ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 4 ມີນາ 2022 ທີ່ສະພາແຫ່ງຊາດ ໄດ້ມີກອງປະຊຸມສະຫລຸບການເຄື່ຶອນໄຫວວຽກງານ ປະຈຳປີ 2021 ແລະ ມີພິທີມອບ-ຮັບທຸງໄຊ ແລະ ໃບຍ້ອງຍໍ ໃຫ້ແກ່ສະຫະພັນແມ່ຍິງສະພາແຫ່ງຊາດ ໂດຍການເປັນປະທານຂອງສະຫາຍ ນາງ ມະນີວັນ ເຍຍປາວເຮີ ຮອງປະທານກຳມາທິການວັດທະນະທຳ-ສັງຄົມ ທັງເປັນປະທານຄະນະບໍລິຫານງານແມ່ຍິງສະພາແຫ່ງຊາດ; ມີສະຫາຍ ປອ. ນາງ ສູນທອນ ໄຊຍະຈັກ ຮອງເລຂາຄະນະບໍລິຫານງານພັກ, ຮອງປະທານສະພາແຫ່ງຊາດ, ສະຫາຍ ນາງ ສິລິກິດ ບຸບຜາ ຮອງປະທານສູນກາງສະຫະພັນແມ່ຍິງລາວ; ມີຕາງຫນ້າອົງການຈັດຕັ້ງມະຫາຊົນ, ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້, ເພື່ອເປັນການສະຫລຸບການເຄື່ອນໄຫວວຽກງານຂອງອົງການຈັດຕັ້ງສະຫະພັນແມ່ຍິງສະພາແຫ່ງຊາດ ແລະ ວາງທິດທາງແຜນການໃນຕໍ່ໜ້າ ໃຫ້ກ້າວໄປສູ່ຄຸນນະພາບ, ມີປະສິດທິພາບສູງກວ່າເກົ່າ ແລະ ມີການເຕີບໃຫຍ່ຂະຫຍາຍຕົວຂຶ້ນເລື້ອຍໆ ທັງເປັນການຈັດຕັ້ງພິທີການຍ້ອງຍໍເປັນທາງການທົ່ວສະພາແຫ່ງຊາດ ທີ່ສະຫະພັນແມ່ຍິງສະພາແຫ່ງຊາດໄດ້ຮັບການຍ້ອງຍໍຊົມເຊີຍລວມໝູ່ ແລະ ບຸກຄົນ ເປັນຕົ້ນການຍ້ອງຍໍໃຫ້ຄະນະພັກ, ຄະນະປະຈຳສະພາແຫ່ງຊາດ ທີ່ມີຜົນງານດີເດັ່ນໃນການຊີ້ນຳ-ນຳພາການຈັດຕັ້ງປະຕິບັດຂໍ້ແຂ່ງຂັນ 3 ດີ ສະໄໝທີ VII (2016-2020) ແລະ ການມອບທຸງໄຊ 3 ດີ ລວມໝູ່ດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 3 ດີ; ຍ້ອງຍໍ ແລະ ຊົມເຊີຍບຸກຄົນທີ່ມີຜົນງານດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ທັງເປັນການສືບຕໍ່ປຸກລະດົມນ້ຳໃຈຟົດຟື້ນໃນການເຄື່ອນໄຫວໃນຕໍ່ໜ້າຂອງສະຫະພັນແມ່ຍິງ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ສະໄໝທີ VIII ແລະ ມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກແຫ່ງຊາດ ໃຫ້ເປັນຂະບວນຟົດຟື້ນ ຕິດພັນກັບການຈັດຕັ້ງປະຕິບັດຂໍ້ແຂ່ງຂັນ “ຮັກຊາດ ແລະ ພັດທະນາ” ແລະ “ຂໍ້ແຂ່ງຂັນ 3 ດີ” ຂອງສະຫະພັນແມ່ລາວໃຫ້ເປັນຮູບປະທຳຕົວຈິງໃນແຕ່ລະໄລຍະ.
ໂອກາດດຽວກັນ, ຍັງໄດ້ຮັບຟັງການໂອ້ລົມຈາກສະຫາຍ ປອ. ນາງ ສູນທອນ ໄຊຍະຈັກ ເຊິ່ງທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ສະຫະພັນແມ່ຍິງສະພາແຫ່ງຊາດຍາດມາໄດ້ໄລຍະຜ່ານມາ ພ້ອມທັງເນັ້ນໜັກໃຫ້ເອົາໃຈໃສ່ສືບຕໍ່ຈັດຕັ້ງປະຕິບັດຄຳຂວັນ, ຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ ຕິດພັນກັບຂະບວນການຮັກຊາດ ແລະ ພັດທະນາໃຫ້ບັນລຸຕາມຄາດໝາຍ.
ໃນວັນດຽວກັນ, ຍັງໄດ້ມີການເປີດພິທີສະເຫລີມສະຫລອງວັນແມ່ຍິງສາກົນ ຄົບຮອບ 112 ປີ ພາຍໃຕ້ຄຳຂວັນ “ຄວາມສະເໜີພາບຍິງ-ຊາຍ ໃນມື້ນີ້ ເພື່ອຄວາມຍືນຍົງໃນອະນາຄົດ” ເຊິ່ງຈັດໂດຍກອງທຶນຊ່ວຍເຫລືອສັງຄົມສະພາແຫ່ງຊາດ ຮ່ວມກັບສະຫະພັນແມ່ຍິງສະພາແຫ່ງຊາດ ໄດ້ມີການຈັດງານຕະຫລາດນັດ ພາຍໃນງານມີກິດຈະ ກຳສະແດງຮູບພາບການເຄື່ອນໄຫວ, ການຈັດຈຳໜ່າຍສິນຄ້າກະສິກຳ, ຫັດຖະກຳ, ເທດສະການອາຫານລາວ ແລະ ອື່ນໆ.

(ພາບ ແລະ ຂ່າວ:​ ອາລິນ ສຸພິມມະປະດິດ)