ຕອນເຊົ້າຂອງວັນທີ 15 ທັນວາ 2023 ນີ້ ສະຫະພັນແມ່ຍິງຮາກຖານສະພາປະຊາຊົນແຂວງຫລວງນ້ໍາທາ ໄດ້ເປີດກອງປະຊຸມສະຫຼຸບຮັບຮອງການຈັດຕັ້ງປະຕິບັດຂໍ້ແຂ່ງຂັນ 3 ດີ ຮອບທີ III ປະຈໍາປີ 2023 ຂອງຕົນຂຶ້ນຢ່າງເປັນທາງການ ທີ່ຫ້ອງປະຊຸມຂອງສະພາປະຊາຊົນແຂວງໂດຍການເປັນປະທານຂອງ ທ່ານ ນາງ ວັນມະນີ ລີວົງລົງ ປະທານສະຫະພັນແມ່ຍິງຮາກຖານສະພາປະຊາຊົນແຂວງ, ເປັນກຽດເຂົ້າຮ່ວມຂອງທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ເລຂາໜ່ວຍພັກ, ຮອງປະທານສະພາປະຊາຊົນແຂວງ ແລະ ທ່ານ ນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ , ປະທານຄະນະກຳມະການວັດທະນະທຳສັງຄົມ ແລະ ບັນດາເຜົ່າ, ຄະນະບໍລິຫານງານ ສະຫະພັນແມ່ຍິງແຂວງ ຜູ້ຊີ້ນຳຂົງເຂດນິຕິກຳ, ນິຕິບັນຍັດ ແລະ ຕຸລາການ, ເຂົ້າຮ່ວມມີສະຫະພັນແມ່ຍິງແຂວງ, ຕາງໜ້າໜ່ວຍສະຫະພັນແມ່ຍິງອ້ອມຂ້າງ, ພ້ອມດ້ວຍສະມາຊິກແມ່ຍິງພາຍໃນໜ່ວຍເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຟັງການຜ່ານຮ່າງບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ  ປະຈໍາປີ 2023 ເຊິ່ງສະຫະພັນແມ່ຍິງຮາກຖານສະພາປະຊາຊົນແຂວງ ມີສະມາຊິກທັງໝົດ 23 ທ່ານ, ໃນນັ້ນເປັນສະມາຊິກພັກສົມບູນ 12 ສະຫາຍ, ສຳຮອງ 2 ສະຫາຍ, ເປັນກຳມະການພັກແຂວງ,  ເລຂາໜວ່ຍພັກ ແລະ ທັງເປັນຮອງປະທານສະພາປະຊາຊົນແຂວງ 1 ທ່ານ, ເປັນສະມາຊິກສະພາແຫ່ງຊາດ ທັງເປັນປະທານ ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ 1 ທ່ານ; ໃນໄລຍະ 1 ປີ ຜ່ານມາເອື້ອຍນ້ອງສະຫະພັນແມ່ຍິງຮາກຖານສະພາປະຊາຊົນແຂວງ ສາມາດສ້າງລາຍຮັບໄດ້ຈາກການຮັບອາຫານວ່າງກອງປະຊຸມຕ່າງໆ ລວມທັງຫມົດ 5,448,000 ກີບ ແລະ ຮັບຈາກຄະນະແມ່ຍິງຊຸດເກົ່າ 11,600,000 ກີບ;

ໂດຍອີງໃສ່ມາດຖານເງື່ອນໄຂໃນການຈັດຕັ້ງປະຕິບັດເນື້ອໃນຄໍາຂັວນ ແລະ ຂໍ້ແຂ່ງຂັນ 3 ດີຂອງສະຫະພັນແມ່ຍິງລາວ  ສະຫະພັນແມ່ຍິງຮາກຖານສະພາປະຊາຊົນແຂວງ ສາມາດປະເມີນການຈັດຕັ້ງປະຕິບັດຂໍ້ແຂ່ງຂັນ 3 ດີ ໄດ້ຕາມລະດັບຄາດໝາຍທີ່ວາງໄວ້ຄື ພົນລະເມືອງດີກວມ 100%, ພັດທະນາດີກວມ 98%, ສ້າງຄອບຄົວດີ 98%, ປະເມີນຄອບຄົວຕົວແບບໄດ້ 7 ຄອບຄົວ,

ໃນໂອກາດດຽວກັນທ່ານ  ນາງ ເກສອນ ແສງຍະວົງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ , ປະທານຄະນະກຳມະການວັດທະນະທຳສັງຄົມ ແລະ ບັນດາເຜົ່າ, ຄະນະບໍລິຫານສະຫະພັນແມ່ຍິງແຂວງໄດ້ມອບໃບຢັ້ງຍືນ 3 ດີ ໃຫ້ໜ່ວຍສະຫະພັນແມ່ຍິງຮາກຖານສະພາປະຊາຊົນແຂວງເປັນໜ່ວຍ 3 ດີ ຮອບທີ III ປະຈຳປີ 2023 ແລະ ເພື່ອເປັນການສືບຕໍ່ທິດທາງແຜນການໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ໃນຕໍ່ໜ້າ ສະມາຊິກພາຍໃນໜ່ວຍໄດ້ພ້ອມກັນຈັບມືແຂ່ງຂັນພ້ອມທັງໃຫ້ຄຳປະຕິຍານຕໍ່ກອງປະຊຸມຈະພ້ອມກັນສູ້ຊົນສືບຕໍ່ຮັກສາມູນເຊື້ອສ້າງພົນລະເມືອງດີໃຫ້ໄດ້ 100%, ພັດທະນາດີໃຫ້ໄດ້100%, ສ້າງຄອບຄົວດີໃຫ້ໄດ້100%.