ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

​(ສພຊ) ສາມອົງການຈັດຕັ້ງມະຫາຊົນຂອງສະພາແຫ່ງຊາດ ຮ່ວມກັບຄະນະຮັບຜິດຊອບກອງທຶນຊ່ວຍ ເຫລືອສັງຄົມສະພາແຫ່ງຊາດ ຈັດພິທີສະເຫຼີມສະຫຼອງວັນເດັກນ້ອຍສາກົນ ຄົບຮອບ 98 ປີ (1/6/1924-1/6/2022) ແລະ ວັນປູກຕົ້ນໄມ້ແຫ່ງຊາດ ຄົບຮອບ 42 ປີ (1/6/1980-1/6/2022) ໃນວັນທີ 31 ພຶດສະພາ 2022 ທີ່ສະພາແຫ່ງຊາດ ໂດຍການເຂົ້າຮ່ວມຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍບັນດາຄະນະນຳສະພາແຫ່ງຊາດ ແລະ ລູກ-ຫຼານຂອງພະນັກງານ-ລັດຖະກອນພາຍໃນສະພາແຫ່ງຊາດ ແລະ ພາກສ່ວນກ່ຽວຂ້ອງເຂົ້າຮ່ວມ.
​ ໃນພິທີ, ທ່ານ ນາງ ມະນີວັນ ເຢຍປາວເຮີ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານຄະນະບໍລິຫານງານສະຫະພັນແມ່ຍິງສະພາແຫ່ງຊາດ ໄດ້ມີຄໍາເຫັນກ່າວເປີດພິທີວ່າ: ການສະເຫຼີມສະຫຼອງວັນເດັກນ້ອຍສາກົນ 1 ມິຖຸນາໃນແຕ່ລະປີ ເປັນການສ້າງໂອກາດໃຫ້ພວກເຮົາໄດ້ທົບທວນຄືນການຈັດຕັ້ງປະຕິບັດແນວທາງນະໂຍບາຍຂອງພັກ, ນິຕິກຳຂອງລັດ ແລະ ແຜນພັດທະນາເສດຖະກິດ-ສັງຄົມ ລວມທັງເປົ້າໝາຍການພັດທະນາແບບຍືນຍົງທີ່ພົວພັນເຖິງວຽກແມ່ ແລະ ເດັກ ກໍຄືສົນທິສັນຍາສາກົນກ່ຽວກັບເດັກທີ່ ສປປລາວ ເປັນພາຄີ ລວມທັງເປັນການໂຄສະນາເຜີຍແຜ່ຢ່າງກວ້າງຂວາງ ກ່ຽວກັບແນວທາງນະໂຍບາຍຂອງພັກ ແລະ ລັດເຮົາ. ເພື່ອເປັນການປູກຈິດສຳນຶກໃຫ້ແກ່ພະນັກງານ-ລັດຖະກອນ, ຜູ້ປົກຄອງເດັກ ແລະ ລູກຫຼານ ຂອງພະນັກງານທົ່ວສະພາແຫ່ງຊາດ ກໍຄືໃນທົ່ວສັງຄົມໄດ້ຮັບຮູ້ຄວາມໝາຍ ແລະ ຄວາມສໍາຄັນຂອງວັນເດັກນ້ອຍສາກົນ ກໍຄືວັນປູກຕົ້ນໄມ້ແຫ່ງຊາດ ພິທີສະເຫຼີມສະຫຼອງ ປະກອບມີຫຼາຍກິດຈະກຳຄື: ພິທີປູກຕົ້ນໄມ້ເປັນທີ່ລະນຶກ ຂອງຄະນະປະຈຳສະພາແຫ່ງຊາດກັບຫຼານນ້ອຍ, ຈັດໃຫ້ນັກຮຽນມາຢ້ຽມຊົມຫ້ອງປະຊຸມໃຫຍ່ສະພາແຫ່ງຊາດ, ການສະແດງສິລະປະ-ວັນນະຄະດີ, ເດີນແຟຊັ້ນໂຊ ຂອງເດັກ, ຫຼິ້ນເກມຖາມ-ຕອບ ຄວາມຮູ້ຮອບຕົວ, ຄວາມຮູ້ດ້ານວິທະຍາສາດ ແລະ ມອບຂອງຂວັນ, ກວດສຸຂະພາບ, ແຈກຢາຍວິຕາມິນ, ເຂົ້າໜົມ ແລະ ອາຫານໃຫ້ແກ່ເດັກ.
ພິທີສະເຫຼີມສະຫຼອງໃນມື້ນີ້, ດຳເນີນດ້ວຍບັນຍາກາດທີ່ຟົດຟື້ນ ໄດ້ຮັບການຊີ້ນຳ, ການສ້າງເງື່ອນໄຂອຳນວຍຄວາມສະດວກ ຈາກຄະນະພັກ, ຄະນະປະຈຳສະພາແຫ່ງຊາດ, ການສະໜັບສະໜູນງົບປະມານ, ການປະກອບສ່ວນວັດຖຸ-ປັດໄຈຈາກຄະນະເລຂາທິການສະພາແຫ່ງຊາດ, ຄະນະກອງທຶນຊ່ວຍເຫຼືອສັງຄົມສະພາແຫ່ງຊາດ ກໍຄືຄອບຄົວການນຳຂອງສະພາແຫ່ງຊາດ, ກຸ່ມທະນາຄານພົງສະຫວັນ, ບໍລິສັດເບຍລາວ, ບໍລິສັດເມົາຕີເພັສ, ໂຮງໝໍ ລາວ-ອາຊຽນ ແລະ ການຮ່ວມຈິດຮ່ວມໃຈ ຂອງສະມາຊິກສາມອົງການຈັດຕັ້ງມະຫາຊົນສະພາແຫ່ງຊາດ ຢ່າງຕັ້ງໜ້າ.
ໄລຍະຜ່ານມາ, ພັກ ແລະ ລັດເຮົາ ເວົ້າລວມ, ເວົ້າສະເພາະ ຄະນະພັກ, ຄະນະນໍາສະພາແຫ່ງຊາດ ໄດ້ເອົາໃຈໃສ່ ຊີ້ນໍາ ແລະ ວາງນະໂຍບາຍ, ສ້າງ-ປັບປຸງນິຕິກຳທີ່ຕິດພັນກັບການປົກປ້ອງສິດ ແລະ ຜົນປະໂຫຍດຂອງເດັກ ລວມມີ 22 ສະບັບ, ເອົາໃຈໃສ່ວຽກງານສຶກສາອົບຮົມ ແລະ ກໍ່ສ້າງເດັກໃຫ້ມີນໍ້າໃຈຮັກຊາດ, ຮັກບ້ານເກີດເມືອງນອນ, ສ້າງ ແລະ ຂະຫຍາຍໂຮງຮຽນສາມັນ, ໂຮງຮຽນວິຊາຊີບ, ສະຖານທີ່ເບິ່ງແຍງປິ່ນປົວ, ສົ່ງເສີມໃຫ້ເດັກໄດ້ມີສ່ວນຮ່ວມໃນການເຄື່ອນໄຫວທາງສັງຄົມ, ສ້າງ ແລະ ປັບປຸງມາດຕະການໃນການປົກປ້ອງເດັກຈາກການຂູດຮີດ, ການປະລະ, ການທາລຸນ ແລະ ອື່ນໆ, ທົ່ວສັງຄົມມີຄວາມຮັບຜິດຊອບປະກອບສ່ວນສ້າງ ແລະ ພັດທະນາເດັກທາງດ້ານຮ່າງກາຍ, ສະຕິປັນຍາ ເປັນຕົ້ນເຂົ້າຮ່ວມໃນການສ້າງສະຖານທີ່ປິ່ນປົວສຸຂະພາບ, ສຶກສາຮໍ່າຮຽນ, ເຄື່ອນໄຫວສິລະປະ-ວັນນະຄະດີ, ກິລາ-ກາຍຍະກໍາ ແລະ ປົກປ້ອງເດັກຈາກສິ່ງຫຍໍ້ທໍ້ຕ່າງໆ ໃນສັງຄົມ.
(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)