(ສພຊ) ໃນວັນທີ 10 ຕຸລາ 2023 ທີ່ສະໂມສອນກົມໃຫຍ່ການເມືອງກອງທັບ ກະຊວງປ້ອງກັນປະເທດ ໄດ້ເປີດກອງປະຊຸມຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍ 2 ສະບັບຄື: ກົດໝາຍວ່າດ້ວຍການປ້ອງກັນຊາດ ແລະ ກົດໝາຍວ່າດ້ວຍນາຍທະຫານກອງທັບປະຊາຊົນລາວ ໂດຍການເປັນປະທານຂອງ ສະຫາຍ ພົນໂທ ສຸວອນ ເລືອງບຸນມີ ກໍາມະການສູນກາງພັກ ຮອງປະທານສະພາແຫ່ງຊາດ, ຫົວໜ້າຄະນະຮັບຜິດຊອບຕິດຕາມກວດກາການປະເມີນການຈັດຕັ້ງປະຕິບັດກົດໝາຍຂອງສະພາແຫ່ງຊາດ, ມີສະຫາຍ ພົນໂທ ທອງລອຍ ສິລິວົງ ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ, ມີບັນດາສະຫາຍຄະນະນໍາບັນດາກົມໃຫຍ່, ຫ້ອງການ, ຄະນະພັກ-ຄະນະບັນຊາ, ບັນດາຜູ້ແທນອົງການຈັດຕັ້ງພາກລັດ ແລະ ກອງທັບເຂົ້າຮ່ວມ.

ສະຫາຍ ພົນຕີ ສອນທອງ ພົມລາວົງ ກໍາມະການຄະນະປະຈໍາພັກກະຊວງ, ຮອງຫົວໜ້າກົມໃຫຍ່ການເມືອງກອງທັບ, ຮອງຫົວໜ້າຄະນະປະເມີນກົດໝາຍຂອງກະຊວງປ້ອງກັນປະເທດ ໄດ້ລາຍງານການປະເມີນການຈັດຕັ້ງກົດໝາຍ ວ່າດ້ວຍນາຍທະຫານກອງທັບປະຊາຊົນລາວ ແລະ ກົດໝາຍວ່າດ້ວຍການປ້ອງກັນຊາດ. ກົດໝາຍວ່າດ້ວຍນາຍທະຫານກອງທັບປະຊາຊົນລາວ ໄດ້ຖືກຮອງຮັບເອົາໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ V ສະບັບເລກທີ 07/ສພຊ, ລົງວັນທີ 22 ຕຸລາ 2004 ແລະ ຖືກປະກາດໃຊ້ຢ່າງເປັນທາງການຕາມລັດຖະດໍາລັດຂອງປະທານປະເທດ ສະບັບເລກທີ 69/ສປປລ, ລົງວັນທີ 15 ພະຈິກ 2004 ເຊິ່ງປະກອບມີ 7 ໝວດ, 33 ມາດຕາ ພາຍຫຼັງຮັບຮອງເອົາກົດໝາຍນາຍທະຫານກອງທັບປະຊາຊົນລາວ ໄດ້ເປັນບ່ອນອີງສໍາຄັນໃຫ້ກະຊວງປ້ອງກັນປະເທດໃນການຄຸ້ມຄອງ ແລະ ກວດກາການເຄື່ອນໄຫວວຽກງານຂອງນາຍທະຫານໂດຍກົງຢ່າງຮອບດ້ານ, ເຮັດໃຫ້ນາຍທະຫານມີຄວາມໜັກແໜ້ນທາງດ້ານການເມືອງແນວຄິດ, ເຂັ້ມແຂງທາງດ້ານການຈັດຕັ້ງ, ມີລະບຽບວິໄນເຂັ້ມງວດ, ມີແບບແຜນທັນສະໄໝ, ເຮັດສໍາເລັດໜ້າທີ່ອັນມີກຽດ ເຮັດໃຫ້ກອງທັບປະຊາຊົນລາວມີຄວາມເຂັ້ມແຂງ ແລະ ເຕີບໃຫຍ່ຂະຫຍາຍຕົວເປັນກ້າວໆມາ ສ່ວນກົດໝາຍວ່າດ້ວຍການປ້ອງກັນຊາດ ສະບັບເລກທີ 67/ສພຊ, ລົງວັນທີ 11 ທັນວາ 2015 ຖືກຮັບຮອງໃນກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VII ເປັນສະບັບທໍາອິດ ໂດຍກຳນົດກ່ຽວກັບການຄຸ້ມຄອງຕິດຕາມ ກວດກາກ່ຽວກັບວຽກງານປ້ອງກັນຊາດ, ຍົກສູງການຊີ້ນຳບັນຊາ, ການປະຕິບັດໜ້າທີ່ຂອງກຳລັງປ້ອງກັນຊາດ ເຮັດໃຫ້ວຽກງານປ້ອງກັນຊາດ ເປັນຄວາມຮັບຜິດຊອບຂອງທົ່ວປວງຊົນລາວ ເຊິ່ງປະກອບມີ 10 ພາກ, 8 ໝວດ ແລະ 65 ມາດຕາ.

ກົດໝາຍວ່າດ້ວຍການປ້ອງກັນຊາດ ເປັນບ່ອນອີງທີ່ສໍາຄັນໃນການເຄື່ອນໄຫວເຮັດໜ້າທີ່ວຽກງານປ້ອງ ກັນຊາດທົ່ວປວງຊົນຮອບດ້ານ ແລະ ທຸກກະຊວງ, ອົງການ ແລະ ປະຊາຊົນລາວທຸກຊັ້ນຄົນ ມີໜ້າທີ່ໃນການຈັດຕັ້ງປະຕິບັດ ໂດຍແມ່ນກຳລັງປະກອບອາວຸດປະຊາຊົນເປັນຫຼັກແຫຼ່ງ. ຈາກນັ້ນ, ບັນດາຄະນະຜູ້ແທນກອງປະຊຸມ ໄດ້ຜັດປ່ຽນກັນປະກອບຄໍາຄິດເຫັນຕໍ່ກົດໝາຍທັງສອງສະບັບຢ່າງກົງໄປກົງມາ ແລະ ມີແນວຄິດສ້າງສັນ ເພື່ອເຮັດໃຫ້ກອງປະຊຸມຕິດຕາມກວດກາປະເມີນຜົນການຈັດຕັ້ງປະຕິບັດກົດໝາຍຄັ້ງນີ້ ມີເນື້ອໃນສົມບູນຄົບຖ້ວນ ແທດເໝາະກັບສະພາບຕົວຈິງໃນແຕ່ລະໄລຍະ ທັງເປັນການແລກປ່ຽນ, ຖອດຖອນບົດຮຽນ ເຊິ່ງກັນ ແລະ ກັນ ກາຍເປັນເຄື່ອງມືອັນສໍາຄັນໃຫ້ພັກ-ລັດໃນການຄຸ້ມຄອງນາຍທະຫານແບບລວມສູນ ແລະ ເປັນບ່ອນອີງໃຫ້ ກະຊວງປ້ອງກັນປະເທດ ໃນການຄຸ້ມຄອງບັນຊານາຍທະຫານໂດຍກົງຮອບດ້ານ ແນໃສ່ຮັບປະກັນໃຫ້ປະເທດຊາດມີສະຖຽນລະພາບທາງດ້ານການເມືອງ ມີຄວາມໝັ້ນຄົງ ສາມາດເຊື່ອມໂຍງກັບພາກພື້ນ ແລະ ສາກົນ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)