ຄະນະກວດກາພັກ ສະພາແຫ່ງຊາດ ໄດ້ຈັດກອງປະຊຸມສະຫຼຸບວຽກງານກວດກາພັກ-ລັດ ປະຈໍາປີ 2018 ແລະ ສະເຫຼີມສະຫຼອງ ວັນສ້າງຕັ້ງອົງການກວດກາພັກ-ລັດ ຄົບຮອບ 37 ປີ ໃນວັນທີ 18 ມີນານີ້ ທີ່ສະພາແຫ່ງຊາດໂດຍມີ ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ, ທ່ານ ສົມພູ ດວງສະຫວັນ ປະທານກວດກາພັກ ສະພາແຫ່ງຊາດ, ປະທານກໍາມາທິການວັດທະນະທໍາ-ສັງຄົມ, ມີພາກສ່ວນກ່ຽວຂ້ອງເຂົ້າຮ່ວມ.
ທ່ານ ສົມພູ ດວງສະຫວັນ ກ່າວວ່າ: ໃນປີ 2018 ທີ່ຜ່ານມາ ດ້ວຍຄວາມເອົາໃຈໃສ່ຊີ້ນໍາໆ ພາ ຂອງຄະນະພັກສະພາແຫ່ງຊາດ, ຄະນະກວດກາພັກ ກໍມີຜົນສໍາເລັດຫຼາຍດ້ານໂດຍສະເພາະ ການເປັນເສນາທິການໃຫ້ແກ່ຄະນະພັກ ໃນການກວດກາ ຈັດຕັ້ງປະຕິບັດກົດລະບຽບຂອງພັກ, ການສະກັດກັ້ນ ແລະ ການຕ້ານການສໍ້ລາດບັງຫຼວງ ພາຍໃນສະພາແຫ່ງຊາດ, ການປະສານສົມທົບວຽກງານກັບຄະນະກວດກາສູນກາງພັກ ແລະ ວຽກງານອື່ນໆ ເພື່ອເຮັດໃຫ້ການເຄື່ອນໄຫວວຽກງານ ຂອງຄະນະກວດກາພັກ-ສະພາແຫ່ງຊາດ ມີຄຸນນະພາບນັບມື້ສູງຂຶ້ນ, ກອງປະຊຸມຄັ້ງນີ້ ເພື່ອສະຫຼຸບຕີລາຄາໃນການເຄື່ອນໄຫວວຽກງານທີ່ຜ່ານມາ ແລະ ວາງທິດທາງແຜນການເຄື່ອນໄຫວວຽກງານໃນປີ 2019 ແນໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ກ່ຽວກັບການເພີ່ມທະວີປະສິດທິພາບ ແລະ ຄວາມສັກສິດຂອງວຽກງານກວດກາ ຢູ່ໃນສະພາແຫ່ງຊາດ, ຍົກໃຫ້ເຫັນຜົນງານດ້ານດີທີ່ຕ້ອງສືບຕໍ່ຜັນຂະຫຍາຍ ແລະ ຂໍ້ຄົງຄ້າງທີ່ຕ້ອງໄດ້ສຸມໃສ່ແກ້ໄຂ, ເພື່ອຮັບຟັງການລາຍງານສ່ອງແສງ ການເຄື່ອນໄຫວວຽກງານກວດກາ ຢູ່ໜ່ວຍພັກຮາກຖານຕ່າງໆ ແລະ ຮັບຟັງການເຜີຍແຜ່ເອກະສານວຽກງານກວດກາຈໍານວນໜຶ່ງ. ກອງປະຊຸມຄັ້ງນີ້ ຈະໄດ້ສຸມໃສ່ຮັບຟັງການລາຍງານ ແລະ ຄົ້ນຄວ້າປະກອບຄໍາເຫັນໃສ່ເນື້ອໃນຕ່າງໆ ຄື: ບົດສະຫຼຸບການເຄື່ອນໄຫວວຽກງານປະຈໍາປີ 2018 ແລະ ທິດທາງແຜນການເຄື່ອນໄຫວວຽກງານປະຈໍາປີ 2019 ຂອງຄະນະກວດກາພັກສະພາແຫ່ງຊາດ; ເຜີຍແຜ່ເອກະສານປາຖະກະຖາ ວັນສ້າງຕັ້ງອົງການກວດກາພັກ ຄົບຮອບ 37 ປີ; ເຜີຍແຜ່ບົດສະຫຼຸບຫຍໍ້ ວຽກງານກວດກາທົ່ວປະເທດ ປະຈໍາປີ 2018 ແລະ ທິດທາງຄາດໝາຍສູ້ຊົນຂອງວຽກງານກວດກາປີ 2019 ຂອງຄະນະກວດກາສູນກາງພັກ ແລະ ເຜີຍແຜ່ບົດໂອ້ລົມ ຂອງທ່ານບຸນທອງ ຈິດມະນີ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ ອົງການກວດກາລັດຖະບານ ແລະ ຕ້ານການສໍ້ລາດບັງຫຼວງຕໍ່ກອງປະຊຸມວຽກງານກວດກາທົ່ວປະເທດ ປະຈໍາປີ 2018.