ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ສະພາແຫ່ງຊາດ ເປີດຂະບວນລົດຖີບສາມັກຄີ ແລະ ການແຂ່ງຂັນລົດຖີບ ສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ ປີ 2022

ກ.ຍ. 27, 2022 | SlideMobile

(ສພຊ) ໃນວັນທີ 24 ກັນຍາ 2022 ຢູ່ທີ່ເດີ່ນຫໍສະພາແຫ່ງຊາດ (ທາດຫຼວງ) ສະພາແຫ່ງຊາດ ໄດ້ເປີດຂະບວນລົດຖີບສາມັກຄີ ແລະ ການແຂ່ງຂັນລົດຖີບສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022 ໂດຍການເປັນປະທານຂອງສະຫາຍ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ; ເຂົ້າຮ່ວມມີສະຫາຍ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ທັງເປັນປະທານຄະນະມິດຕະພາບ ລາວ-ຫວຽດນາມ, ສະຫາຍ ຫງວຽນ ບາ ຮຸ່ງ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສສ.ຫວຽດນາມ ປະຈຳ ສປປລາວ, ມີບັນດາສະຫາຍ ລັດຖະມົນຕີ, ປະທານກຳມາທິການ, ຮອງລັດຖະມົນຕີ, ຮອງປະທານກໍາມາທິການ ແລະ ສະມາຊິກສະພາແຫ່ງຊາດ, ບັນດາສະຫາຍຈາກຝ່າຍຫວຽດນາມ, ຝ່າຍລາວ, ບັນດາເອກອັກຄະລັດຖະທູດ ແລະ ຕາງໜ້າບັນດາອົງການຈັດຕັ້ງສາກົນ ປະຈໍາຢູ່ນະຄອນຫຼວງວຽງຈັນ ແລະ ມວນຊົນເຂົ້າຮ່ວມເປັນຈໍານວນຫຼວງຫຼາຍ.

ໂອກາດດັ່ງກ່າວ ສະຫາຍ ສັນຍາ ປຣະເສີດ ກໍາມະການຄະນະປະຈໍາສະພາແຫ່ງຊາດ, ປະທານກໍາມາທິການການຕ່າງປະເທດ ໄດ້ມີຄໍາເຫັນກ່າວເປີດພິທີໃນຄັ້ງນີ້ວ່າ: ມື້ນີ້, ໃນບັນຍາກາດ ແຫ່ງ ປີສາມັກຄີມິດຕະພາບ ລາວ-ຫວຽດນາມ ໃນປີ 2022, ໃນນາມຕາງໜ້າໃຫ້ ສະພາແຫ່ງຊາດລາວ ຮູ້ສຶກເປັນກຽດຢ່າງສູງ ແລະ ພາກພູມໃຈເປັນຢ່າງຍິ່ງ ທີ່ໄດ້ເຂົ້າຮ່ວມ ແລະ ມີຄຳເຫັນກ່າວເປີດຂະບວນລົດຖີບສາມັກຄີ ແລະ ການແຂ່ງຂັນລົດຖີບຄັ້ງນີ້. ຂະບວນການຂີ່ລົດຖີບຄັ້ງປະຫວັດສາດນີ້ ເປັນໜຶ່ງກິດຈະກໍາ ໃນຂອບປີສາມັກຄີມິດຕະພາບ ລາວ-ຫວຽດນາມ ເຊິ່ງຈະເປັນການປະກອບສ່ວນຮັດແໜ້ນ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ-ລາວ, ເວົ້າລວມ, ເວົ້າສະເພາະ ລະຫວ່າງສະພາແຫ່ງຊາດ ຂອງສອງປະເທດລາວ ແລະ ຫວຽດນາມ.

ໃນໄລຍະຜ່ານມາ, ສະພາແຫ່ງຊາດລາວ ໄດ້ສ້າງແຜນການກິດຈະກໍາຕ່າງໆ ໃນປີ 2022 ເປັນຕົ້ນ ການແລກປ່ຽນຢ້ຽມຢາມ ຂອງການນໍາຂັ້ນສູງ ຂອງສອງສະພາແຫ່ງຊາດລາວ-ຫວຽດນາມ ເຊິ່ງເດັ່ນກວ່າໝູ່ແມ່ນການຢ້ຽມຢາມ ສສ.ຫວຽດນາມ ຢ່າງເປັນທາງການ ຂອງສະຫາຍປະທານສະພາແຫ່ງຊາດລາວ ໃນເດືອນທັນວາ 2021 ແລະ ການຢ້ຽມຢາມ ສປປລາວ ຢ່າງເປັນທາງການ ຂອງສະຫາຍປະທານສະພາແຫ່ງຊາດຫວຽດນາມ ໃນເດືອນພຶດສະພາ 2022, ມີການແລກປ່ຽນການຢ້ຽມຢາມຂອງການນໍາ ຂັ້ນຮອງປະທານສະພານໍາກັນ, ມີການພົບປະແບບເຊິ່ງໜ້າ ແລະ ທາງໄກ ລະຫວ່າງ ສອງການນໍາ ຂອງສອງສະພາແຫ່ງຊາດ ເພື່ອແລກປ່ຽນບົດຮຽນໃນການຈັດຕັ້ງປະຕິບັດພາລະບົດບາດ ຂອງອົງການນິຕິບັນຍັດ; ການແລກປ່ຽນບົດຮຽນ ລະຫວ່າງສອງຫ້ອງວ່າການສະພາແຫ່ງຊາດ; ມີການແລກປ່ຽນສານອວຍພອນ ລະຫວ່າງຄູ່ຮ່ວມຕຳແໜ່ງຂອງສອງການນໍາສະພາແຫ່ງຊາດ ໃນໂອກາດສຳຄັນຂອງສອງປະເທດ ມີການຈັດພິທີປາຖະກະຖາເລົ່າມູນເຊື້ອການພົວພັນຮ່ວມມື ລະຫວ່າງ ລາວ-ຫວຽດນາມ ແລະ ກິດຈະກໍາອື່ນໆ.

ທ່ານ ຍັງໃຫ້ຮູ້ຕື່ມວ່າ: ຂະບວນລົດຖີບສາມັກຄີ ແລະ ການແຂ່ງຂັນລົດຖີບສະເຫຼີມສະຫຼອງປີສາມັກຄີມິດຕະ ພາບ ລາວ-ຫວຽດນາມ ໃນມື້ນີ້ ມີຈຸດປະສົງຕົ້ນຕໍ ແນໃສ່ຊຸກຍູ້ ແລະ ເສີມສ້າງຄວາມສາມັກຄີຮັກແພງ ໃຫ້ແກ່ພະນັກງານ, ໄວໜຸ່ມ ກໍຄືມວນຊົນຂອງສອງປະເທດ ໄດ້ມີໂອກາດພົບປະ ແລະ ເຄື່ອນໄຫວກິດຈະກໍາດ້ານກິລາຮ່ວມກັນ ທັງເປັນການ ຂ່ຳນັບຊົມເຊີຍ ແລະ ເປັນການສະເຫຼີມສະຫຼອງ 2 ວັນປະຫວັດສາດ: 60 ປີ ແຫ່ງການສ້າງຕັ້ງສາຍພົວພັນການທູດ ແລະ 45 ປີ ແຫ່ງການເຊັນສົນທິສັນຍາມິດຕະພາບ ແລະ ການຮ່ວມມື ລະຫວ່າງ ສອງປະເທດ.


ພິທີຄັ້ງນີ້ ໄດ້ຮັບການສະໜັບສະໜູນຫຼັກຈາກທະນາຄານພັດທະນາລາວ, ບໍລິສັດ ກູດລໍ ລາວ ຈໍາກັດ, ສະມາຊິກສະພາແຫ່ງຊາດ ນະຄອນຫຼວງວຽງຈັນ, ສະມາຄົມຄຸນຄ່າລາວ, ບໍລິສັດ ກາວີໂກ ມາຍນີງ ຈໍາກັດ, ໂຮງແຮມ Urbanite, ຮ້ານມັງກອນທອງ, ຮ້ານເຝີເລກ 6 ແລະ ບໍລິສັດ ພີທີທີ (ລາວ) ຈໍາກັດ.