ຕອນເຊົ້າຂອງວັນສຸກ, ວັນທີ 21 ເມສາ 2023 ນີ້ ຢູ່ທີ່ຫ້ອງປະຊຸມພະແນກພາຍໃນແຂວງ ກອງປະຊຸມສະຫລຸບການເຄື່ອນໄຫວຈັດຕັ້ງປະຕິບັດຂໍ້ແຂ່ງຂັນຍ້ອງຍໍ ຮັກຊາດ ແລະ ພັດທະນາ 5 ປີ(2016–2020) ຈັດຂຶ້ນຢ່າງເປັນທາງການ, ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ມີບັນດາທ່ານໃນຄະນະປະຈໍາສະພາປະຊາຊົນແຂວງ, ອາດີດຄະນະພັກ, ຄະນະນຳສະພາປະຊາຊົນແຂວງ, ຕາງຫນ້າພະແນກການອ້ອມຂ້າງແຂວງ ແລະ ພະນັກງານ-ລັດຖະກອນ ພາຍໃນສະພາປະຊາຊົນແຂວງອຸດົມໄຊ ເຂົ້າຮ່ວມຢ່າງພ້ອມພຽງ.
ໃນກອງປະຊຸມທ່ານນາງ ວັນສີ ພວງມະໄລ ກໍາມະການປະຈໍາ, ເລຂາທິການສະພາປະຊາຊົນແຂວງ ໄດ້ຜ່ານບົດສະຫລຸບຕີລາຄາຄືນຜົນການເຄື່ອນໄຫວຈັດຕັ້ງປະຕິບັດເນື້ອໃນຂໍ້ແຂ່ງຂັນ ຍ້ອງຍໍ ຮັກຊາດ ແລະ ພັດທະນາ ໃນຕະຫລອດໄລຍະ 5 ປີຜ່ານມາ(2016–2020), ໂດຍຍົກໃຫ້ເຫັນເຖິງຜົນສໍາເລັດຂອງວຽກງານແຕ່ລະດ້ານລວມທັງດ້ານອ່ອນ-ຂໍ້ຄົງຄ້າງຈຳນວນຫນຶ່ງ. ຜົນສຳເລັດສະແດງອອກຄື: ເຮັດໃຫ້ກົມກອງ ແລະ ບຸກຄົນໄດ້ຮັບການຍ້ອງຍໍຂັ້ນຕ່າງໆ ເປັນຕົ້ນແມ່ນໄດ້ຮັບຫລຽນໄຊແຮງງານ ຊັ້ນ I ຈຳນວນ 2 ທ່ານ ແລະ 1 ກົມກອງ, ຫລຽນໄຊແຮງງານຊັ້ນ III ຈໍານວນ 15 ທ່ານ, ຍິງ 8 ທ່ານ, ໄດ້ຮັບຫລຽນກາແຮງງານ ຈຳນວນ 5 ທ່ານ ແລະ ໄດ້ຮັບໃບຍ້ອງຍໍຂອງລັດຖະບານ ຈຳນວນ 12 ທ່ານ, ຍິງ 5 ທ່ານ, ໃຫ້ກຽດປະດັບຫລຽນ ແລະ ມອບໃບຍ້ອງຍໍ ໂດຍ ທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ ແລະ ທ່ານ ຄຳເຜີຍ ງອນວັນຄຳ ກຳມະການປະຈຳພັກແຂວງ, ຮອງປະທານສະພາປະຊາຊົນແຂວງ ພັດປ່ຽນກັນມອບ.
ກອງປະຊຸມ, ຍັງມີການມອບໃບຍ້ອງຍໍ ແລະ ໃບຊົມເຊີຍ ຂັ້ນແຂວງໃຫ້ຜູ້ທີ່ມີຜົນງານ ປະຈໍາປີ 2022 ແກ່ພະນັກງານຜູ້ທີ່ດີເດັ່ນໃນການເຄື່ອນໄຫວປະກອບສ່ວນເຫື່ອແຮງ ເຂົ້າໃນວຽກງານປົກປັກຮັກສາ ແລະ ສ້າງສາປະເທດຊາດ ເຊິ່ງມີຜູ້ທີ່ໄດ້ຮັບໃບຍ້ອງຍໍ ຈຳນວນ 13 ທ່ານ, ຍິງ 9 ທ່ານ ແລະ ໄດ້ຮັບໃບຊົມເຊີຍ ຈຳນວນ 25 ທ່ານ, ຍິງ 7 ທ່ານ, ໃຫ້ກຽດມອບ ໂດຍ ທ່ານ ນາງ ຄຳພອນ ພິມມະຈັນ ຮອງປະທານສະພາປະຊາຊົນແຂວງ, ໂອກາດດັ່ງກ່າວ ໄດ້ມີການຜ່ານແຜນການຂອງເນື້ອໃນຂໍ້ແຂ່ງຂັນ ຍ້ອງຍໍ ຮັກາຊາດ ແລະ ພັດທະນາ ແຕ່ນີ້ ຮອດປີ 2025 ພ້ອມທັງປະກາດ ແລະ ຈັບມືແຂ່ງຂັນ ຢ່າງເປັນທາງການ.
ຕອນທ້າຍກອງປະຊຸມທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນ ແຂວງອຸດົມໄຊ ໄດ້ມີຄຳເຫັນໂອ້ລົມ ທັງເປັນການຊີ້ນຳບາງດ້ານຕໍ່ກັບ ການເຄື່ອນໄຫວຈັດຕັ້ງປະຕິບັດເນື້ອໃນຂໍ້ແຂ່ງຂັນ ຍ້ອງຍໍ ຮັກຊາດ ແລະ ພັດທະນາ ໃນຕໍ່ຫນ້າເພື່ອເຮັດໃຫ້ວຽກງານ ໄດ້ຮັບຜົນສຳເລັດ ແລະ ບັນລຸຕາມລະດັບຄາດຫມາຍ, ພ້ອມນັ້ນ, ທ່ານນາງ ວັນສີ ພວງມະໄລ ກໍາມະການປະຈໍາ, ເລຂາທິການສະພາປະຊາຊົນແຂວງ ໄດ້ຕາງໜ້າພະນັກງານ-ລັດຖະກອນ ພາຍໃນສະພາປະຊາຊົນແຂວງອຸດົມໄຊ ຂຶ້ນຮັບເອົາຄຳເຫັນໂອ້ລົມດັ່ງກ່າວ.
ພາບ/ຂາວ: ແສງພອນ ອິນນະລົງ.