ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

          ຕອນເຊົ້າຂອງວັນພະຫັດທີ 28 ເມສາ 2022 ຢູ່ທີ່ຫ້ອງປະຊຸມ ສພຂ, ສະຫະພັນແມ່ຍິງໜ່ວຍ ສພຂ ໄດ້ມອບໃບຍ້ອງຍໍ ຂອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ, ຕາງໜ້າມອບໂດຍທ່ານ ນາງ ວັນສີ ພວງມະໄລ ຮອງເລຂາໜ່ວຍພັກ, ເລຂາທິການ ສພຂ, ມີທ່ານ ນາງ ຄໍາພອນ ພິມມະຈັນ ຮອງປະທານ ສພຂ, ທ່ານ ນາງ ວຽງສະໄໝ ປັນຍາຂັນ ປະທານສະຫະພັນແມ່ຍິງໜ່ວຍ ສພຂ, ຄະນະໜ່ວຍ ແລະ ສະມາຊິກແມ່ຍິງພາຍໃນໜ່ວຍ ສພຂ ເຂົ້າຮ່ວມຢ່າງພ້ອມພຽງ.

         ຄະນະຮັບຜິດຊອບໄດ້ຜ່ານຂໍ້ຕົກລົງຂອງສູນກາງສະຫະພັນແມ່ຍິງລາວ ສະບັບເລກທີ 029/ສສຍລ, ລົງວັນທີ 08 ກຸມພາ 2021 ວ່າດ້ວຍການຍ້ອງຍໍບຸກຄົນ ແລະ ກົມກອງລວມໝູ່ທີ່ມີຜົນງານດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ສະໄໝທີ VII(2016-2020)ຈໍານວນ 124,005 ໃບໃນທົ່ວປະເທດ ແລະ ໃນທົ່ວແຂວງອຸດົມໄຊ ໄດ້ຮັບທັງໝົດ 4,212 ໃບ, ໃນນັ້ນ ສະ ມາຊິກແມ່ຍິງພາຍໃນໜ່ວຍ ສພຂ ໄດ້ຮັບທັງໝົດ 9 ໃບ, ພາຍຫຼັງຄະນະຮັບຜິດຊອບຜ່ານຂໍ້ຕົກລົງດັ່ງກ່າວແລ້ວ ໄດ້ຈັດພິທີມອບຢ່າງເປັນທາງການ.

       ພ້ອມດຽວກັນນັ້ນ ສະຫະພັນແມ່ຍິງໜ່ວຍ ສພຂ ຍັງໄດ້ສະຫຼຸບຕີລາຄາຄືນການເຄື່ອນໄຫວຈັດຕັ້ງປະຕິບັດໜ້າທີ່ວຽກງານຂອງຕົນໃນໄລຍະ 2 ເດືອນຄື: ເດືອນມີນາ, ເມສາ ແລະ ວາງທິດທາງແຜນການເຄື່ອນໄຫວໃນເດືອນ ພຶດ ສະພາ 2022 ຕື່ມອີກ.

(ພາບ-ຂ່າວ: ແສງພອນ ອິນນະລົງ).