ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 29-30 ເມສາ 2022 ນີ້. ທ່ານ ຄຳຈັນ ໂສຕາປະເສີດ ກຳມະການຄະນະປະຈໍາ ສະພາແຫ່ງຊາດ (ສພຊ) ປະທານກຳມາທິການບັນດາເຜົ່າ ສພຊ ພ້ອມດ້ວຍຄະນະ ໄດ້ລົງເຄື່ອນໄຫວ ຕິດຕາມກວດກາ ແລະ ເກັບກໍາຂໍ້ມູນ ການຈັດຕັ້ງປະຕິບັດກົດໝາຍ 4 ສະບັບ ທີ່ຕິດພັນກັບວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ ຢູ່ແຂວງອັດຕະປື ໂດຍໄດ້ສົມທົບກັບ ທ່ານ ນາງ ມີນາພອນ ໄຊສົມພູ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືຶອກຕັ້ງທີ 17 ປະທານສະພາປະຊາຊົນແຂວງ (ສພຂ) ພ້ອມດ້ວຍຄະນະ. ໃນໂອກາດນີ້ ໄດ້ຈັດກອງປະຊຸມເຮັດວຽກຮ່ວມກັນ ທີ່ຫ້ອງປະຊຸມ ສພຂ ເຊິ່ງມີບັນທ່ານ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 17, ຄະນະປະຈໍາ ສພຂ, ຄະນະກຳມະການ, ຄະນະເລຂາທິການ, ເຈົ້້າເມືອງ-ຮອງເຈົ້າເມືອງ 5 ເມືອງ ແລະ ພະແນກການທີ່ກ່ຽວຂ້ອງເຂົ້າຮ່ວມ.

ວາລະໃນການດຳເນີນກອງປະຊຸມ ໄດ້ຮັບຟັງການລາຍງານຈາກຕາງໜ້າພະແນກການ ກ່ຽວກັບການຈັດຕັ້ງປະຕິບັດກົດໝາຍວ່າດ້ວຍການສົ່ງເສີມການລົງທືນ, ກົດໝາຍວ່າດ້ວຍຊັບສີນຂອງລັດ, ກົດໝາຍວ່າດ້ວຍທີ່ດີນ ແລະ ກົດໝາຍວ່າດ້ວຍແຮ່ທາດ ໂດຍໄດ້ລົງເລີກກ່ຽວກັບດ້ານນະໂຍບາຍ, ກົນໄກສົ່ງສົ່ງເສີມການລົງທຶນຜ່ານປະຕູດຽວ, ການແບ່ງຂັ້ນຄຸ້ມຄອງ,ການພິຈາລະນາອະນຸມັດການລົງທຶນ, ການຄຸ້ມຄອງເຂດເສດຖະກິດ, ການຄຸ້ມຄອງຊັບສີນຂອງລັດ, ການຫັນຊັບສີນເປັນທຶນ, ການຫັນຊັບສີນຂອງລັດ ດ້ວຍຮູບການໃຫ້ເຊົ່າ ຫລື ຂາຍຂາດຕົວ, ການຄຸ້ມຄອງການເຊົ່າ ແລະ ສຳປະທານທີ່ດີນ, ການຈັດສັນທີ່ດີນ, ການຫັນປ່ຽນກຳມະສິດທີ່ດີນຂອງບຸກຄົນ ນິຕິບຸກຄົນ, ພິຈາລະນາອະນຸມັດການສຳປະທານບໍ່ແຮ່, ການຄຸ້ມຄອງການສຳປະທານບໍ່ແຮ່, ການສຳຫລວດ, ການຂຸດຄົ້ນ ແລະ ດ້ານອື່ນໆ. ຈາກນັ້ນ ຜູ້ເຂົ້າຮ່ວມກອງປະຊຸມ ໄດ້ແລກປ່ຽນ ປະກອບຄໍາຄິດຄໍາເຫັນ ຕໍ່ກັບການຈັດຕັ້ງປະຕິບັດກົດໝາຍດັ່ງກ່າວ ຢ່າງພາວະວິໄສ ແລະ ກົງໄປກົງມາ,  ການປະເມີນການຈັດຕັ້ງປະຕິບັດກົດໝາຍ 4 ສະບັບ ເປັນວຽກງານໜຶ່ງທີ່ມີຄວາມໝາຍສຳຄັນ ແລະ ຈໍາເປັນຢ່າງຍິ່ງ ໃນຂະບວນການສ້າງ, ປັບປຸງ ແລະ ຈັດຕັ້ງປະຕິບັດກົດໝາຍ ຂອງສະພາແຫ່ງຊາດ ແລະ ລັດຖະບານຊຶ່ງຕິດພັນກັບການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງີນ ໃຫ້ມີປະສິດທິພາບ ແລະ ປະສິດທິຜົນ ພ້ອມທັງເປັນການສະຫລຸບຖອດຖອນບົດຮຽນ ໃຫ້ແກ່ການຈັດຕັ້ງປະຕິບັດກົດໝາຍ ຢູ່ໃນຂົງເຂດຕ່າງໆໃນຕໍ່ໜ້າ ແລະ ເພື່ອເປັນຂໍ້ມູນໃຫ້ຄະນະປະຈໍາສະພາແຫ່ງຊາດລາຍງານຕໍ່ກອງປະຊຸມສະໄໝສາມັນເທື່ອທີ 3 ຂອງ ສະພາແຫ່ງຊາດ ຊຸດທີ 9 ເພື່ອພິຈາລະນ ຮັບຮອງ.

ນອກຈາກນີ້ ຄະນະຈາກສະພາແຫ່ງຊາດ, ສະພາປະຊາຊົນແຂວງ ແລະ ພະແນກການກ່ຽວຂ້ອງ ໄດ້ເດີ່ນທາງຢ້ຽມຍາມ ແລະ ເຮັດວຽກ ຢູ່ ໂຄງການຂຸດຄົ້ນ ແລະ ປຸງແຕ່ງແຮ່ຄຳວັງຕັດ ເມືອງຊານໄຊ ໂດຍການຕ້ອນຮັບຂອງ ທ່ານ ບຸ່ຍແອັງດຶ໋ ປະທານ ບໍລິສັດ ວັງຕັດຂຸດຄົ້ນບໍ່ແຮ່ ຈໍາກັດ ໂອກາດດັ່ງກ່າວໄດ້ຮັບຟັງການລາຍງານໂດຍຫຍໍ້ໃນການເຄື່ອນໄຫວດຳເນີນໂຄງການ ເຊິ່ງບໍລິສັດວັງຕັດຂຸດຄົ້ນບໍ່ແຮ່ ຈຳກັດ ໄດ້ສ້າງຕັ້ງຂື້ນໃນປີ 2009 ໄດ້ປະຕິບັດດຳເນີນໂຄງການ ຊອກຄົ້ນ ສະຫລວດ ແລະ ຂຸດຄົ້ນແຮ່ທາດ ທີ່ເຂດຈຸດສຸມວັງຕັດ ເມືອງຊານໄຊ ແຂວງອັດຕະປື ນອນໃນເຂດພູມສັນຖານເນີນພູ ເນື້ອທີ່ຊອກຄົ້ນ ສຳຫລວດທັງໝົດ 339.1 ກມ2 ເນື້ອທີ່ ທີ່ໄດ້ຮັບອະນຸຍາດຂຸດຄົ້ນ 18 ກມ2, ໄດ້ສຸມໃສ່ ສຳຫລວດ ເປີດກວ້າງເນື້ອທີ່ ທີ່ໄດ້ຮັບອະນຸຍາດຊອກຄົ້ນສຳຫລວດ ແລະ ສຸມໃສ່ສຳຫລວດເລີກໃນບັນດາພື້ນທີ່ ທີ່ໄດ້ຮັບອະນຸຍາດຂຸດຄົ້ນ ເພື່ອແນ່ໃສ່ປະເມີນລາຄາທີ່ແນນອນທາງດ້ານຄຸນນະພາບ ແລະ ປະລິມານສະສົມແຮ່ທີ່ນຳເຂົ້າການຜະລິດ ໄດ້ດຳເນີການເຊັນສັນຍາໜ່ວຍງານບັນຊີເຈາະສຳຫລວດທີ່ມີຊື່ສຽງລະດັບສາກົນ ດຳເນີນການຊີເຈາະລວມໄດ້ປະລິມາດ 60,000 ແມັດ. ຄະນະຈາກສະພາແຫ່ງຊາດ, ສະພາປະຊາຊົນແຂວງ ແລະ ພະແນກການກ່ຽວຂ້ອງ ຍັງໄດ້ຢ່ຽມຍາມ ໂຮງງານນ້ຳຕານອ້ອຍ TTC ຢູ່ເມືອງ ພູວົງ ແຂວງອັດຕະປື ຕື່ມອີກ.

(ວິນັດ ສີສຸລາດ)