ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນເຊົ້າວັນທີ 29 ກັນຍາ 2022 ສະພາແຫ່ງຊາດ ໄດ້ຈັດກອງປະຊຸມເຜີຍແຜ່ດໍາລັດວ່າດ້ວຍການປະຢັດ ແລະ ຕ້ານການຟຸມເຟືອຍ, ເຜີຍແຜ່ວຽກຈຸດສຸມ 6 ເດືອນທ້າຍປີ 2022 ຂອງຄະນະປະຈໍາສະພາແຫ່ງຊາດ ແລະ ປະກາດແຕ່ງຕັ້ງຕໍາແໜ່ງບໍລິຫານພາຍໃນສະພາແຫ່ງຊາດ, ກອງປະຊຸມດັ່ງກ່າວ ຈັດຂຶ້ນທີ່ຫໍສະພາແຫ່ງຊາດ ນະຄອນຫຼວງວຽງຈັນ ໂດຍການເປັນປະທານຂອງສະຫາຍ ຄໍາໃບ ດຳລັດ ກໍາມະການສູນກາງພັກ, ຄະນະປະຈຳຄະນະບໍລິຫານງານພັກສະພາແຫ່ງຊາດ, ຮອງປະທານສະພາແຫ່ງຊາດ; ເຂົ້າຮ່ວມມີຄະນະບໍລິຫານງານພັກສະພາແຫ່ງຊາດ, ຄະນະພັກຮາກຖານ, ໜ່ວຍພັກຮາກຖານ, ໜ່ວຍພັກທີ່ຂຶ້ນກັບຄະນະພັກຮາກຖານ, ສະມາຊິກພັກສົມບູນ, ສຳຮອງທົ່ວອົງຄະນະພັກສະພາແຫ່ງຊາດ.

ເພື່ອເປັນການເຮັດໃຫ້ສະມາຊິກພັກ, ພະນັກງານ-ລັດຖະກອນ ພາຍໃນສະພາແຫ່ງຊາດມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ແນວທາງນະໂຍບາຍຂອງພັກທີ່ຜັນຂະຫຍາຍເປັນນິຕິກໍາອັນລະອຽດຂອງອົງການຈັດຕັ້ງລັດ ເຊິ່ງພະນັກງານ-ລັດຖະກອນ ມີຄວາມຈໍາເປັນຕ້ອງໄດ້ເຂົ້າໃຈເຊື່ອມຊຶມ ແລະ ມີຄວາມຈໍາເປັນໃນສະພາບເສດຖະກິດ-ການເງິນໃນປັດຈຸບັນ; ຄວາມເປັນເອກະພາບໃນການຈັດຕັ້ງປະຕິບັດແຜນວຽກຈຸດສຸມ 6 ເດືອນທ້າຍປີ 2022 ຂອງຄະນະປະຈໍາສະພາແຫ່ງຊາດ ໃຫ້ບັນລຸຕາມແຜນການທີ່ວາງໄວ້ ແລະ ເພື່ອເປັນການປັບປຸງສັບຊ້ອນບຸກຄະລາກອນເຂົ້າໃສ່ແຕ່ລະຕໍາແໜ່ງງານໃຫ້ຄົບຖ້ວນ, ຮັບປະກັນໃນການຈັດຕັ້ງປະຕິບັດໜ້າທີ່ວຽກງານຢູ່ແຕ່ລະຂົງເຂດໃຫ້ມີປະສິດທິພາບ ແລະ ປະສິດທິຜົນ ສະພາແຫ່ງຊາດຈຶ່ງໄດ້ຈັດກອງປະຊຸມເຜີຍແຜ່ວ່າດ້ວຍການປະຢັດ ແລະ ຕ້ານການຟຸມເຟືອຍ, ເຜີຍແຜ່ວຽກຈຸດສຸມ 6 ເດືອນທ້າຍປີ 2022 ຂອງຄະນະປະຈໍາສະພາແຫ່ງຊາດ ແລະ ປະກາດແຕ່ງຕັ້ງຕໍາແໜ່ງບໍລິຫານພາຍໃນສະພາແຫ່ງຊາດ.
ຈາກນັ້ນ, ກອງປະຊຸມ ໄດ້ຮັບຟັງການປະກາດແຕ່ງຕັ້ງຕໍາແໜ່ງບໍລິຫານພາຍໃນສະພາແຫ່ງຊາດ ເຊິ່ງໄດ້ປະກາດທ່ານ ບຸນເລີດ ລ້ວນດວງຈັນ ຫົວໜ້າກົມສື່ມວນຊົນ ຄະນະເລຂາທິການສະພາແຫ່ງຊາດ ອອກພັກຜ່ອນບໍານານ, ປະກາດແຕ່ງຕັ້ງ ທ່ານ ປອ. ພິດສະໄໝ ບຸນວິໄລ ຮອງຫົວໜ້າກົມສື່ມວນຊົນ ເປັນຫົວໜ້າກົມສື່ມວນຊົນ ຄະນະເລຂາທິການສະພາແຫ່ງຊາດ; ທ່ານ ໄກມະນິນ ເທບບົວລີ ວ່າການແທນຫົວໜ້າກົມຄໍາຮ້ອງຂໍຄວາມເປັນທໍາ ເປັນຫົວໜ້າກົມຄໍາຮ້ອງຂໍຄວາມເປັນທໍາ ກໍາມາທິການຍຸຕິທໍາ ສະພາແຫ່ງຊາດ; ແຕ່ງຕັ້ງທ່ານ ລວຍ ພູມດາວັນ ຮອງຫົວໜ້າພະແນກ ເປັນຫົວໜ້າພະແນກຄຸ້ມຄອງພາຫະນະ ກົມບໍລິຫານພິທີການ ຄະນະເລຂາທິການສະພາແຫ່ງຊາດ; ຍົກຍ້າຍທ່ານ ພິດດາວອນ ພັນທະລັງສີ ຮອງຫົວໜ້າພະແນກບໍລິຫານ ໄປເປັນຮອງຫົວໜ້າພະແນກຄຸ້ມຄອງພາຫະນະ ກົມບໍລິຫານພິທີການ ຄະນະເລຂາທິການສະພາແຫ່ງຊາດ; ແຕ່ງຕັ້ງທ່ານ ສຸກສະໄຫວ ພົມມີສຸກ ວິຊາການ ເປັນຮອງຫົວໜ້າພະແນກຄຸ້ມຄອງແຫຼ່ງທຶນຊ່ວຍເຫຼືອລ້າ ກົມການເງິນ ຄະນະເລຂາທິການສະພາແຫ່ງຊາດ ແລະ ປະກາດແຕ່ງຕັ້ງທ່ານ ນາງ ຄໍາກ້ຽງ ເພັດມີໄຊ ວິຊາການ ເປັນຮອງຫົວໜ້າພະແນກບັນຊີ-ຄັງເງິນສົດ ກົມການເງິນ ຄະນະເລຂາທິການສະພາແຫ່ງຊາດ.
ຕອນທ້າຍ ກອງປະຊຸມຍັງໄດ້ຮັບຟັງການໂອ້ລົມຂອງທ່ານ ຄໍາໃບ ດໍາລັດ ຮອງປະທານສະພາແຫ່ງຊາດອີກດ້ວຍ.
(ພາບ ແລະ ຂ່າວ: ສອນສັກ ວັນວິໄຊ)