ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງ ວັນທີ 9 ຫາ 11 ມີນາ 2022 ນີ້ ທ່ານ ປອ ກໍລະກັນ ພົມມະວົງ ຄະນະປະຈຳສະ ພາປະຊາຊົນແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 6, ປະທານ ຄະນະກຳມະການ ວັດທະນະທຳ-ສັງຄົມ ແລະ ບັນດາເຜົ່າ ໄດ້ລົງຈັດຕັ້ງຜັນຂະຫຍາຍຜົນສຳເລັດກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II. ຢູ່ເມືອງ ປາກອູ ແຂວງຫຼວງພະບາງ ລວມທັງໝົດໄດ້ 7 ຈຸດຄື: ສຳນັກເມືອງ ປາກອູ, ບ້ານ ຫ້ວຍແລ, ບ້ານ ຫ້ວຍໝາກ, ບ້ານໂນນສະຫວັນ, ບ້ານ ຫ້ວຍແປນ, ບ້ານ ຜາປົ່ນ ແລະ ບ້ານ ຫາດຂາມ ມີຜູ້ເຂົ້າຮ່ວມຮັບຟັງທັງໝົດ ສີຮ້ອຍກວ່າ ຄົນ, ຍິງ ຮ້ອຍກວ່າ ຄົນ.

ການລົງເຄື່ອນໄຫວວຽກງານໃນຄັ້ງນີ້ ແມ່ນນໍາເອົາເນື້ອໃນຈິດໃຈຂອງກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ແລະ ສະພາປະຊາຊົນແຂວງ ມາເຜີຍແຜ່ໃຫ້ພະນັກງານ-ລັດຖະກອນ, ທະຫານ, ຕຳຫຼວດ ຕະຫຼອດຮອດພໍ່ແມ່ປະຊາຊົນບັນດາເຜົ່າ ພາຍໃນເມືອງໄດ້ຮັບຮູ້ ແລະ ເຂົ້າໃຈຕໍ່ບັນຫາທີ່ສຳຄັນຕ່າງໆ ທີ່ໄດ້ພິຈາລະນາ ແລະ ຮັບຮອງເອົາຢູ່ໃນກອງປະຊຸມຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ພ້ອມທັງໄດ້ຮັບຟັງຄຳຄິດຄຳເຫັນ, ຄຳສະເໜີຂອງຜູ້ມີສິດເລືອກຕັ້ງ ເຊິ່ງເຫັນຫຼາຍບັນຫາທີ່ຕິດພັນກັບວຽກງານແຜນພັດທະນາເສດຖະກິດ-ສັງຄົມ ແລະ ວຽກງານອື່ນໆ ຈຳນວນໜຶ່ງ

       ​ຕອນທ້າຍ ທ່ານ ປອ ກໍລະກັນ ພົມມະວົງ ຄະນະປະຈຳສະພາປະຊາຊົນແຂວງ, ສະມາຊິກສະ ພາແຫ່ງຊາດປະຈຳເຂດເລືອກຕັ້ງທີ 6, ປະທານ ຄະນະກໍາມະການ ວັດທະນະທຳ-ສັງຄົມ ແລະ ບັນດາ ເຜົ່າ ກໍ່ໄດ້ອະທິບາຍຊີ້ແຈງຕໍ່ກັບ ຄໍາສະເໜີຕ່າງໆໃຫ້ຜູ້ມີສິດເລືອກຕັ້ງເຂົ້າໃຈກັບທີ່ ແລະ ຮັບເອົາບາງ ຄໍາ ສະເໜີ ເພື່ອນໍາໄປຊຸກຍູ້ໃຫ້ພາກສ່ວນທີ່ກ່ຽວຂ້ອງຄົ້ນຄວ້າພິຈາລະນາ ແລະ ແກ້ໄຂໃຫ້ຖືກຕ້ອງຕາມລະບຽບກົດໝາຍ, ພ້ອມດຽວກັນນີ້ ທ່ານ ຍັງໄດ້ຮຽກຮ້ອງໃຫ້ອົງການປົກຄອງເມືອງ, ອົງການປົກຄອງບ້ານ ເອົາໃຈໃສ່ຍົກສູງໃນການຈັດຕັ້ງປະຕິບັດ 2 ວາລະແຫ່ງຊາດ ເຊັ່ນ: ວາລະແຫ່ງຊາດ ວ່າດ້ວຍການແກ້ໄຂ ຄວາມຫຍຸ້ງຍາກດ້ານເສດຖະກິດ-ການເງິນ ແລະ ວາລະແຫ່ງຊາດວ່າ ດ້ວຍການແກ້ໄຂບັນຫາຢາເສບ ຕິດໃຫ້ບັນລຸຕາມຈຸດປະສົງ ແລະ ຄາດໝາຍທີ່ວ່າງໄວ້.

ນອກຈາກນີ້ ທ່ານ ຍັງໄດ້ລົງຕິດຕາມກວດກາເບີ່ງ ໂຄງການກໍ່ສ້າງເຂື່ອນໄຟຟ້ານໍ້າຂອງ, ນໍ້າລິນ ແລະ ບໍ່ຄຳ ບ້ານຜາປົນ ເມືອງປາກອູ ແຂວງຫຼວງພະບາງ ຕື່ມອີກ.

ຂຽນໂດຍ: ທ່ານ ຫຸ່ມພັນ ອຳພອນ