ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ລະຫວ່າງວັນທີ 13-16 ກັນຍາ 2022, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 16 ແຂວງເຊກອງ ແລະ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງລະມາມ ພ້ອມດ້ວຍພະນັກງານຂັ້ນແຂວງ, ຂັ້ນເມືອງ ໄດ້ພ້ອມກັນລົງຈັດຕັ້ງຜັນຂະຫຍາຍຜົນສໍາເລັດຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງເຊກອງ ຊຸດທີ II ໂດຍການເປັນປະທານຂອງທ່ານ ປອ. ແພງສີ ສີລາວີ ຄະນະປະຈໍາພັກແຂວງ, ຮອງປະທານຄະນະສະມາຊິກສະພາແຫ່ງຊາດ-ສະມາຊິກສະພາປະຊາຊົນແຂວງ, ທ່ານ ນາງ ທັດສະດາພອນ ຈັນທະມາດ ຮອງປະທານກໍາມາທິການບັນດາເຜົ່າ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16; ມີຄະນະພັກ-ອໍານາດການປົກຄອງເມືອງ, ຄະນະນໍາ, ພະນັກງານ, ທະຫານ, ຕໍາຫຼວດ, ອົງການຈັດຕັ້ງບ້ານ, ເຖົ້າແກ່ແນວໂຮມ ແລະ ພໍ່ແມ່ປະຊາຊົນເຂົ້າຮ່ວມຮັບຟັງຢ່າງພ້ອມພຽງ.
ຜ່ານການລົງພົບປະ ແລະ ຜັນຂະຫຍາຍຜົນສໍາເລັດກອງປະຊຸມ ຢູ່ເມືອງລະມາມ ສາມາດຈັດຕັ້ງປະຕິບັດໄດ້ ທັງໝົດ 7 ຈຸດ, ມີ 10 ເທື່ອບ້ານ, ມີຈໍານວນຜູ້ເຂົ້າຮ່ວມທັງໝົດ 1.100 ເທື່ອຄົນ ຍິງ 350 ເທື່ອຄົນ ເທົ່າກັບ 11% ຂອງຈໍານວນຜູ້ມີສິດເລືອກຕັ້ງ.
ການເຄື່ອນໄຫວໃນຄັ້ງນີ້ ລວມມີ 7 ຈຸດ ເຊິ່ງໄດ້ແບ່ງອອກເປັນສອງທີມ ຄື: ສະໂມສອນເມືອງລະມາມ, ຈຸດບ້ານກະຊັງກາງ, ຈຸດບ້ານຕຸຍດ່ານ ແລະ ຈຸດບ້ານຖໍ້າເດັ້ງ (ບ້ານຕະນຶມ+ບ້ານຮຶງ); ທັງນີ້ ກໍເພື່ອລາຍງານໃຫ້ຜູ້ມີສິດເລືອກຕັ້ງໄດ້ຮັບຊາບການເຄື່ອນໄຫວຂອງສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ເປັນການຊຸກຍູ້ໃຫ້ທຸກພາກສ່ວນປະກອບສ່ວນໃນການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນພັດທະນາຊົນນະບົດ ຕິດພັນກັບການແກ້ໄຂຄວາມທຸກຍາກຂອງປະຊາຊົນ; ຈາກນັ້ນ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງເຊກອງ ຊຸດທີ II ເພື່ອເຮັດໃຫ້ປະຊາຊົນໄດ້ຮັບຮູ້, ເຂົ້າໃຈ ແລະ ກໍາໄດ້ເນື້ອໃນຈິດໃຈການດໍາເນີນກອງປະຊຸມ, ການພິຈາລະນາ ແລະ ຕົກລົງຮັບຮອງບັນຫາສໍາຄັນຂອງຊາດ ແລະ ຂອງແຂວງ.
ພ້ອມນີ້ ກໍເພື່ອເຮັດໃຫ້ປະຊາຊົນໄດ້ຮັບຮູ້ເຖິງພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ, ສະມາຊິກສະພາແຫ່ງຊາດ ແລະ ສະພາປະຊາຊົນແຂວງ, ສະມາຊິກສະພາປະຊາຊົນຂັ້ນແຂວງທີ່ມີຕໍ່ປະຊາຊົນ, ພ້ອມທັງຮັບຟັງຄໍາຄິດຄໍາເຫັນ ແລະ ຄໍາສະເໜີຂອງປະຊາຊົນ ເຊິ່ງເຫັນວ່າມີຂໍ້ຫຍຸ້ງຍາກຫຼາຍດ້ານທີ່ຈະຕ້ອງໄດ້ປັບປຸງແກ້ໄຂ ໂດຍສະເພາະບັນຫາດ້ານພື້ນຖານໂຄງລ່າງ, ບັນຫາດ້ານການສຶກສາ, ບັນຫາດ້ານສາທາລະນະສຸກ, ບັນຫາດ້ານກະສິກໍາ ແລະ ອື່ນໆ. ຫຼັງຈາກນັ້ນ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍໄດ້ມີຄໍາເຫັນຊີ້ນໍາໃນການແກ້ໄຂບັນຫາເບື້ອງຕົ້ນ ແລະ ຮັບເອົາບັນດາຄໍາສະເໜີຂອງປະຊົນ ເພື່ອນໍາໄປສະເໜີຕໍ່ຂະແໜງການທີ່ກ່ຽວຂ້ອງ ເພື່ອຄົ້ນຄວ້າພິຈາລະນາຫາວິທີການແກ້ໄຂໃນຕໍ່ໜ້າ.
ຕອນທ້າຍ ທ່ານ ນາງ ທັດສະດາພອນ ຈັນທະມາດ ກໍໄດ້ໂອ້ລົມຕໍ່ອໍານາດການປົກຄອງບ້ານ ແລະ ພໍ່ແມ່ປະຊາຊົນຜູ້ມີສິດເລືອກຕັ້ງ ທີ່ເຂົ້າຮ່ວມໃນກອງປະຊຸມ ໃຫ້ເອົາໃຈໃສ່ໃນການເຄົາລົບລັດຖະທໍາມະນູນ ແລະ ກົດໝາຍຂອງລັດ ຕ້ອງເຊື່ອມຊຶມຕໍ່ແນວທາງຂອງພັກ-ລັດໃນແຕ່ລະໄລຍະ, ເນັ້ນໃຫ້ຄະນະພັກສອງກໍາລັງປະກອບອາວຸດຂັ້ນບ້ານ, ຄູ-ອາຈານ ແລະ ພໍ່ແມ່ປະຊາຊົນ ຈົ່ງເພີ່ມຄວາມສາມັກຄີປອງດອງ, ມີຄວາມດຸໝັ່ນ, ຊ່ວຍເຫຼືອເຊິ່ງກັນ ແລະ ກັນ ເອົາໃຈໃສ່ສ້າງເສດຖະກິດຄອບຄົວໃຫ້ເຂັ້ມແຂງ ແລະ ຊີວິດການເປັນຢູ່ຂອງພໍ່ແມ່ປະຊາຊົນ ໃຫ້ມີຊີວິດທີ່ດີຂຶ້ນເທື່ອລະກ້າວ ແລະ ຮ່ວມມືກັນຕ້ານ, ຄວບຄຸມ, ຄຽງຄູ່ກັບການປະຕິບັດ 2 ວາລະແຫ່ງຊາດຢ່າງເຂັ້ມງວດ.
ໃນການລົງເຄື່ອນໄຫວຄັ້ງນີ້ຄະນະ ໄດ້ນໍາເອົາອຸປະກອນການຮຽນ-ການສອນ ເຄື່ອງນຸ່ງຫົົ່ມ ແລະ ອຸປະກອນກິລາ ຈໍານວນໜຶ່ງ ມອບໃຫ້ອໍານາດການປົກຄອງບ້ານ ເພື່ອນໍາໄປແບ່ງປັນໃຫ້ຄອບຄົວທີ່ທຸກຍາກຂາດເຂີນພາຍໃນບ້ານ ຢ່າງທົ່ວເຖິງ.
(ພາບ ແລະ ຂ່າວ: ນາງ ພອນທິດາ ລັດຕະນະວົງ)