ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 12 ມີນາ 2022 ຜ່ານມາ ທີ່ຈຸດສຸມຈຽງຕູບ, ທ່ານ ສັນຍາ ປຣະເສີດ ຄະນະປະຈໍາສະພາແຫ່ງຊາດ, ປະທານກໍາມາທິການຕ່າງປະເທດ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13, ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13, ປະທານສະພາປະຊາຊົນແຂວງສະຫວັນນະເຂດ ແລະ ທ່ານສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເຊໂປນ ເຄື່ອນໄຫວລົງພົບອໍານາດການປົກຄອງບ້ານ ແລະ ຜູ້ມີສິດເລືອກຕັ້ງທີ່ຂຶ້ນກັບຈຸດສຸມຈຽງ ເມືອງເຊໂປນ, ໂດຍມີ ທ່ານ ສົມບັດ ອິດທະວົງ ກໍາມະການປະຈໍາພັກເມືອງ ຮອງເຈົ້າເມືອງເຊໂປນ ແລະ ຫົວໜ້າ-ຮອງຫົວໜ້າຫ້ອງການອ້ອມຂ້າງຮ່ວມຕິດຕາມ.

ທ່ານ ໂອໄດ ຫຼວງສາລາດ ກໍາມະການພັກເມືອງ ຫົວໜ້າຫ້ອງການກະສິກໍາ ແລະ ປ່າໄມ້ເມືອງເຊໂປນ ຜູ້ຊີ້ນໍາຈຸດສຸມຈຽງຕູບ ລາຍງານຜົນການຈັດຕັ້ງປະຕິບັດ ການຊີ້ນໍາໆພາໃນໄລຍະ 1 ປີຜ່ານມາ: ຈຸດສຸມຈຽງຕູບ ຕັ້ງຢູ່ໃນໃຈກາງປ່າສະຫງວນລະວິງລະເວີນ ຫ່າງຈາກເທສະບານ 75 ກິໂລແມັດ, ກວມເອົາ 21 ພັນເຮັກຕາ, ທິດເໜືອຕິດກັບແຂວງກວາງບິງ ສສ ຫວຽດນາມ ແລະ ແຂວງຄໍາມ່ວນ, ທິດໃຕ້ຕິດກັບຈຸດສຸມລະໂກ, ທິດຕາເວັນອອກຕິດກັບແຂວງກວາງຈິ ສສ ຫວຽດທິດຕາເວັນຕົກຕິດກັບຈຸດສຸມຜາບັງ ແລະ ເມືອງວິລະບູລີ, ປະກອບມີ 6 ບ້ານ ມີ 12 ຄຸ້ມ, ມີ 403 ຫຼັງຄາເຮືອນ, ມີ 437 ຄອບຄົວ, ພົນລະເມືອງ 2208 ຄົນ, ຍິງ 1 ພັນ 112 ຄົນ, 1 ປີຜ່ານມາຄະນະພັກ-ຄະນະຈຸດສຸມ ໄດ້ສົມທົບກັບທະຫານກອງປະຕິບັດງານ 219 ເອົາໃຈໃສ່ວາງແຜນຄາດໝາຍສູ້ຊົນ ດ້ານວຽກງານຕ່າງໆສໍາຫຼວດເກັບກໍາຂໍ້ມູນ, ສ້າງແຜນພັດທະນາ, ສ້າງແຜນງົບປະມານປະຈໍາເດືອນ ຕະຫຼອດຮອດການລົງຊຸກຍູ້ສົ່ງເສີມ ແລະ ຕິດຕາມການຜະລິດກະສິກໍາ ຂອງພໍ່ແມ່ປະຊາຊົນ ປັບປຸງລະບົບອົງການຈັດຕັ້ງຂັ້ນບ້ານ, ໜ່ວຍງານບໍລິຫານບ້ານຄືນໃໝ່.

ສໍາລັບຂໍ້ສະເໜີທີ່ທາງຈຸດສຸມ ສະເໜີຕໍ່ຜູ້ແທນມີຄື: ສະເໜີໃຫ້ຂັ້ນເທິງແບ່ງງົບປະມານບ້ວງບໍລິຫານຫ້ອງການ ແລະ ສະເໜີຂໍລົດໃຫຍ່ 1 ຄັນ  ໂດຍອີງໃສ່ການບໍລິຫານວຽກງານຕ່າງໆ ໃນຈຸດສຸມແມ່ນມີຄວາມຈໍາເປັນຫຼາຍ, ສະເໜີໂຄງການກໍ່ສ້າງຊົນລະປະທານ ແລະ ຄອງນໍ້າເຂົ້າບ້ານ ຫ້ວຍສົບລູ ບ້ານສົບລູ, ສໍາຫຼວດ ແລະ ອອກແບບໃນເບື້ອງຕົ້ນມູນຄ່າປະມານ 5 ຕື້ 700 ລ້ານກີບ, ເໜີໂຄງການບຸກເບີກເນື້ອທີ່ນາຈໍານວນ 220 ເຮັກຕາ ໃນ 6 ບ້ານ ສໍາຫຼວດ ແລະ ຂຶ້ນແຜນເບື້ອງຕົ້ນ ມູນຄ່າປະມານ 3 ຕື້ 300 ລ້ານກີບ, ສະເໜີໂຄງການກໍ່ສ້າງຕິດຕັ້ງລະບົບເຄືອຂ່າຍໂທລະຄົມ ຈຸດສຸມຈຽງຕູບ, ສະເໜີໂຄງການກໍ່ສ້າງນໍ້າລິນ ບ້ານລູສະເລ່ຍ ສໍາຫຼວດຂຶ້ນແຜນເບື້ອງຕົ້ນປະມານ 450 ລ້ານກີບ, ສະເໜີໂຄງການກໍ່ສ້າງນໍ້າລິນ ບ້ານຕະປ໋ອງ ສໍາຫຼວດຂຶ້ນແຜນເບື້ອງຕົ້ນປະມານ 450 ລ້ານກີບ, ສະເໜີໂຄງການກໍ່ສ້າງທາງດິນແດງແຕ່ບ້ານສົບລູ ຄຸ້ມຕະລົວະ ຫາ ບ້ານລູສະເລ່ຍ, ສະເໜີໂຄງການກໍ່ສ້າງໂຮງຮຽນປະຖົມຫຼັງໃໝ່ຂະໜາດ 2 ຫ້ອງ ບ້ານຕະປ໋ອງ ຄຸ້ມຊະລັນ, ສະເໜີໂຄງການກໍ່ສ້າງໂຮງຮຽນປະຖົມຫຼັງໃໝ່ຂະໜາດ 2 ຫ້ອງ ບ້ານນາ ຄຸ້ມວັງໂມ່ງ ແລະ ສະເໜີໂຄງການກໍ່ສ້າງລະບົບຕາຂ່າຍໄຟຟ້າ ເຂົ້າບ້ານນາ ຄຸ້ມວັງໂມ່ງ ໄລຍະ 4,2 ກິໂລແມັດ.

ໂອກາດລົງມາພົບປະ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ຍັງໄດ້ເນັ້ນໜັກໃຫ້ພໍ່ແມ່ປະຊາຊົນບັນດາເຜົ່າ ຈົ່ງເສີມຂະຫຍາຍຄວາມສາມັກຄີໃຫ້ເປັນມູນເຊື້ອ, ພ້ອມຊ່ວຍເຫຼືອເບິ່ງແຍງເຊິ່ງກັນ ແລະ ກັນ, ໃຫ້ເຊື່ອໝັ້ນຕໍ່ການຈັດຕັ້ງຂອງພັກ ແລະ ລັດຖະບານ ທີ່ຍາມໃດກໍມີຄວາມເປັນຫວ່ງເປັນໃຍຊີວິດການເປັນຢູ່ຂອງພໍ່ແມ່ປະຊາຊົນ, ເຊິ່ງຕ້ອງໄດ້ເອົາໃຈໃສ່ສ້າງຂະບວນການແຂ່ງຂັນການຜະລິດໃຫ້ຫຼາຍ ເພື່ອສ້າງຄວາມເຂັ້ມແຂງໃຫ້ຕົນເອງ, ເພື່ອຈະໄດ້ສູ້ຊົນໃຫ້ກາຍເປັນສິນຄ້າສ້າງເສດຖະກິດຂອງຕົນໃຫ້ມີຄວາມເຂັ້ມແຂງ, ເຮັດໃຫ້ຊີວິດການເປັນຢູ່ຂອງຄອບຄົວນັບມື້ນັບດີຂຶ້ນ. ສໍາລັບຄໍາສະເໜີຕ່າງໆທີ່ທາງຈຸດສຸມສະເໜີໃນຄັ້ງນີ້ ກໍຈະໄດ້ນໍາໄປພິຈາລະນາ ແລະ ສະເໜີຕໍ່ຂັ້ນເທິງ-ຂະແໜງການທີ່ກ່ຽວຂ້ອງໃຫ້ໄດ້ຮັບຮູ້ ເພື່ອກ້າວໄປສູ່ການແກ້ໄຂຕາມຄວາມເໝາະສົມ.