(ສພຊ) ໃນຕອນບ່າຍວັນທີ 19 ມັງກອນ 2024 ທີ່ສະພາແຫ່ງຊາດ ໄດ້ຈັດກອງປະຊຸມສະຫຼຸບການ ເຄື່ອນໄຫວວຽກງານຂະບວນການແຂ່ງຂັນຮັກຊາດ ແລະ ພັດທະນາ ປະຈໍາປີ 2023 ແລະ ທິດທາງແຜນການປະຈໍາປີ 2024 ແລະ ຈັດພິທີມອບໃບຍ້ອງຍໍປະຈໍາປີ 2023 ໃຫ້ແກ່ພະນັກງານ-ລັດຖະກອນພາຍໃນສະພາແຫ່ງຊາດ ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ມີບັນດາທ່ານປະ ທານ, ຮອງປະທານກໍາມາທິການ, ເລຂາທິການ, ຮອງເລຂາທິການ, ຫົວໜ້າ, ຮອງຫົວໜ້າສະຖາບັນຄົ້ນຄວ້ານິຕິກໍາ, ຫົວໜ້າ, ຮອງຫົວໜ້າກົມ, ສູນ ແລະ ຫ້ອງການ, ພ້ອມດ້ວຍພະນັກງານຂັ້ນພະແນກ ຕະຫຼອດຮອດພະນັກງານພາຍໃນ ສພຊ ເຂົ້າຮ່ວມຈໍານວນຫຼວງຫຼາຍ.
ກອງປະຊຸມໄດ້ຮັບຟັງການສະຫຼຸບການເຄື່ອນໄຫວວຽກງານແຂ່ງຂັນຮັກຊາດ ແລະ ພັດທະນາ ປະຈໍາປີ 2023 ແລະ ທິດທາງແຜນການປະຈໍາປີ 2024. ຈາກນັ້ນ, ກອງປະຊຸມໄດ້ຈັດພິທີມອບໃບຍ້ອງຍໍໃຫ້ແກ່ກົມກອງ ແລະ ບຸກຄົນດີເດັ່ນດັ່ງນີ້: ກົມກອງດີເດັ່ນໄດ້ຮັບໃບຍ້ອງຍໍຂອງຄະນະປະຈໍາສະພາແຫ່ງຊາດ ປະກອບມີ: ບັນດາກໍາ ມາທິການ, ຄະນະເລຂາທິການ ແລະ ສະຖາບັນຄົ້ນຄວ້ານິຕິກໍາ ຈໍານວນ 11 ກົມກອງ; ກົມ, ສູນ ແລະ ຫ້ອງການ ທຽບເທົ່າກົມ ຈໍານວນ 28 ກົມກອງ. ບຸກຄົນດີເດັ່ນໄດ້ຮັບໃບຍ້ອງຍໍຂອງຄະນະປະຈໍາສະພາແຫ່ງຊາດ: ພະນັກງານ ການນໍາຂັ້ນສູງ ຈໍານວນ 39 ທ່ານ ຍິງ 6 ທ່ານ, ພະນັກງານຕໍາແໜ່ງບໍລິຫານປະເພດ 1, ລັດຖະກອນວິຊາການ ຈໍາ ນວນ 292 ທ່ານ ຍິງ 120 ທ່ານ; ບຸກຄົນດີເດັ່ນໄດ້ຮັບໃບຍ້ອງຍໍຂອງຄະນະເລຂາທິການສະພາແຫ່ງຊາດ ຈໍານວນ 71 ທ່ານ ຍິງ 22 ທ່ານ. ໃບຍ້ອງຍໍຂອງຄະນະປະຈໍາສະພາແຫ່ງຊາດ ແມ່ນມອບໂດຍທ່ານ ປອ. ນາງ ສູນທອນ ໄຊ ຍະຈັກ ແລະ ໃບຍ້ອງຍໍຂອງຄະນະເລຂາທິການສະພາແຫ່ງຊາດ ແມ່ນມອບໂດຍທ່ານ ນາງ ປິ່ງຄໍາ ລາຊະສິມມາ ເລ ຂາທິການສະພາແຫ່ງຊາດ. ໃນກອງປະຊຸມສະຫຼຸບຄັ້ງນີ້, ບັນດາຕາງໜ້າຄະນະຮັບຜິດຊອບຂະບວນການແຂ່ງຂັນຮັກຊາດ ແລະ ພັດທະນາ ໄດ້ຂຶ້ນຈັບມືແຂ່ງຂັນປະຈໍາປີ 2024 ໂດຍເປັນການສືບຕໍ່ການຈັດຕັ້ງປະຕິບັດໜ້າທີ່ວຽກງານຕາມພາລະບົດບາດ, ສິດ ແລະ ໜ້າທີ່ຂອງບັນດາກໍາມາທິການ, ຄະນະເລຂາທິການ ແລະ ສະຖາບັນຄົ້ນຄວ້ານິ ຕິກໍາຂອງສະພາແຫ່ງຊາດ ດ້ວຍຄາດໝາຍຂອງການແຂ່ງຂັນ ໃຫ້ໄວ, ໃຫ້ດີ, ໃຫ້ຫຼາຍ, ໃຫ້ຖືກກົດໝາຍ ແລະ ເນື້ອໃນການແຂ່ງຂັນ ມີ 3 ຂໍ້ຄື: 1. ຍົກສູງວຽກງານດ້ານການເມືອງ-ແນວຄິດ ໃຫ້ມີຄວາມໜັກແໜ້ນໃນທຸກດ້ານ; 2. ຍົກສູງຄວາມຮັບ ຜິດຊອບໃນການປະຕິບັດໜ້າທີ່ວຽກງານດ້ານວິຊາສະເພາະ ໂດຍສຸມໃສ່ຈັດຕັ້ງຜັນຂະຫຍາຍບັນ ດາ 5 ແຜນງານ 29 ໂຄງການຂອງສະພາແຫ່ງຊາດ, ພິເສດຈະໄດ້ຮ່ວມກັນເປັນເຈົ້າພາບທີ່ດີໃຫ້ແກ່ກອງປະຊຸມໄອປາ ຄັ້ງທີ 45 ໃນປີ 2024; 3. ຍົກສູງຄວາມເປັນເຈົ້າການປັບປຸງກົງຈັກການຈັດຕັ້ງ ແລະ ແບບແຜນວິທີການເຮັດວຽກ ໃຫ້ມີປະສິດທິພາບສູງຂຶ້ນ.
​ ໂອກາດດັ່ງກ່າວ, ທ່ານຮອງປະທານສະພາແຫ່ງຊາດ ໄດ້ມີການໂອ້ລົມຕໍ່ກອງປະຊຸມ ໂດຍໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນສໍາເລັດໃນການຈັດຕັ້ງປະຕິບັດວຽກງານແຂ່ງຂັນຮັກຊາດ ແລະ ພັດ ທະນາ ເຊິ່ງບັນດາກໍາມາທິການ, ຄະນະເລຂາທິການ, ສະຖາບັນຄົ້ນຄວ້ານິຕິກໍາ, ບັນດາກົມ, ສູນ, ຫ້ອງການ ແລະ ພະນັກງານ-ລັດຖະກອນ ໄດ້ເປັນເຈົ້າການຈັດຕັ້ງຜັນຂະຫຍາຍບັນດາ 5 ແຜນງານ 29 ໂຄງການຂອງສະພາແຫ່ງຊາດ ຕາມພາລະບົດບາດ, ໜ້າທີ່ຄວາມຮັບຜິດຊອບຂອງຕົນດ້ວຍຄວາມຮັບຜິດຊອບສູງ ເຮັດໃຫ້ວຽກງານຂອງສະ ພາແຫ່ງຊາດສໍາເລັດຕາມແຜນການທີ່ວາງໄວ້ ໂດຍສະເພາະການປະຕິບັດ 3 ພາລະບົດບາດຂອງສະພາແຫ່ງຊາດຄື: ດ້ານນິຕິບັດຍັດ, ການຕົກລົງບັນຫາສໍາຄັນຂອງປະເທດຊາດ, ການຕິດຕາມກວດກາການປະຕິບັດລັດຖະທໍາມະນູນ ແລະ ກົດໝາຍ, ການສ້າງຄວາມເຂັ້ມແຂງ, ວຽກງານການຕ່າງປະເທດ, ວຽກງານການຄຸ້ມຄອງບໍລິຫານ ແລະ ການ ອໍານວຍຄວາມສະດວກໃຫ້ແກ່ການເຄື່ອນໄຫວຂອງສະພາແຫ່ງຊາດ, ສໍາເລັດການຂຽນຕຳແໜ່ງງານພະນັກງານນຳ ພາຄຸ້ມຄອງ ທັງຂັ້ນສູນກາງ ແລະ ຂັ້ນສະພາແຫ່ງຊາດຄຸ້ມຄອງ ເຊິ່ງໄດ້ຖືກຮັບຮອງຈາກຄະນະພັກຂັ້ນເທິງ ແລະ ຄະນະພັກສະພາແຫ່ງຊາດແລ້ວ; ສຳເລັດການປັບປຸງກົງຈັກການຈັດຕັ້ງຂັ້ນກົມ 25 ກົມ, 2 ສູນ ແລະ 1 ຫ້ອງການ ເຊິ່ງກະຊວງພາຍໃນໄດ້ຮັບຮອງເອົາແລ້ວ, ເຊິ່ງທັງໝົດນັ້ນ ຈຶ່ງເຮັດໃຫ້ພະນັກງານຂອງສະພາແຫ່ງຊາດ ໄດ້ຖືກສະ ເໜີໃຫ້ມີການຍ້ອງຍໍໃນລະດັບຕ່າງໆຈໍານວນຫຼວງຫຼາຍ.
ເພື່ອຈັດຕັ້ງປະຕິບັດບັນດາເນື້ອໃນການແຂ່ງຂັນຮັກຊາດ ແລະ ພັດທະນາ ປີ 2024 ໃຫ້ມີຜົນສໍາເລັດ, ມີຄຸນນະພາບ ແລະ ມີປະສິດທິຜົນສູງ, ທ່ານຮອງປະທານສະພາແຫ່ງຊາດ ໄດ້ຮຽກຮ້ອງໃຫ້ບັນດາອົງການຈັດຕັ້ງຂອງສະພາແຫ່ງຊາດ ຈົ່ງຍົກສູງຄຸນນະພາບໃນການປະເມີນພະນັກງານປະຈໍາປີ ເພື່ອເຮັດໃຫ້ການຕີລາຄາ, ການສະເໜີຍ້ອງຍໍໃນປີ 2024 ມີຄວາມຖືກຕ້ອງກັບຄວາມຫ້າວຫັນບຸກບືນຂອງພະນັກງານ ແລະ ສາມາດຄັດເລືອກໄດ້ກົມກອງ ແລະ ບຸກຄົນທີ່ດີເດັ່ນແທ້ໆ ເພື່ອເພີ່ມຄວາມເຂັ້ມແຂງແກ່ສະພາແຫ່ງຊາດ.
(ຂ່າວ ແລະ ພາບ: ສອນສັກ ວັນວິໄຊ)