ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ລະຫວ່າງວັນທີ 12-15 ກັນຍາ 2022, ທ່ານ ສຸບັນ ສະວະບຸດ ຄະນະປະຈຳສະພາແຫ່ງຊາດ, ປະທານກຳມາທິການວຽກງານສະມາຊິກສະພາແຫ່ງຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 14 ແຂວງສາລະວັນ ໄດ້ລົງເຄື່ອນໄຫວພົບປະກັບປະຊາຊົນ ຢູ່ເມືອງສາລະວັນ, ເມືອງເລົ່າງາມ ແລະ ເມືອງວາປີ ແຂວງສາລະວັນ ໂດຍມີທ່ານ ຂັນໄຊ ລັດຖະເຮົ້າ ຮອງປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ທັງເປັນຮອງປະທານສະພາປະຊາຊົນແຂວງ ແລະ ບັນດາທ່ານສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງດັ່ງກ່າວ ເຂົ້າຮ່ວມ.
ການລົງພົບປະກັບຜູ້ມີສິດເລືອກຕັ້ງຄັ້ງນີ້ ແມ່ນປະຕິບັດຕາມສິດ ແລະ ໜ້າທີ່ຂອງສະມາຊິກສະພາແຫ່ງຊາດ ທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ແລະ ເພື່ອລາຍງານການເຄື່ອນໄຫວປະຕິບັດສິດ ແລະ ໜ້າທີ່ ໄລຍະຜ່ານມາຂອງສະມາຊິກສະພາແຫ່ງຊາດ ຕໍ່ຜູ້ມີສິດເລືອກຕັ້ງ ໂດຍສະເພາະແມ່ນລາຍງານຜົນສຳເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ຢ້ຽມຢາມຖາມຂ່າວ, ຮັບຟັງຄໍາຄິດຄໍາເຫັນ ຄວາມມຸ່ງມາດປາຖະໜາຂອງປະຊາຊົນລາວບັນດາເຜົ່າ.
ການລົງພົບປະ ແມ່ນໄດ້ເຄື່ອນໄຫວຢູ່ 6 ຈຸດ ຄື: ຈຸດບ້ານກະຊະ, ສະໂມສອນຫ້ອງວ່າການເມືອງເລົ່າງາມ, ກອງບັນຊາການທະຫານແຂວງ, ຈຸດບ້ານໜອງບົວນ້ອຍ ເມືອງສາລະວັນ, ສະໂມສອນຫ້ອງວ່າການເມືອງວາປີ ແລະ ຈຸດບ້ານສະພາດ ເມືອງວາປີ ເຊິ່ງມີຄະນະພັກເມືອງ, ຄະນະພັກຮາກຖານເຂດກຸ່ມບ້ານ, ອົງການຈັດຕັ້ງບ້ານ, ພະນັກງານ-ລັດຖະກອນ, ພະນັກງານອາວຸໂສບຳນານ, ທະຫານ-ຕຳຫຼວດ, ເຖົ້າແກ່ແນວໂຮມ, ພໍ່ແມ່ປະຊາຊົນ, ຄູ ແລະ ນັກຮຽນ ເຂົ້າຮ່ວມ ຈໍານວນ 831 ຄົນ ຍິງ 318 ຄົນ. ຜ່ານການລົງພົບປະໃນແຕ່ລະຈຸດ ໄດ້ຮັບຟັງການລາຍງານສະພາບການພັດທະນາເສດຖະກິດ-ສັງຄົມພາຍໃນບ້ານ. ພ້ອມກັນນັ້ນ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ເປັນຕົ້ນແມ່ນບັນດາເນື້ອໃນມະຕິກອງປະຊຸມສະພາແຫ່ງຊາດ ແລະ ສະພາປະຊາຊົນແຂວງສາລະວັນ, ແນວທາງຂອງພັກ, ນະໂຍບາຍຂອງລັດ ໂດຍຕິດພັນກັບ 2 ວາລະແຫ່ງຊາດ ໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈ. ຈາກນັ້ນ, ກໍໄດ້ເປີດໂອກາດໃຫ້ພໍ່ແມ່ປະຊາຊົນ ໄດ້ມີຄຳເຫັນ ແລະ ຂໍ້ສະເໜີຕ່າງໆ ເຊິ່ງຂໍ້ສະເໜີດັ່ງກ່າວແມ່ນພົວພັນກັບຊີວິດການເປັນຢູ່ຂອງປະຊາຊົນ ເປັນຕົ້ນ: ການສ້າງເສັ້ນທາງເຂົ້າບ້ານ, ຂໍງົບປະມານສ້າງໂຮງຮຽນ, ສ້າງ ຂົວຂ້າມນ້ຳຫ້ວຍ ແລະ ອື່ນໆ.
ຜ່ານການສະເໜີຂອງປະຊາຊົນ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍໄດ້ໃຫ້ການຊີ້ແຈງ, ອະທິບາຍໄປຕາມແຜນການຂອງລັດຖະບານ ກໍຄືຂອງແຂວງ ແລະ ເມືອງ ຕິດພັນກັບເນື້ອໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງສາລະວັນ ຊຸດທີ II ເຊິ່ງຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍໃນການພັດທະນາເສດຖະກິດ-ສັງຄົມ ຂອງປະເທດເຮົາໃນປັດຈຸບັນ ໂດຍສະເພາະ ລາຄານຳ້ມັນ, ໄພເງິນເຟີ້, ລາຄາສິນຄ້າເພີ່ມຂຶ້ນ, ໄພທໍາມະຊາດ ແລະ ອື່ນໆ, ຍົກໃຫ້ເຫັນນະໂຍບາຍ, ມາດຕະການທີ່ລັດຖະບານ ກໍຄືທ້ອງຖິ່ນວາງອອກ ເພື່ອສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ທີ່ລັດຖະບານກຳນົດ ໃຫ້ມີຜົນສຳເລັດ. ພ້ອມດຽວກັນນັ້ນ, ກໍໄດ້ຮຽກຮ້ອງໃຫ້ຄະນະພັກ, ອົງການປົກຄອງ ແລະ ປະຊາຊົນລາວບັນດາເຜົ່າ ຈົ່ງໄດ້ເປັນເຈົ້າການເຂົ້າຮ່ວມ, ປະກອບສ່ວນຈັດຕັ້ງປະຕິບັດຮ່ວມກັບພັກ-ລັດ ເປັນຕົ້ນ: ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ປະຕິບັດ 2 ວາລະແຫ່ງຊາດ, ເປັນເຈົ້າການໃນວຽກງານປ້ອງກັນຊາດ-ປ້ອງກັນຄວາມສະຫງົບ, ເພີ່ມທະວີການເຕົ້າໂຮມຄວາມສາມັກຄີບັນດາເຜົ່າໃຫ້ເປັນປຶກແຜ່ນ, ສືບຕໍ່ເສີມຂະຫຍາຍ ແລະ ຮັກສາມູນເຊື້ອຮີດຄອງປະເພນີອັນດີງາມຂອງເຜົ່າ, ທ້ອງຖິ່ນ ແລະ ຂອງຊາດ, ປະຕິບັດສິດ ແລະ ພັນທະຂອງພົນລະເມືອງໃຫ້ຄົບຖ້ວນ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງຂຶ້ນຢ່າງບໍ່ຢຸດຢັ້ງ.
(ຂ່າວ: ຄຳແດງ ອິນທະສັກ; ພາບ: ດີລຳພົນ ພົມມະຈັນ)