(ສພຊ) ວັນທີ 18 ກໍລະກົດ 2018, ສະພາແຫ່ງຊາດ (ສພຊ) ໄດ້ຈັດພິທີສະເຫລີມສະຫລອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 63 ປີ (20 ກໍລະກົດ 1955-20 ກໍລະກົດ 2018) ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ໂດຍການເປັນປະທານຂອງທ່ານ ນາງ ມະນີວັນ ເຢຍປາວເຮີ ຮອງປະທານກໍາມາທິການວັດທະນະທໍາ-ສັງຄົມ, ປະທານຄະນະບໍລິຫານງານສະຫະພັນແມ່ຍິງສະພາແຫ່ງຊາດ; ໂດຍການເຂົ້າຮ່ວມຂອງທ່ານ ນາງ ທຸມມາລີ ວົງພະຈັນ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ ແລະ ທ່ານ ວິໄລວົງ ບຸດດາຄໍາ ປະທານກໍາມາທິການແຜນການ, ການເງິນ ແລະ ການກວດສອບ ທັງເປັນຜູ້ຊີ້ນໍາວຽກງານອົງການຈັດຕັ້ງມະຫາຊົນ ສພຊ, ມີບັນດາທ່ານສະຫາຍເລຂາ-ຮອງເລຂາໜ່ວຍພັກ ແລະ ຜູ້ຕາງໜ້າອົງການຈັດຕັ້ງມະຫາຊົນອ້ອມຂ້າງ ສພຊ, ບັນດາທ່ານການນໍາພັກ-ລັດ, ແມ່ປ້ານ້າອາ, ບັນດາສະມາຊິກແມ່ຍິງ ຕະຫລອດຮອດເອື້ອຍນ້ອງແມ່ຍິງທົ່ວ ສພຊ ເຂົ້າຮ່ວມ.
ຈຸດປະສົງການຈັດພິທີໃນຄັ້ງນີ້ ກໍເພື່ອເປັນການສຶກສາອົບຮົມໂຄສະນາເຜີຍແຜ່ ແລະ ສ້າງຈິດສໍານຶກໃຫ້ສະມາຊິກແມ່ຍິງຂອງສະພາແຫ່ງຊາດ ມີຄວາມຮັບຮູ້ ແລະ ເຂົ້າໃຈກ່ຽວກັບປະຫວັດຄວາມເປັນມາແຫ່ງການກໍາເນີດ ແລະ ການເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ພ້ອມທັງເປັນການເສີມຂະຫຍາຍຄຸນລັກສະນະທີ່ເປັນມູນ ເຊື້ອຂອງແມ່ຍິງລາວບັນດາເຜົ່າ ແລະ ເພີ່ມທະວີຄວາມຮັບຜິດຊອບຂອງສະມາຊິກສະຫະ ພັນແມ່ຍິງສະພາແຫ່ງຊາດໃນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດຄັ້ງທີ VII, ມະຕິກອງປະຊຸມຄົບຄະນະບໍລິຫານງານຄັ້ງທີ 3, ການຈັດຕັ້ງປະຕິບັດຄໍາຂວັນ ແລະ ຂໍ້ແຂ່ງຂັນ 3 ດີ ຂອງແມ່ຍິງລາວ ຕິດພັນກັບການຈັດຕັ້ງປະຕິບັດວຽກງານວິຊາສະເພາະ, ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາທີ່ຄະນະພັກສະພາແຫ່ງຊາດໄດ້ກໍານົດໄວ້ໃຫ້ມີເນື້ອໃນຕໍ່ເນື່ອງ ແລະ ເປັນຂະບວນການຟົດຟື້ນ.
ໃນພິທີ, ທ່ານ ນາງ ທຸມມາລີ ວົງພະຈັນ ໄດ້ປາຖະກະຖາກ່ຽວກັບປະຫວັດຄວາມເປັນມາແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ວ່າ: ພາຍໃຕ້ການນຳພາຂອງພັກ ແລະ ໄດ້ຮັບຜົນສະທ້ອນຈາກຂະບວນການຕໍ່ສູ້ປະຕິວັດແມ່ຍິງໃນໂລກທີ່ເລັ່ງທວງໃຫ້ປະຕິບັດສິດເສລີພາບ, ຄວາມສະເໝີພາບລະຫວ່າງຍິງ-ຊາຍທາງດ້ານການເມືອງ-ເສດຖະກິດ, ວັດທະນະທຳ-ສັງຄົມເທື່ອລະກ້າວ; ອົງການຈັດ ຕັ້ງແມ່ຍິງຂັ້ນຮາກຖານໄດ້ເກີດຂຶ້ນ ໂດຍເລີ່ມຈາກການຈັດຕັ້ງໜ່ວຍແມ່ນັກຮົບຢູ່ຊົນນະບົດ, ໜ່ວຍຍຸວັນນາລີຢູ່ຕົວເມືອງຕ່າງໆ ໃນຂອບເຂດທົ່ວປະເທດ ເພື່ອເຮັດໜ້າທີ່ຂົນຂວາຍແມ່ຍິງເຂົ້າຮ່ວມຂະບວນປະຕິວັດປົດປ່ອຍຊາດ ຈົນມາໃນວັນທີ 20 ກໍລະກົດ 1955 ພັກໄດ້ຈັດຕັ້ງໜ່ວຍຄົ້ນຄວ້າວຽກງານແມ່ຍິງຂຶ້ນຢ່າງເປັນທາງການ ເຊິ່ງເປັນຕົ້ນກຳເນີດຂອງອົງການຈັດຕັ້ງສະຫະພັນແມ່ຍິງລາວປັດຈຸບັນ ພ້ອມນັ້ນ, ທ່ານຍັງຍົກໃຫ້ເຫັນຜົນງານການເຄື່ອນ ໄຫວທີ່ພົ້ນເດັ່ນຂອງສະຫະພັນແມ່ຍິງລາວໃນແຕ່ລະໄລຍະນັບແຕ່ມື້ສ້າງຕັ້ງຈົນເຖິງປັດຈຸບັນ.
ນອກຈາກນີ້, ຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ກ່ຽວກັບຄວາມຮູ້ພື້ນຖານການຮັກສາສຸຂະພາບຂອງແມ່ຍິງ ຈາກ ດຣ. ສິດທິປະເສີດ ພະສະຖານ ຄະນະພະແນກປະສູດ-ພະຍາດຍິງຂອງໂຮງໝໍມະໂຫສົດອີກດ້ວຍ.
ຕອນບ່າຍຂອງວັນດຽວກັນ ນຳໂດຍ ທ່ານ ນາງ ທະວີໄສ ພະສະຖານ ຮອງປະທານຄະນະ ສສຊ ເພດຍິງ, ຮອງປະທານຄະນະບໍລິຫານງານແມ່ຍິງ ສພຊ; ໄດ້ນຳພາເອື້ອຍນ້ອງແມ່ຍິງສະພາແຫ່ງຊາດຢ້ຽມຊົມຫໍມູນເຊື້ອແມ່ຍິງລາວ ເນື່ອງໃນໂອກາດສະເຫລີມສະຫລອງວັນແມ່ຍິງລາວ ຄົບຮອບ 63 ປີ (20/ກໍລະກົດ/1955-20/ກໍລະກົດ/2018) ເຊິ່ງບັນລະຍາຍໂດຍ ນາງ ຕິ່ງນ້ອຍ ມະນີວົງ ວິຊາການພະແນກມູນເຊື້ອ ແລະ ສິນສາຍໄໝ ເຮັດໃຫ້ເອື້ອຍນ້ອງແມ່ຍິງສະພາແຫ່ງຊາດ ໄດ້ເຫັນແຈ້ງມູນເຊື້ອອັນດີງາມ ກໍຄືການເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ໂດຍຜ່ານແປວໄຟປະຕິວັດອັນລະອິດລະອ້ຽວ ສະຫງ່າອົງອາດ ແລະ ເຫັນໄດ້ເຖິງຄວາມພິລະອາດຫານຂອງອົງການຈັດຕັ້ງສະຫະພັນແມ່ຍິງ ແລະ ແມ່ຍິງລາວບັນດາເຜົ່າ; ເຊິ່ງເຫັນໄດ້ວ່າຕະຫລອດໄລຍະປະຫວັດສາດ 63 ປີຜ່ານມາ ແມ່ຍິງລາວບັນດາເຜົ່າຂອງພວກເຮົາ ໄດ້ຄຽງບ່າຄຽງໄຫລ່ກັບເພດຊາຍ ອຸທິດເລືອດເນື້ອ, ເຫື່ອແຮງ, ສະຕິປັນຍາ, ວັດຖຸປັດໄຈ ເພື່ອພາລະກິດຕໍ່ສູ້ກູ້ຊາດ, ການປົກປັກຮັກສາ ແລະ ການພັດທະນາປະເທດຊາດ.