຮັບຊາບ.

(ນາງ ອາລິນ ສຸພິມມະປະດິດ)