(ສພຊ) ເພື່ອໂຄສະນາເຜີຍແຜ່ພາລະບົດບາດ ແລະ ການເຄື່ອນໄຫວຂອງສະພາແຫ່ງຊາດ ແຕ່ລະດ້ານເຊັ່ນ: ນິຕິບັນຍັດ, ການຕົກລົງບັນຫາສຳຄັນພື້ນຖານຂອງຊາດ, ການຕິດຕາມກວດກາ, ການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ, ການເຄື່ອນໄຫວຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ການເຄື່ອນໄຫວວຽກງານຕ່າງປະເທດ, ບັນດາກົດໝາຍຕ່າງໆ ແລະ ການເຜີຍ ແຜ່ຜົນສຳເລັດຂອງກອງປະຊຸມຕ່າງໆ ໂດຍຜ່ານສື່ສິ່ງພິມ, ສື່ເອເລັກໂຕຣນິກຂອງສະພາແຫ່ງຊາດ ໃຫ້ມີ ເນື້ອໃນເລິກເຊິ່ງ, ຫຼາກຫຼາຍສີສັນ ເຜີຍແຜ່ຢ່າງກວ້າງຂວາງໃນທົ່ວປະເທດ ເພື່ອປັບປຸງການສ້າງເຄືອຂ່າຍການຕອບສະໜອງຂໍ້ມູນ-ຂ່າວສານ ຂອງທ້ອງຖິ່ນ ໃຫ້ກັບໜັງສືພິມ, ວິທະຍຸ ແລະ ລາຍການໂທລະພາບ “ຜູ້ແທນປະຊາຊົນ” ຂອງສະພາແຫ່ງຊາດຢ່າງສະໝໍ່າສະເໝີ, ປັບປຸງ ແລະ ຍົກລະດັບ ການຂີດຂຽນຂອງພະນັກງານສະພາແຫ່ງຊາດ ແລະ ສະພາປະຊາຊົນຂັ້ນແຂວງ/ນະຄອນຫຼວງ ໃຫ້ມີຄວາມຊ່ຽວຊານດ້ານການເປັນນັກຂ່າວປະຈຳແຕ່ລະແຂວງໃນທົ່ວປະເທດ. ໃນວັນທີ 9 ຕຸລາ 2023 ທີ່ເມືອງວັງວຽງ ແຂວງວຽງຈັນ ໄດ້ມີກອງປະຊຸມເຝິກອົບຮົມກ່ຽວກັບວຽກງານສື່ມວນຊົນ ໃຫ້ບັນດາພະນັກງານຂອງຄະນະເລຂາທິການສະພາປະຊາຊົນຂັ້ນແຂວງ ທົ່ວປະເທດ ໃນຫົວຂໍ້: ການຂຽນຂ່າວ, ບົດ ແລະ ການເປັນໂຄສົກ ເພື່ອຈັດລາຍການວິທະຍຸ ແລະ ພິທີກອນລາຍການໂທລະພາບ ຜູ້ແທນປະຊາຊົນ ໂດຍການເປັນປະທານຂອງທ່ານ ສິງຄຳ ວົງພະຈັນ ຮອງເລຂາທິການສະພາແຫ່ງຊາດ, ຜູ້ຊີ້ນຳວຽກງານສື່ມວນຊົນ, ມີທ່ານ ປອ. ພິດສະໄໝ ບຸນວິໄລ ຫົວໜ້າກົມສື່ມວນຊົນ, ບັນດາທ່ານຮອງຫົວໜ້າກົມສື່ມວນຊົນ; ຮອງເລຂາທິການສະພາປະຊາຊົນແຂວງ; ວິທະຍາກອນຈາກໜັງສືພິມປະຊາຊົນ, ຫ້ອງການຄຸ້ມຄອງຫໍສະພາແຫ່ງຊາດ, ໂທລະພາບແຫ່ງຊາດລາວ ແລະ ບໍລິສັດ MTS ປັບປຸງເວັບໄຊ ຂອງສະພາແຫ່ງຊາດ; ຄະນະພະແນກ ພ້ອມດ້ວຍພະນັກງານ-ວິຊາການຈາກກົມສື່ມວນຊົນ ແລະ ສະພາປະຊາຊົນແຂວງ 18 ແຂວງທົ່ວປະເທດ.
ກອງປະຊຸມ ໄດ້ຮຽນຮູ້ກ່ຽວກັບຫຼັກການໃນການຂຽນຂ່າວ ແລະ ບົດ ລົງໜັງສືພິມ; ບົດຮຽນເວັບໄຊ ແລະ ບັນດາສື່ອອນລາຍຕ່າງໆ; ການຈັດທຳລາຍການໂທລະພາບ ແລະ ເປັນພິທີກອນລາຍການໂທລະພາບ; ການຖ່າຍພາບນິ້ງ, ວິດີໂອ ແລະ ສາລະຄະດີ; ບົດຮຽນສາລະຄະດີ ແລະ ການຕັດຕໍ່ສາລະຄະດີ; ຈາກນັ້ນ, ບັນດາຜູ້ເຂົ້າຮ່ວມ ໄດ້ຈັດແບ່ງເປັນກຸ່ມ ແລະ ເຮັດເຝິກຫັດຕົວຈິງ ພ້ອມທັງໄດ້ມີການກວດແກ້ ແລະ ສົນທະນາຖາມ-ຕອບ ໃນຫົວຂໍ້ທີ່ມີຄວາມສົນໃຈ.
ໃນໂອກາດນີ້, ທ່ານ ສິງຄຳ ວົງພະຈັນ ໄດ້ມີຄຳເຫັນກ່າວເປີດກອງປະຊຸມວ່າ: ກອງປະຊຸມເຝິກອົບຮົມວຽກງານສື່ມວນຊົນຄັ້ງນີ້ ແມ່ນເພື່ອຍົກລະດັບຄວາມຮູ້, ຄວາມສາມາດ ແລະ ພັດທະນາທາງດ້ານວິຊາການ ໃຫ້ທ່ວງທັນກັບສະພາບໃນໄລຍະໃໝ່ ໃຫ້ພະນັກງານກົມສື່ມວນຊົນ ແລະ ບັນດາສະພາປະຊາຊົນຂັ້ນແຂວງ ທັງເປັນການຍົກສູງຄຸນນະພາບຂອງວຽກງານສື່ມວນຊົນ ໃນຖານະເປັນກະບອກສຽງຂອງ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອໂຄສະນາເຜີຍແຜ່ການເຄື່ອນໄຫວຂອງອົງການນິຕິບັນຍັດ ເປັນຕົ້ນແມ່ນການຈັດຕັ້ງປະຕິບັດ 3 ພາລະບົດບາດ ຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ ໃຫ້ບັນດາອົງການຈັດຕັ້ງທັງສູນກາງ ແລະ ທ້ອງຖິ່ນ, ມວນຊົນຮັບຮູ້ ແລະ ເຂົ້າໃຈຢ່າງກວ້າງຂວາງ; ພ້ອມນັ້ນ, ທ່ານຍັງໄດ້ຮຽກຮ້ອງມາຍັງບັນດາສໍາມະນາກອນທີ່ເຂົ້າຮ່ວມເຝິກອົບຮົມ ເອົາໃຈໃສ່ປະຕິບັດລະບຽບຂອງກອງປະຊຸມຢ່າງເຂັ້ມງວດ, ເຊີດຊູສະຕິປັນຍາ ແລະ ຄວາມຮັບຜິດຊອບການເມືອງຂອງຕົນ ເພື່ອສຸມໃສ່ຄົ້ນຄວ້າ, ປຶກສາຫາລືແລກປ່ຽນ, ປະກອບຄຳເຫັນ ແລະ ເກັບກຳຂໍ້ມູນບົດຮຽນຕ່າງໆ ທີ່ບັນດາທ່ານວິທະຍາກອນໄດ້ຖ່າຍທອດ ແລະ ບັນລະຍາຍຢູ່ກອງປະຊຸມ ເພື່ອເຮັດໃຫ້ກອງປະຊຸມເຝິກອົບຮົມຄັ້ງນີ້ ບັນລຸຜົນສຳເລັດອັນຈົບງາມຕາມຄາດໝາຍທີ່ວາງໄວ້.
ກອງປະຊຸມຄັ້ງນີ້, ຈະໄດ້ດຳເນີນໄປຈົນຮອດວັນທີ 11 ຕຸລາ 2023 ຈຶ່ງຈະສຳເລັດ.
(ພາບ ແລະ ຂ່າວ: ນາງ ສຸພາວັນ ຫອມສະນິດ)