ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 22 ຫາ 25 ມີນາ 2022 ນີ້, ທ່ານ ສີວອນ ວົງຄຳຈັນກຳມະການພັກແຂວງ ສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງນ້ຳບາກ, ຫົວໜ້າພະແນກກະສິກຳ ແລະ ປ່າໄມ້ແຂວງ ໄດ້ໃຫ້ກຽດລົງເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນແຂວງ ຊຸດທີ II ຢູ່ 05 ບ້ານຂອງເມືອງນ້ຳບາກ ແຂວງຫຼວງພະບາງ ຄື: ບ້ານຫ້ວຍທອງ (ກຸ່ມນ້ຳສັດ), ບ້ານກິ່ວຫາ (ກຸ່ມນ້ຳສັດ), ບ້ານໜອງແກ້ວ(ກຸ່ມເມືອງແຕງ), ບ້ານຄົກນາງ (ກຸ່ມເມືອງແຕງ), ບ້ານໂພນສະຫວັນ (ກຸ່ມນ້ຳຖ້ວມ) ເມືອງນ້ຳບາກ. ເຊິ່ງໃຫ້ກຽດຕ້ອນຮັບການລົງເຜີຍແຜ່ໃນຄັ້ງນີ້ ມີຜູ້ຊີ້ນຳບ້ານຂອງແຕ່ລະບ້ານ, ພະນັກງານບຳນານ, ເລຂາພັກ-ນາຍບ້ານ ຕະຫຼອດຮອດ ປະຊາຊົນບັນດາເຜົ່າ ຜູ້ທີ່ມີອາຍຸຕັ້ງແຕ່ 18 ປີ ຈຳນວນ 05 ບ້ານເຂົ້າຮ່ວມຮັບຟັງທັງໝົດ 620 ຄົນ, ຍິງ 343 ຄົນ. ການລົງເຜີຍແຜ່ເອກະສານແຕ່ລະຈຸດນັ້ນ, ສະຫາຍເລຂາໜ່ວຍພັກບ້ານ-ນາຍບ້ານ ໄດ້ຂຶ້ນລາຍງານສະພາບການພັດທະນາເສດຖະກິດ-ສັງຄົມ ໃນໄລຍະ 1 ປີ (2021) ຜ່ານມາ ແລະ ທິດທາງແຜນການ 1 ປີ (2022) ໂດຍຫຍໍ້ ເຊິ່ງໄດ້ຍົກໃຫ້ເຫັນສະພາບການພັດທະນາເສດຖະກິດ – ສັງຄົມພາຍໃນບ້ານ ໄດ້ຮັບການພັດທະນານັບມື້ນັບດີຂຶ້ນ, ສັງຄົມມີຄວາມສະຫງົບ, ຊີວິດການເປັນຢູ່ ຂອງປະຊາຊົນບັນດາເຜົ່າ ນັບມື້ນນັບດີຂຶ້ນເປັນກ້າວໆ. ທ່ານ ກໍ່ໄດ້ສະແດງຄໍາຍ້ອງຍໍຊົມເຊີຍບັນດາຜົນສໍາເລັດທີ່ແຕ່ລະບ້ານສາມາດບ້ານຍາດມາໄດ້ນັ້ນ, ຈາກນັ້ນທ່ານ ກໍ່ໄດ້ໃຫ້ກຽດເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນແຂວງຊຸດທີ II

ຢູ່ 05 ບ້ານເປົ້າໝາຍ ກໍ່ໄດ້ສະແດງຄວາມຂອບໃຈຕໍ່ຕາງໜ້າອົງການປົກຄອງບ້ານ ຂອງແຕ່ລະບ້ານ ທີ່ໄດ້ໃຫ້ກຽດຕ້ອນຮັບການລົງເຮັດວຽກໃນຄັ້ງນີ້. ພາຍຫຼັງທີ່ສຳເລັດໃນການເຜີຍແຜ່ເອກະສານແລ້ວ, ກໍ່ໄດ້ເປີດໃຫ້ໂອກາດເລຂາພັກ-ນາຍບ້ານ ແລະ ປະຊາຊົນບັນດາເຜົ່າ ໄດ້ມີຄຳຄິດ, ຄຳເຫັນ ຕໍ່ກັບວຽກງານພັດທະນາເສດຖະກິດ-ສັງຄົມ, ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍໃນໄລຍະຜ່ານມາ ແລະ ຄຳສະເໜີຕ່າງໆ ເພື່ອຈະນໍາໄປສະເໜີ ຕໍ່ກອງປະຊຸມສະພາປະຊາຊົນຂັ້ນແຂວງພິຈາລະນາ. ຕອນທ້າຍ ທ່ານ ສີວອນ ວົງຄຳຈັນ ກຳມະການພັກແຂວງສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງນ້ຳບາກ, ຫົວໜ້າພະແນກກະສິກຳ ແລະ ປ່າໄມ້ແຂວງ ໍ່ໄດ້ຊີ້ແຈງບາງຂໍ້ສະເໜີ ຫຼື ຂໍ້ຊັກຖາມ ຂອງປະຊາຊົນ, ເຊິ່ງຂໍ້ຊັກຖາມຂອງປະຊາຊົນຈຳນວນໜຶ່ງທີ່ພົວພັນກັບພະແນກການ ຂອງແຂວງ ແລະ ເມືອງນ້ຳບາກກໍ່ໄດ້ບັນທຶກໄວ້ ເພື່ອນຳໄປສົມທົບກັບພະແນກການ ແລະ ເມືອງນ້ຳບາກ ເພື່ອພິຈາລະນາ, ຄົ້ນຄ້ວາ ແລະ ແກ້ໄຂ ພ້ອມທັງມີຄຳຕອບທີ່ຊັດເຈນ ແລະ ເປັນລາຍລັກອັກສອນໃຫ້ແກ່ປະຊາຊົນຕາມເວລາອັນຄວນ.

ຂຽນໂດຍ: ສິງຄຳ ອິນທະວົງ