ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


(ສພຊ) ວັນທີ 12 ພຶດສະພາຜ່ານມາ, ທີ່ສະພາແຫ່ງຊາດ (ສພຊ) ໄດ້ມີພິທີເປີດຊຸດເຝິກອົບຮົມພາສາຫວຽດ ນາມ ໃຫ້ພະນັກງານ-ລັດຖະກອນ ພາຍໃນສະພາແຫ່ງຊາດ ໄລຍະ 3 ເດືອນ, 6 ເດືອນ ແລະ 1 ປີ ຊຸດທີ I ໂດຍການເປັນປະທານເປີດກອງປະຊຸມຮ່ວມຂອງສະຫາຍ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ ແລະ ສະຫາຍ ຫງວຽນ ບາ ຮຸ່ງ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສສ.ຫວຽດນາມ ປະຈໍາ ສປປລາວ, ເຂົ້າຮ່ວມມີບັນດາສະຫາຍຫົວໜ້າກົມ, ສູນ, ຄະນະຄູ-ອາຈານ, ພະນັກງານຈາກສະຖານທູດຫວຽດນາມ ແລະ ບັນດານັກສໍາມະນາກອນ ຈຳນວນ 28 ສະຫາຍ.
ທັງນີ້, ເພື່ອຈັດຕັ້ງຜັນຂະຫຍາຍການຮ່ວມມື ຂອງສອງຫ້ອງວ່າການສະພາແຫ່ງຊາດລາວ-ຫວຽດນາມ ແລະຜ່ານຜົນການຢ້ຽມຢາມສັນຖະວະໄມຕີ ສສ.ຫວຽດນາມ ຂອງຄະນະຜູ້ແທນຂັ້ນສູງ ນຳໂດຍສະຫາຍ ປະທານສະພາແຫ່ງຊາດລາວ ໃນລະຫວ່າງວັນທີ 6-8 ທັນວາ 2021; ເພື່ອຜັນຂະຫຍາຍ ແລະ ເສີມສ້າງຄວາມອາດສາມາດທາງດ້ານພາສາຕ່າງປະເທດ ໃຫ້ແກ່ພະນັກງານ-ລັດຖະກອນ ພາຍໃນສະພາແຫ່ງຊາດ ເພື່ອເປັນເສນາທິການທີ່ດີໃຫ້ແກ່ສະພາແຫ່ງຊາດໃນການຈັດກິດຈະກຳສະເຫລີມສະຫລອງປີສາມັກຄີມິດຕະພາບລາວ-ຫວຽດນາມ ປີ 2022 ແລະ ຈັດກອງປະຊຸມສຳມະນາ, ແລກປ່ຽນບົດຮຽນ ລະຫວ່າງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດຫວຽດນາມ.
ສຳລັບຫລັກສູດການຮຽນ ລະດັບເລີ່ມຕົ້ນ ແມ່ນເລີ່ມຈາກການຮຽນຂັ້ນພື້ນຖານຂຶ້ນໄປ, ສໍາລັບລະດັບກາງ-ສູງ ແມ່ນຜູ້ທີ່ສາມາດເວົ້າ, ຂຽນ, ອ່ານ ແລະ ຟັງໄດ້ ຢູ່ໃນລະດັບກາງຂຶ້ນໄປ.
ໂອກາດດັ່ງກ່າວ, ສະຫາຍ ຫງວຽນ ບາ ຮຸ່ງ ໄດ້ມີຄໍາເຫັນວ່າ: ການ​ພົວພັນ​ລະຫວ່າງຫວຽດນາມ-ລາວ ​ແມ່ນ​ສາຍ​ພົວພັນ​ມິດຕະພາບ​ອັນ​ດີງາມ ​ທີ່​ການ​ນຳ​ຂອງ​ພັກ, ລັດ ​ແລະ ປະຊາຊົນສອງປະ​ເທດ​ ໄດ້​ຮັບ​ການ​ກໍ່ສ້າງ​ຢ່າງ​ຕັ້ງໜ້າ​ໃນ​ໄລຍະ​ຜ່ານ​ມາ ເຊິ່ງໃນປະຫວັດສາດ​ໄດ້​ພິສູດ​ໃຫ້​ເຫັນ​ວ່າ ນ້ຳ​ໃຈ​ສາມັກຄີ​ມິດຕະພາບ ​ທີ່​ເປັນ​ມູນ​ເຊື້ອ​ ຂອງ​ສອງ​ປະ​ເທດ​ເຮົາ ​ແມ່ນ​ຄວາມ​ເຂົ້າ​ໃຈ ​ແລະ​ ການ​ແບ່ງປັນ​ນັບ​ແຕ່​ການ​ປະຕິວັດ​ຍັງ​ບໍ່​ທັນ​ປະສົບ​ຜົນສຳ​ເລັດ ສອງ​ປະ​ເທດ​ໄດ້​ຢືນ​ຄຽງ​ຂ້າງ​ຕໍ່ສູ້​ປົດ​ປ່ອຍປະ​ເທດ​ຊາດ ນຳ​ຄວາມ​ຜາ​ສຸກ ແລະ ຊີວິດທີ່ຈະເລີນຮຸ່ງເຮືອງຄືມື້ນີ້; ສຳລັບການເຝິກອົບຮົມໃນຄັ້ງນີ້ ສະຖານທູດ ຈະໄດ້ມີການປະສານສົມທົບຢ່າງແໜ້ນແຟ້ນ ກັບການນຳຂອງສະພາແຫ່ງຊາດລາວ ຢ່າງສະໝໍ່າສະເໝີ ແລະ ເປັນປົກກະຕິ ເພື່ອຮັບປະກັນຊຸດເຝິກອົບຮົມພາສາຫວຽດນາມໃນຄັ້ງນີ້; ສະຫາຍ ຍັງໄດ້ກ່າວຕື່ມວ່າ: ການຮຽນພາສາຕ່າງປະເທດ ແມ່ນຈະຕ້ອງໄດ້ລົງທຶນທາງດ້ານເວລາ ຫວັງຢ່າງຍິ່ງວ່າ ບັນດາສະຫາຍນັກເຝິກອົບຮົມ ຈະສັບຊ້ອນເວລາໃນການເຂົ້າຮ່ວມເຝິກອົບຮົມຢ່າງເປັນປົກກະຕິ ເພື່ອເຮັດໃຫ້ຊຸດເຝິກອົບຮົມຄັ້ງນີ້ ມີປະສິດທິຜົນ ແລະ ປະສົບຜົນສຳເລັດຢ່າງຈົບງາມ.
ຈາກນັ້ນ,ສະຫາຍ ນາງ ປິ່ງຄຳ ລາຊະສິມມາ ໄດ້ມີຄໍາເຫັນວ່າ: ການເປີດຊຸດເຝິກອົບຮົມພາສາຫວຽດນາມ ໃຫ້ແກ່ພະນັກງານ-ລັດຖະກອນ ສະພາແຫ່ງຊາດ ໃນຄັ້ງນີ້ ສຸດທີ່ມີຄວາມໝາຍ ແລະ ຄວາມສໍາຄັນຍິ່ງ ເຊິ່ງເປີດຂຶ້ນໃນທ່າມກາງ ການສະເຫລີມສະຫລອງປີສາມັກຄີມິດຕະພາບລາວ-ຫວຽດນາມ ປີ 2022 ກໍຄືວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ ແລະ ແຜນການຈັດກິດຈະກໍາ ເພື່ອສະເຫລີມສະຫລອງປີສາມັກຄີມິດຕະພາບລາວ-ຫວຽດນາມ ປີ 2022; ທັງເປັນການສ້າງກິດຈະກຳເພື່ອກະກຽມຮັບຕ້ອນການມາຢ້ຽມຢາມ ສປປລາວ ຢ່າງເປັນທາງການ ຂອງຄະນະຜູ້ແທນຂັ້ນສູງ ນໍາໂດຍສະຫາຍ ເວືອງ ດິງ ເຫວະ ກຳມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ແຫ່ງ ສສ.ຫວຽດນາມ ໃນລະຫວ່າງວັນທີ 15-17 ພຶດສະພາ 2022 ນີ້ ທັງເປັນການປະກອບສ່ວນຮັດແໜ້ນສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ກ້າວເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ; ການເຝິກອົບຮົມໃນຄັ້ງນີ້ ແມ່ນຂະບວນການເຝິກຝົນຫລໍ່ຫລອມ, ການກໍ່ສ້າງພະນັກງານ-ລັດຖະກອນ ໃຫ້ໄດ້ຮຽນຮູ້ ແລະ ນໍາເອົາຄວາມຮູ້ພື້ນຖານທາງດ້ານພາສາຫວຽດນາມ ເພື່ອມາໝູນໃຊ້ເຂົ້າໃນການປະຕິບັດໜ້າທີ່ການເມືອງ, ວຽກງານຕົວຈິງທີ່ຕົນຮັບຜິດຊອບໃຫ້ເກີດຜົນປະໂຫຍດສູງສຸດ; ບັນດານັກສຶກສາທີ່ມີລາຍຊື່ ຈະຕ້ອງໄດ້ເອົາໃຈໃສ່ຄົ້ນຄວ້າ, ຮໍ່າຮຽນເຝິກຝົນຫລໍ່ຫລອມຕົນເອງ ຕາມທິດຖືເອົາການຍົກສູງຄຸນນະພາບ ແລະ ຄວາມຮູ້, ຄວາມສາມາດເປັນກົກ, ຕ້ານ ແລະ ສະກັດກັ້ນປາກົດການຫຍໍ້ທໍ້ຕ່າງໆ ແລະ ບັນດານັກເຝິກອົບຮົມ ຈະຕ້ອງຍາດແຍ່ງເອົາບົດຮຽນ ທີ່ທາງຄູ-ອາຈານນໍາມາສິດສອນ ເພື່ອນໍາມາຈັດຕັ້ງຜັນຂະຫຍາຍເຂົ້າໃນໜ້າທີ່ວຽກງານ ໃຫ້ເກີດດອກອອກຜົນໃນຕໍ່ໜ້າ; ພ້ອມນັ້ນ, ສະຫາຍຍັງໄດ້ຮຽກຮ້ອງມາຍັງບັນດາສະຫາຍນັກສຳມະນາກອນ ກໍຄືພະນັກງານ-ລັດຖະກອນ ຂອງສະພາແຫ່ງຊາດ ທີ່ໄດ້ຖືກມອບໝາຍເຂົ້າຮ່ວມຊຸດເຝິກອົບຮົມໃນຄັ້ງນີ້ ຈົ່ງໄດ້ເຊີດຊູຄວາມຮັບຜິດຊອບຂອງຕົນ ຕັ້ງໜ້າຮໍ່າຮຽນ ແລະ ຍົກລະດັບພາສາຫວຽດນາມ ຂອງຕົນ ເພື່ອສາມາດນໍາໃຊ້ໄດ້ໃນການປະຕິບັດໜ້າທີ່ວຽກງານຂອງຕົນ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)