​(ສພຊ) ຕອນບ່າຍວັນພະຫັດທີ 14 ມີນາ 2024 ທີ່ສະພາແຫ່ງຊາດ ໄດ້ຈັດກອງປະຊຸມສະຫຼຸບຕີລາຄາການ ຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ການປັບປຸງກົງຈັກການຈັດຕັ້ງ ປະຈຳປີ 2023 ແລະ ທິດທາງແຜນການປີ 2024 ຂອງສະພາແຫ່ງຊາດ ໂດຍການເປັນປະທານຂອງສະຫາຍ ປອ. ນາງ ສູນທອນ ໄຊຍະຈັກ ເລຂາທິ ການສູນກາງພັກ, ຮັກສາການເລຂາຄະນະບໍລິຫານງານພັກສະພາແຫ່ງຊາດ; ໂດຍມີການເຂົ້າຮ່ວມຂອງບັນດາສະຫາຍໃນຄະນະບໍລິຫານງານພັກ, ຄະນະພັກຮາກຖານ, ໜ່ວຍພັກຮາກຖານ, ໜ່ວຍພັກທີ່ຂຶ້ນກັບຄະນະພັກຮາກຖານ, ສະ ມາຊິກພັກທີ່ມີຕຳແໜ່ງບໍລິຫານຂັ້ນຮອງຫົວໜ້າພະແນກຂຶ້ນໄປ ແລະ ວິຊາການທີ່ເຮັດວຽກງານຈັດຕັ້ງພັກ-ພະນັກງານ.
ກອງປະຊຸມໄດ້ຮັບຟັງການເຜີຍແຜ່ເນື້ອໃນທີ່ສໍາຄັນຂອງກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງທົ່ວປະເທດ ປະຈໍາປີ 2023 ແລະ ທິດທາງແຜນການປີ 2024; ບົດສະຫຼຸບຕີລາຄາວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງພາຍໃນສະພາແຫ່ງຊາດ ປະຈໍາປີ 2023 ແລະ ທິດທາງແຜນການປີ 2024; ຄໍາແນະນໍາຂອງຄະນະຈັດຕັ້ງສູນກາງພັກ ກ່ຽວກັບການປະຕິບັດມະຕິຂອງກົມການ ເມືອງສູນກາງພັກ ວ່າດ້ວຍການເລືອກເຟັ້ນ ແຕ່ງຕັ້ງ, ສັບປ່ຽນໜ້າທີ່ຂອງພະນັກງານນໍາພາ-ຄຸ້ມຄອງ ສະບັບເລກທີ 13/ຄຈສພ, ລົງວັນທີ 11 ມັງກອນ 2024; ຄໍາແນະນໍາຂອງຄະນະຈັດຕັ້ງສູກກາງພັກ ກ່ຽວກັບການປະຕິບັດມະຕິຂອງກົມການເມືອງສູນກາງພັກ ວ່າດ້ວຍການຕີລາຄາພະນັກງານ ສະບັບເລກທີ 14/ຄຈສພ, ລົງວັນທີ 11 ມັງກອນ 2024.
ໃນກອງປະຊຸມ ຍັງໄດ້ປະກາດການສັບປ່ຽນໜ້າທີ່ເລຂາທິການສະພາແຫ່ງຊາດ, ປະທານກໍາມາທິການ; ແຕ່ງ ຕັ້ງຮອງປະທານກໍາມາທິການແຜນການ, ການເງິນ ແລະ ການກວດສອບ, ກໍາມາທິການຍຸຕິທໍາ, ກໍາມາທິການການຕ່າງ ປະເທດ ແລະ ຮອງຫົວໜ້າສະຖາບັນຄົ້ນຄວ້ານິຕິກໍາ; ແຕ່ງຕັ້ງ, ຍົກຍ້າຍຫົວໜ້າກົມ ແລະ ປະກາດແຕ່ງຕັ້ງຕໍາແໜ່ງບໍລິ ຫານປະເພດ 3 (ຮອງຫົວໜ້າກົມ), ປະເພດ 4 ແລະ 5 (ຫົວໜ້າ, ຮອງຫົວໜ້າພະແນກ) ຈໍານວນໜຶ່ງ.
ໂອກາດນີ້, ສະຫາຍ ປອ. ນາງ ສູນທອນ ໄຊຍະຈັກ ໄດ້ມີຄໍາເຫັນເນັ້ນໜັກໃຫ້ຄະນະພັກສະພາແຫ່ງຊາດ, ຄະ ນະພັກຮາກຖານ, ໜ່ວຍພັກຮາກຖານ, ໜ່ວຍພັກ ສືບຕໍ່ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກສະພາແຫ່ງຊາດ ກໍຄືທິດທາງແຜນການເຄື່ອນໄຫວທ້າຍສະໄໝຂອງອົງຄະນະພັກສະພາແຫ່ງຊາດ; ບັນດາຮາກຖານພັກສະພາແຫ່ງຊາດ ຕ້ອງໄດ້ເອົາໃຈໃສ່ວຽກງານສຶກສາອົບ ຮົມການເມືອງ-ແນວຄິດໃຫ້ພະນັກງານ, ສະມາຊິກພັກທີ່ຢູ່ໃນຄວາມຮັບຜິດຊອບຂອງຕົນຢ່າງເປັນປົກກະຕິຕໍ່ເນື່ອງ ເພື່ອເປັນເອກະພາບຕໍ່ແນວທາງນະໂຍບາຍຂອງພັກ ກຳແໜ້ນແນວທາງນະໂຍບາຍຂອງພັກ, ກົດໝາຍ, ລະບຽບການຂອງລັດ, ກົດລະບຽບຂອງພັກ, ມະຕິຄຳສັ່ງຂອງຂັ້ນເທິງ ແຕ່ລະໄລຍະ ແນໃສ່ເຮັດໃຫ້ພະນັກງານ, ສະມາຊິກພັກ ມີຄຸນທາດການເມືອງທີ່ໜັກແໜ້ນ, ມີຄວາມກະຕືລືລົ້ນຕໍ່ໜ້າທີ່ການເມືອງທີ່ໄດ້ຮັບມອບໝາຍ; ເອົາໃຈໃສ່ແກ້ໄຂບັນດາປາກົດການຫຍໍ້ທໍ້ໃນຖັນແຖວພະນັກງານ, ສະມາຊິກພັກ ໃຫ້ເຂັ້ມງວດ, ຂາດຕົວ ແລະ ທັນການ; ສືບຕໍ່ຄົ້ນຄວ້າປັບປຸງກົງຈັກການຈັດຕັ້ງພາຍໃນສະພາແຫ່ງຊາດ ໃຫ້ມີຄວາມໜັກແໜ້ນ ເຂັ້ມແຂງ ສອດຄ່ອງກັບນິຕິກໍາຂອງພັກ-ລັດທີ່ວາງອອກ, ເອົາໃຈໃສ່ກວດກາຄືນການແບ່ງງານ, ແບ່ງຄວາມຮັບຜິດຊອບພາຍໃນຄະນະພັກ, ມອບໜ້າທີ່ໃຫ້ພະນັກງານ, ສະມາຊິກພັກ ສອດຄ່ອງຕາມຄວາມຮູ້ ຄວາມສາມາດ ແລະ ຕໍາແໜ່ງງານທີ່ກະຊວງພາຍໃນໄດ້ຮັບຮອງ; ເອົາໃຈໃສ່ປັບ ປຸງແບບແຜນນໍາພາ, ວິທີເຮັດວຽກ ໃຫ້ມີປະສິດທິພາບ ປະສິດທິຜົນສູງກວ່າເກົ່າ ໂດຍມີກົນໄກສະຫຼຸບລາຍງານ, ປຶກ ສາຫາລືເປັນໝູ່ຄະນະ ຕາມຫຼັກການລວມສູນປະຊາທິປະໄຕ; ຄະນະພັກ, ໜ່ວຍພັກ ຕ້ອງເອົາໃຈໃສ່ກໍ່ສ້າງຖັນແຖວສະມາຊິກພັກ, ພະນັກງານ-ລັດຖະກອນ ດ້ວຍຫຼາຍຮູບການ, ພະນັກງານ-ລັດຖະກອນເອງ ກໍຕ້ອງໄດ້ບຸກບືນຕົວ, ຊອກຮູ້ຮໍ່າຮຽນແນວທາງນະໂຍບາຍຂອງພັກ, ກົດໝາຍ, ລະບຽບການຕ່າງໆ ແລະ ມີຄວາມຮັບຜິດຊອບຕໍ່ໜ້າທີ່ການ ເມືອງທີ່ການຈັດຕັ້ງມອບໝາຍໃຫ້; ການສ້າງພັກປອດໃສ, ເຂັ້ມແຂງ ແລະ ໜັກແໜ້ນ ຕິດພັນກັບການແຂ່ງຂັນຮັກຊາດ ແລະ ພັດທະນາ ໃຫ້ມີຄຸນນະພາບ, ຕີລາຄາປະເພດສະມາຊິກພັກ, ປະເມີນຜົນການປະຕິບັດໜ້າທີ່ວຽກງານຂອງພະນັກງານ-ລັດຖະກອນປະຈໍາປີຕາມລະບຽບການ, ຄັດເລືອກຜູ້ທີ່ດີເດັ່ນເພື່ອຈັດການຍ້ອງຍໍປະຈໍາປີໃຫ້ເໝາະ ຫຼີກ ເວັ້ນການຕີລາຄາປະເມີນແບບສະເລ່ຍເອົາໃຈກັນ.
ສະຫາຍ ປອ. ນາງ ສູນທອນ ໄຊຍະຈັກ ໄດ້ກ່າວຕື່ມວ່າ: ການຍົກຍ້າຍສັບປ່ຽນໜ້າທີ່, ການແຕ່ງຕັ້ງບັນດາສະ ຫາຍມາຮັບໜ້າທີ່ໃໝ່ຢູ່ສະພາແຫ່ງຊາດ ເປັນເລື່ອງປົກກະຕິໃນການປັບປຸງກົງຈັກການຈັດຕັ້ງ ເພື່ອຕອບສະໜອງ ຄວາມຮຽກຮ້ອງຕ້ອງການຂອງໜ້າທີ່ການເມືອງໃນແຕ່ລະໄລຍະ ແລະ ແມ່ນຫຼັກການອັນໜຶ່ງຂອງພັກເຮົາໃນວຽກພະ ນັກງານ ເພື່ອປະຕິບັດຕາມທິດການຈັດວາງສັບຊ້ອນພະນັກງານ ມີຂຶ້ນ, ມີລົງ, ມີເຂົ້າ, ມີອອກ ແລະ ການສັບປ່ຽນດັ່ງ ກ່າວ ເປັນການເພີ່ມກໍາລັງແຮງໃຫ້ແກ່ສະພາແຫ່ງຊາດໃນການປະຕິບັດໜ້າທີ່ການເມືອງຂອງຕົນໃຫ້ມີປະສິດທິຜົນດີ ຂຶ້ນຕື່ມ.
(ຂ່າວ: ນາງ ກຸກກິກ ບຸດດາໄຊ, ພາບ: ສອນສັກ ວັນວິໄຊ)