​ (ສພຊ) ສະມາຊິກສະພາແຫ່ງຊາດ ໄດ້ພິຈາລະນາ, ຮັບຮອງເອົາທ່ານ ວຽງທະວີສອນ ເທບພະຈັນ ເປັນປະທານອົງການກວດສອບແຫ່ງລັດ ຕາມການສະເໜີຂອງທ່ານ ປະທານປະເທດ; ສະມາຊິກສະພາແຫ່ງຊາດ ໄດ້ພິຈາລະນາ, ຮັບຮອງເອົາການສະເໜີຂອງທ່ານ ນາຍົກລັດຖະມົນຕີ ກ່ຽວກັບການພິຈາລະນາແຕ່ງຕັ້ງ ຮອງນາຍົກລັດຖະມົນຕີ ແລະ ສະມາຊິກລັດຖະບານຄື: ທ່ານ ພົນເອກ ວິໄລ ຫຼ້າຄໍາຟອງ ເປັນຮອງນາຍົກລັດຖະມົນຕີ ທັງເປັນລັດຖະມົນຕີກະຊວງປ້ອງກັນຄວາມສະຫງົບ ແລະ ທ່ານ ສະເຫຼີມໄຊ ກົມມະສິດ ເປັນຮອງນາຍົກລັດຖະມົນຕີ ທັງເປັນລັດຖະມົນຕີກະຊວງການຕ່າງປະເທດ ດ້ວຍຄະແນນສຽງເຫັນດີ 147 ສຽງ ກວມເອົາ 99,32%. ຈາກນັ້ນ, ປະທານກອງປະຊຸມ ໄດ້ສືບຕໍ່ສະເໜີ ສະມາຊິກສະພາແຫ່ງຊາດ ລົງຄະແນນສຽງຮັບຮອງເອົາທ່ານ ຄໍາແພງ ໄຊສົມແພງ ເປັນລັດຖະມົນຕີປະຈໍາສໍານັກງານນາຍົກລັດຖະມົນຕີ, ທ່ານ ສອນໄຊ ສິດພະໄຊ ເປັນລັດຖະມົນຕີປະຈໍາສໍານັກງານນາຍົກລັດຖະມົນຕີ, ທ່ານ ມະໄລທອງ ກົມມະສິດ ເປັນລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ ປອ. ບຸນເຫຼືອ ສິນໄຊວໍລະວົງ ເປັນຜູ້ວ່າການທະນາຄານ ແຫ່ງ ສປປລາວ ດ້ວຍຄະແນນສຽງເຫັນດີ 143 ສຽງ ກວມເອົາ 97,27%.

​           ໃນຕອນເຊົ້າວັນທີ 20 ມິຖຸນາ 2022 ນີ້ ໂດຍການເປັນປະທານກອງປະຊຸມຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ.