(ສພຊ) ໃນໂອກາດການເຄື່ອນໄຫວພົບປະຜູ້ມີສິດເລືອກຕັ້ງຂອງ 2 ເມືອງຄື: ເມືອງຈຳພອນ ແລະ ເມືອງສອງຄອນ ແຂວງສະຫວັນນະເຂດ ເມື່ອວັນທີ 26-27 ສິງຫາຜ່ານມາ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ນຳເອົາເຂົ້າສານໜຽວ ຈຳນວນ 3 ໂຕນ ແລະ ເຄື່ອງບໍລິໂພກຕ່າງໆຈຳນວນໜຶ່ງ ມອບເປັນເຄື່ອງຊ່ວຍເຫຼືອໃຫ້ປະຊາຊົນ ຜູ້ທີ່ໄດ້ຮັບຜົນກະທົບຈາກອຸທົກກະໄພຢູ່ 2 ເມືອງດັ່ງກ່າວ ເຊິ່ງມອບໂດຍທ່ານ ປອ. ນາງ ສູນທອນ ໄຊຍະຈັກ ແລະ ຕາງໜ້າຮັບໂດຍທ່ານ ປອ. ພູລຳພອນ ສີຫາວົງ ກຳມະການພັກແຂວງ, ເລຂາພັກເມືອງ, ເຈົ້າເມືອງຈຳພອນ ແລະ ທ່ານ ພັອ. ລຳຄູນ ວໍລະວົງ ກຳມະການພັກແຂວງ, ເລຂາພັກເມືອງ, ເຈົ້າເມືອງສອງຄອນ, ມີບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ການນຳຂອງເມືອງ, ບ້ານ ພ້ອມດ້ວຍປະຊາຊົນເຂົ້າຮ່ວມເປັນສັກຂີພິຍານ.

ໂອກາດດຽວກັນນີ້, ທັງສອງເມືອງຍັງໄດ້ມອບໃບສັນລະເສີນຂອງເຈົ້າເມືອງ ໃຫ້ກອງທຶນຊ່ວຍເຫຼືອສັງຄົມຂອງສະພາແຫ່ງຊາດ ທີ່ໄດ້ປະກອບສ່ວນຊ່ວຍເຫຼືອປະຊາຊົນທີ່ໄດ້ຮັບຜົນກະທົບໄພນ້ຳຖ້ວມໃຫ້ປະຊາຊົນຂອງເມືອງຈຳພອນ ແລະ ເມືອງສອງຄອນ ແຂວງສະຫວັນນະເຂດ.