ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 (ສພຊ) ໃນຕອນບ່າຍຂອງວັນທີ 5 ກັນຍາ 2022, ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ສະມາຊິກສະພາແຫ່ງ ຊາດປະຈຳເຂດເລືອກຕັ້ງທີ 13 ພ້ອມດ້ວຍສະມາຊິກສະ ພາແຫ່ງຊາດປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນອງ ພ້ອມດ້ວຍຄະນະ ໄດ້ເຜີຍແຜ່ຜົນສຳເລັດກອງປະຊຸມສະໄໝສາ ມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງສະຫວັນນະເຂດ ຊຸດທີ II ແລະ ພົບປະຜູ້ມີສິດເລືອກຕັ້ງ ຢູ່ເຂດໂຮງຮຽນປະຖົມສົມບູນນາກອງເຂດຕຳລວງ, ເມືອງນອງ ແຂວງສະຫວັນນະເຂດ ລວມມີ ປະຊາຊົນ ຈຳນວນ 7 ບ້ານ ມີຜູ້ເຂົ້າຮ່ວມທັງໝົດ 260 ຄົນຍິງ 74 ຄົນ.
ການລົງເຄື່ອນໄຫວເຮັດວຽກຄັ້ງນີ້ ຄະນະ ໄດ້ຮັບຟັງການລາຍງານໂດຍຫຍໍ້ ຈາກຜູ້ຕາງໜ້າຂອງເຂດຕຳລວງ ກ່ຽວກັບການພັດທະນາເສດຖະກິດ-ສັງຄົມ ຮອບດ້ານຂອງກຸ່ມບ້ານໂດຍຫຍໍ້.
ພາຍຫຼັງສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13 ແລະ ຕາງໜ້າສະມາຊິກສະພາປະຊາຊົນແຂວງໄດ້ລາຍງານຫຍໍ້ກ່ຽວກັບຜົນສຳເລັດຂອງ 2 ກອງປະຊຸມແລ້ວ, ທ່ານ ຮອງປະທານສະພາແຫ່ງຊາດ ໄດ້ມີຄໍາເຫັນຊີ້ນຳໃຫ້ແກ່ເຂດຕຳລວງ ໂດຍໄດ້ສະແດງຄວາມຊົມເຊີຍຕໍ່ຄະນະພັກຂອງເຂດຕຳລວງ ທີ່ໄດ້ເອົາໃຈໃສ່ຊີ້ນຳ-ນຳພາ ປະຊາຊົນໃນການສ້າງສາພັດທະນາເຂດຕຳລວງ ແລະ ພ້ອມກັນນັ້ນ ທ່ານຍັງຮຽກຮ້ອງໃຫ້ປະຊາຊົນເອົາໃຈໃສ່ສ້າງເສດຖະກິດຄອບຄົວ ເພື່ອໃຫ້ຫຼຸດພົ້ນອອກຈາກຄວາມທຸກຍາກ, ໃຫ້ຊາວໜຸ່ມຫ່າງໄກຢາເສບຕິດ, ເສີມຂະຫຍາຍທ່າແຮງໃນການປູກພືດ, ສົ່ງເສີມຫັດຖະກຳ , ປູກກ້ວຍ, ມັນຕົ້ນ , ຕໍ່າຫູກທໍໄໝ ໃຫ້ກາຍເປັນສິນຄ້າໜຶ່ງຜະ ລິດຕະພັນຂອງເມືອງ ແລະ ໃຫ້ປະຊາຊົນມີຄວາມເປັນເຈົ້າການໃນການມີຊີວິດທີ່ສະອາດ, ຫັນມານຳໃຊ້ວິດຖ່າຍຫຼາຍຂຶ້ນ ເພື່ອບໍ່ໃຫ້ເກີດພະຍາດຕິດແປດ ພ້ອມທັງຈະຊຸກຍູ້ໃຫ້ ສະພາແຫ່ງຊາດ ຕິດຕາມກວດກາໃຫ້ເປັນປົກ ກະຕິ ເພື່ອພັດທະນາໂຄງລ່າງຂອງບ້ານໃຫ້ຫຼາຍຂຶ້ນ ແລະ ນອກຈາກນັ້ນ ທ່ານຍັງໄດ້ນຳເອົາເນື້ອໃນສຳຄັນຂອງກອງປະຊຸມໃນການຮັບຮອງເອົາການປັບປຸງຄະນະລັດຖະບານ, ແຜນພັດທະນາເສດຖະກິດ-ສັງຄົມ, ງົບປະມານແຫ່ງລັດ, ເງິນຕາ ເຜີຍແຜ່ໃຫ້ປະຊາຊົນຮັບຮູ້ ແລະ ເຂົ້າໃຈ ແລະ ຮຽກຮ້ອງໃຫ້ປະຊາຊົນຈົ່ງສືບຕໍ່ເສີມຂະຫຍາຍ ຄວາມສາມັກຄີຢູ່ຂ້າງພັກ-ລັດ, ສ້າງຄອບຄົວໃຫ້ມີຄວາມຮັ່ງມີ, ປະເທດຊາດຫຼຸດພົ້ນອອກຈາກຄວາມທຸກຍາກ.
ພາຍຫຼັງ ທ່ານ ຮອງປະທານສະພາແຫ່ງຊາດ ມີຄວາມເຫັນແລ້ວ ກໍໄດ້ມີການຕອບຄຳຖາມ, ຂໍ້ສະເໜີຂອງປະຊາຊົນ ຜູ້ມີສິດເລືອກຕັ້ງຢ່າງກົງໄປກົງມາ. ຫຼັງຈາກນັ້ນ, ຄະນະ ຍັງໄດ້ມອບເຄື່ອງອຸປະກອນການສຶກສາ ປື້ມ, ບິກ, ສໍ, ກະເປົາເປ້ ແລະ ອຸປະກອນກິລາຈຳນວນໜຶ່ງ ໃຫ້ກັບໂຮງຮຽນປະຖົມສົມບູນນາກອງ ເຂດຕໍາລວງ.
(ພາບ ແລະ ຂ່າວ: ນາງ ຕາດໍາ ຫ່ານຟ້າ)