(ສພຊ) ເພື່ອປະຕິບັດສິດ ແລະ ໜ້າທີ່ຂອງ ສະມາຊິກສະພາແຫ່ງຊາດ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ, ລາຍງານການເຄື່ອນໄຫວວຽກງານໄລຍະຜ່ານມາ ຕໍ່ຜູ້ມີສິດເລືອກຕັ້ງ ໂດຍສະເພາະ ແມ່ນລາຍງານຜົນສຳເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ຢ້ຽມຢາມຖາມຂ່າວ, ຮັບຟັງຄວາມຄິດຄວາມເຫັນ ຄວາມມຸ່ງມາດປາຖະໜາຂອງປະຊາຊົນລາວບັນດາເຜົ່າ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດນັ້ນ, ໃນລະຫວ່າງວັນທີ 11-14 ກຸມພາ 2023 ທ່ານ ສຸບັນ ສະວະບຸດ ກໍາມະການຄະນະປະຈຳສະພາແຫ່ງຊາດ, ປະທານກຳມາທິການວຽກງານສະມາຊິກສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 14 ແຂວງສາລະວັນ ໄດ້ລົງເຄື່ອນໄຫວພົບປະກັບປະຊາຊົນ ຢູ່ເມືອງສະໝ້ວຍ, ເມືອງຕຸ້ມລານ ແຂວງສາລະວັນ ໂດຍມີທ່ານ ຂັນໄຊ ລັດຖະເຮົ້າ ຮອງປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ທັງເປັນຮອງປະທານສະພາປະຊາຊົນແຂວງ, ມີສະມາຊິກສະພາແຫ່ງຊາດ ແລະ ບັນດາທ່ານສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງດັ່ງກ່າວ ເຂົ້າຮ່ວມ.

ການລົງພົບປະຄັ້ງນີ້ ແມ່ນໄດ້ເຄື່ອນໄຫວຢູ່ 2 ເມືອງ, 7 ຈຸດ ຄື: ຈຸດດ່ານສາກົນລະໄລ, ຈຸດສຸມທີ 3 ອາວາວ, ຈຸດສຸມທີ 5 ອາຈາ ເມືອງສະໝ້ວຍ; ສຳລັບເມືອງຕຸ້ມລານ ມີ 3 ຈຸດຄື: ຈຸດຫ້ອງວ່າການເມືອງ, ບ້ານນາຮ່ອງນ້ອຍ, ບ້ານບອຍນ້ຳ ແລະ ບ້ານວັງລີ ເຊິ່ງມີຄະນະພັກເມືອງ, ຄະນະພັກຮາກຖານກຸ່ມບ້ານ, ອົງການຈັດຕັ້ງບ້ານ, ພະນັກງານ-ລັດຖະກອນ, ພະນັກງານອາວຸໂສບຳນານ, ທະຫານ-ຕຳຫຼວດ, ເຖົ້າແກ່ແນວໂຮມ, ພໍ່ແມ່ປະຊາຊົນ, ຄູ ແລະ ນັກຮຽນ ເຂົ້າຮ່ວມ ຈໍານວນທັງໝົດ 590 ຄົນ, ຍິງ 178 ຄົນ. ການລົງພົບປະໃນແຕ່ລະຈຸດ ແມ່ນໄດ້ຮັບຟັງການລາຍງານໂດຍຫຍໍ້ ກ່ຽວກັບສະພາບການພັດທະນາເສດຖະກິດ-ສັງຄົມ ຂອງເມືອງ ແລະ ບ້ານ. ພ້ອມດຽວກັນນັ້ນ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍໄດ້ຜັດປ່ຽນກັນເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ເປັນຕົ້ນແມ່ນເຜີຍແຜ່ບັນດາເນື້ອໃນມະຕິກອງປະຊຸມສະພາແຫ່ງຊາດ ແລະ ສະພາປະຊາຊົນແຂວງສາລະວັນ, ແນວທາງຂອງພັກ, ນະໂຍບາຍຂອງລັດ ຕິດພັນກັບ 2 ວາລະແຫ່ງຊາດ ໃຫ້ບັນດາເປົ້າໝາຍເຂົ້າຮ່ວມໄດ້ຮັບຮູ້ ແລະ ເຂົ້າໃຈ. ນອກຈາກນັ້ນ ກໍໄດ້ເປີດໂອກາດໃຫ້ພໍ່ແມ່ປະຊາຊົນ ໄດ້ສະແດງຄວາມຄິດຄວາມເຫັນ ແລະ ຂໍ້ສະເໜີຕ່າງໆ ຕໍ່ຜູ້ແທນຂອງຕົນ ເພື່ອນຳໄປຄົ້ນຄວ້າສະເໜີພາກສ່ວນກ່ຽວຂ້ອງ ແກ້ໄຂຕາມລະບຽບການ ເຊິ່ງຂໍ້ສະເໜີຕ່າງໆ ແມ່ນພົວພັນກັບອັນລວມ ແລະ ຊີວິດການເປັນຢູ່ຂອງປະຊາຊົນ ເປັນຕົ້ນ: ການສ້າງເສັ້ນທາງເຂົ້າບ້ານ, ນ້ຳສະອາດ, ສາທາລະນະສຸກ, ໄຟຟ້າ ແລະ ອື່ນໆ.

ຜ່ານການສະເໜີຂອງປະຊາຊົນຂ້າງເທິງນັ້ນ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ຕາງໜ້າຂະແໜງການກ່ຽວຂ້ອງທີ່ເຂົ້າຮ່ວມຢູ່ໃນຄະນະ ກໍໄດ້ໃຫ້ການຊີ້ແຈງ, ອະທິບາຍໄປຕາມແຜນການຂອງລັດຖະບານ ກໍຄືຂອງແຂວງ ແລະ ເມືອງວາງອອກ ໂດຍຕິດພັນກັບເນື້ອໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງສາລະວັນ ຊຸດທີ II ເຊິ່ງໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍໃນການພັດທະນາເສດຖະກິດ-ສັງຄົມ ຂອງປະເທດໃນປັດຈຸບັນ ໂດຍສະເພາະຄວາມຫຍຸ້ງຍາກດ້ານເສດຖະກິດ-ການເງິນ ເປັນຕົ້ນ: ລາຄານຳ້ມັນແພງ, ອັດຕາເງິນເຟີ້, ລາຄາສິນຄ້າເພີ່ມຂຶ້ນ ແລະ ອື່ນໆ, ຍົກໃຫ້ເຫັນນະໂຍບາຍ, ມາດຕະການທີ່ລັດຖະບານ ກໍຄືທ້ອງຖິ່ນວາງອອກ ເພື່ອສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ທີ່ລັດຖະບານກຳນົດ ໃຫ້ມີຜົນສຳເລັດ. ພ້ອມດຽວກັນນັ້ນ, ກໍໄດ້ຮຽກຮ້ອງໃຫ້ຄະນະພັກ, ອົງການປົກຄອງ ແລະ ປະຊາຊົນລາວບັນດາເຜົ່າ ຈົ່ງໄດ້ເປັນເຈົ້າການເຂົ້າຮ່ວມ, ປະກອບສ່ວນຈັດຕັ້ງປະຕິບັດຮ່ວມກັບພັກ-ລັດ ເປັນຕົ້ນ: ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ປະຕິບັດ 2 ວາລະແຫ່ງຊາດ, ເປັນເຈົ້າການໃນວຽກງານປ້ອງກັນຊາດ-ປ້ອງກັນຄວາມສະຫງົບ, ເພີ່ມທະວີການເຕົ້າໂຮມຄວາມສາມັກຄີບັນດາເຜົ່າໃຫ້ເປັນປຶກແຜ່ນ, ສືບຕໍ່ເສີມຂະຫຍາຍ ແລະ ຮັກສາມູນເຊື້ອຮີດຄອງປະເພນີອັນດີງາມຂອງເຜົ່າ, ຂອງທ້ອງຖິ່ນ ແລະ ຂອງຊາດ, ປະຕິບັດສິດ ແລະ ພັນທະຂອງພົນລະເມືອງໃຫ້ຄົບຖ້ວນ ຕາມທີ່ໄດ້ກຳນົດໃນລັດຖະທຳມະນູນ ແລະ ກົດໝາຍ, ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງຂຶ້ນຢ່າງບໍ່ຢຸດຢັ້ງ.

ໃນການເຄື່ອນໄຫວພົບປະປະຊາຊົນຄັ້ງນີ້, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຍັງໄດ້ນຳເອົາອຸປະກອນການຮຽນ ແລະ ອຸປະກອນກິລາ ຈຳນວນໜຶ່ງ ທີ່ລະດົມໄດ້ຈາກຜູ້ປະກອບການ ໄປມອບໃຫ້ໂຮງຮຽນ ແລະ ຈຸດໂຮງໂຮຽນທີ່ມີນັກຮຽນທຸກຍາກຂາດເຂີນ.

(ຂ່າວ: ຄຳແດງ ອິນທະສັກ; ພາບ: ນາງ ຄັດສອນ ຮຸ່ງສະຫວ່າງ)