ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

​(ສພຊ) ຕອນບ່າຍວັນທີ 17 ພຶດສະພາຜ່ານມາ, ສະພາແຫ່ງຊາດ ໄດ້ເປີດຊຸດເຝິກອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນ ຊຸດທີ VII ແລະ ວຽກງານພັກ-ພະນັກງານ 5 ວັນ ຊຸດທີ IV ໃຫ້ແກ່ສະມາຊິກພັກ-ພະນັກງານ ພາຍໃນສະພາແຫ່ງຊາດ ທີ່ສະພາແຫ່ງຊາດ ນະຄອນຫລວງວຽງຈັນ ໂດຍການເປັນປະທານຂອງສະຫາຍ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ, ຮອງປະທານສະພາແຫ່ງຊາດ; ມີສະຫາຍ ນາງ ໄກສອນ ຈັນສີນາ ຫົວຫນ້າກົມຄຸ້ມຄອງການຮຽນ-ການສອນ ສະຖາບັນການເມືອງ-ການປົກຄອງແຫ່ງຊາດ, ບັນດາສະຫາຍຄະນະບໍລິຫານງານພັກ, ຕາໜ້າຈາກບັນດາໜ່ວຍພັກ, ບັນດາອາຈານ, ນັກສໍາມະນາກອນຈາກສະພາແຫ່ງຊາດເຂົ້າຮ່ວມ.
​ ໃນພິທີເປີດ ສະຫາຍ ນາງ ສູນທອນ ໄຊຍະຈັກ ໄດ້ມີຄໍາເຫັນໂອ້ລົມຕໍ່ຊຸດເຝິກອົບຮົມວ່າ: ເພື່ອເຮັດໃຫ້ຊຸດເຝິກອົບຮົມທິດສະດີການເມືອງ-ການປົກຄອງໃນຄັ້ງນີ້ ດໍາເນີນໄປຢ່າງມີຄຸນນະພາບ ແລະ ບັນລຸຕາມຈຸດປະສົງທີ່ວາງໄວ້ ບັນດານັກເຝິກອົບຮົມ ຕ້ອງເອົາໃຈໃສ່ຄົ້ນຄວ້າ, ຮໍ່າຮຽນເຝິກຝົນຫລໍ່ຫລອມຕົນເອງຕາມທິດຖືເອົາການຍົກສູງຄຸນນະພາບ ແລະ ຄວາມຮູ້, ຄວາມສາມາດເປັນກົກ, ຕ້ານ ແລະ ສະກັດກັ້ນປາກົດການຫຍໍ້ທໍ້ຕ່າງໆທີ່ເກີດຂຶ້ນໃນຖັນແຖວສະມາຊິກພັກ-ພະນັກງານ ເຊັ່ນ: ແລ່ນນໍາຄ່ານິຍົມ, ວຸດທິການສຶກສາເພື່ອປະດັບເອ້ກຽດສັກສີ ແຕ່ຂາດຄວາມຮູ້ຄວາມສາມາດ; ບັນດາສະຫາຍນັກເຝິກອົບຮົມ ຕ້ອງຍົກສູງຄວາມຮັບຜິດຊອບເຂົ້າໃນການຄົ້ນຄວ້າຮໍ່າຮຽນ, ຍາດແຍ່ງເອົາບົດຮຽນທີ່ຄູອາຈານນໍາມາສິດສອນ ເພື່ອມາຈັດຕັ້ງຜັນຂະຫຍາຍເຂົ້າໃນໜ້າທີ່ວຽກງານໃຫ້ເກີດດອກອອກຜົນໃນຕໍ່ໜ້າ; ໃຫ້ຖືເອົາການເຝິກອົບຮົມໃນເທື່ອນີ້ ເປັນການເຝິກຝົນຫລໍ່ຫລອມຕົນເອງຮອບດ້ານ, ບໍ່ວ່າຈະເປັນຄວາມຮູ້ທາງດ້ານທິດສະດີ, ຄຸນທາດການເມືອງ ແລະ ຄຸນສົມບັດສິນທໍາປະຕິວັດ ການເຝິກຝົນຫລໍ່ຫລອມຄຸນສົມບັດສິນທໍາປະຕິວັດ ແມ່ນຄວາມຈໍາເປັນພາວະວິໄສ, ຍ້ອນວ່າຖ້າຂາດຄຸນສົມບັດສິນທໍາປະຕິວັດ, ຂາດຄວາມຊື່ສັດ, ຂາດຄວາມຈົງຮັກພັກດີຕໍ່ອຸດົມການຂອງພັກ-ຂອງຊາດແລ້ວ ເຖິງຈະມີຄວາມຮູ້ຄວາມສາມາດສູງເປັນວິຊາການທີ່ເກັ່ງ, ມີຕໍາແໜ່ງເຖິງຂັ້ນໃດ ກໍບໍ່ມີປະໂຫຍດຫຍັງ; ບັນຫາຕົ້ນຕໍທີ່ຈະຕ້ອງໄດ້ຕ້ານ ກໍຄືທຸກການກະທໍາທີ່ຈະເປັນອັນຕະລາຍຕໍ່ລະບອບໃໝ່, ຕໍ່ແນວທາງນະໂຍບາຍຂອງພັກ-ລັດ ຕ້ານແນວຄິດແຍກພັກ-ແບ່ງພວກ, ແນວຄິດສໍ້ໂກງ, ຕົວະຍົວະຫລອກລວງ, ບິດເບືອນແນວທາງ, ໃສ່ຮ້າຍປ້າຍສີການຈັດຕັ້ງ, ສ້າງຄວາມເສື່ອມເສຍເຊິ່ງກັນແລະກັນ, ແຕກແຍກຄວາມສາມັກຄີພາຍໃນການຈັດຕັ້ງ ແລະ ຕ້ອງເຂົ້າໃຈແຈ້ງວ່າ ການຈັດເຝິກອົບຮົມທິດສະດີການເມືອງ-ການປົກຄອງນີ້ ແມ່ນເພື່ອຍົກລະດັບຄວາມຮູ້ທິດສະດີການເມືອງ, ໃຫ້ກໍາແໜ້ນຫລັກມູນທິດສະດີມາກ-ເລນິນ ແລະ ແນວທາງປ່ຽນແປງໃໝ່ຂອງພັກໃນແຕ່ລະໄລຍະໃຫ້ຮູ້ໝູນໃຊ້ທິດສະດີເຫລົ່ານັ້ນເຂົ້າໃນການປະຕິບັດຫນ້າທີ່ວຽກງານຕົວຈິງໃຫ້ຖືກຕ້ອງ ແລະ ມີປະສິດທິຜົນສູງ.
ໃນຊຸດເຝິກອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນ ຄັ້ງນີ້ ບັນດານັກເຝິກຮົມຈະໄດ້ຮຽນຮູ້: ວິຊາປັດສະຍາ ມາກ-ເລນິນ, ວິຊາລັດທິສັງຄົມນິຍົມ ວິທະຍາສາດ, ວິຊາເສດຖະສາດການເມືອງ ແລະ ຄຸ້ມຄອງເສດ ຖະກິດ, ວິຊາການປົກຄອງ ແລະ ວິຊາກໍ່ສ້າງພັກ.
(ພາບ ແລະ ຂ່າວ: ນາງ ກຸກກິກ ບຸດດາໄຊ)