​(ສພຊ) ເພື່ອເປັນການປະດັບຫຼຽນກາ 65 ປີ ຄະນະຊາວໜຸ່ມປະຊາຊົນປະຕິວັດລາວ ໃຫ້ກັບການນໍາຂັ້ນສູງສະ ພາແຫ່ງຊາດ, ຄະນະບໍລິຫານງານ, ອະດີດການນໍາຮຸ່ນອາວຸໂສ ແລະ ສະມາຊິກຊາວໜຸ່ມ ພາຍໃນສະພາແຫ່ງຊາດ ຜູ້ທີ່ມີຜົນງານພົ້ນເດັ່ນໃນການຈັດຕັ້ງປະຕິບັດວຽກງານຊາວໜຸ່ມ ໃນຕອນບ່າຍຂອງວັນທີ 1 ກຸມພາ 2023 ທີ່ສະພາແຫ່ງຊາດ ຄະນະບໍລິຫານງານຊາວໜຸ່ມສະພາແຫ່ງຊາດ ໄດ້ຈັດພິທີມອບຫຼຽນກາທີ່ລະນຶກ ວັນສ້າງຕັ້ງຄະນະຊາວໜຸ່ມປະຊາ ຊົນປະຕິວັດລາວ ຄົບຮອບ 65 ປີ (ວັນທີ 14 ເມສາ 1955-14 ເມສາ 2020) ໃຫ້ການນໍາຂັ້ນສູງ ແລະ ຊາວໜຸ່ມປະຊາຊົນປະຕິວັດລາວສະພາແຫ່ງຊາດ ໂດຍການເປັນປະທານຂອງສະຫາຍ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ມີບັນດາການນໍາ, ອະດີດການນໍາສະພາແຫ່ງຊາດ, ສະຫາຍ ມອນໄຊ ລາວມົວຊົງ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ແລະ ບັນດາສະມາຊິກຊາວໜຸ່ມ ພາຍໃນສະພາແຫ່ງຊາດ.

ໃນພິທີ, ຜູ້ເຂົ້າຮ່ວມ ໄດ້ຮັບຟັງການກ່າວຈຸດປະສົງພິທີມອບຫຼຽນກາລະນຶກ 65 ປີ; ຜ່ານຂໍ້ຕົກລົງຂອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ວ່າດ້ວຍການມອບຫຼຽນກາລະນຶກ 65 ປີ; ມອບຫຼຽນຊາວໜຸ່ມຕະລຸມບອນ ແລະ ຫຼຽນກາລະນຶກ ໃຫ້ການນໍາຂັ້ນສູງ ແລະ ມອບຫຼຽນໃຫ້ບັນດາສະຫາຍ ຮອງປະທານກໍາມາທິການ, ຮອງເລຂາທິການສະພາແຫ່ງຊາດ, ຫົວໜ້າ-ຮອງຫົວໜ້າສະຖາບັນຄົ້ນຄວ້ານິຕິກໍາ ສະພາແຫ່ງຊາດ, ຄະນະບໍລິຫານງານຊາວໜຸ່ມ, ບັນດາເລຂາໜ່ວຍຊາວໜຸ່ມ ແລະ ສະມາຊິກຊາວໜຸ່ມສະພາແຫ່ງຊາດ ເຊິ່ງມອບຫຼຽນກາຕະລຸມບອນຊາວໜຸ່ມ ແລະ ຫຼຽນກາລະນຶກ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ 65 ປີ ໃຫ້ແກ່ການນໍາຂັ້ນສູງສະພາແຫ່ງຊາດຄື: ສະຫາຍ ປອ. ໄຊສົມພອນ ພົມວິຫານ ປະທານສະພາແຫ່ງຊາດ, ສະຫາຍ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ສະຫາຍ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ສະຫາຍ ຄໍາໃບ ດໍາລັດຮອງປະທານສະພາແຫ່ງຊາດ, ສະຫາຍ ປອ. ລິນຄໍາ ດວງສະຫວັນ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ສະຫາຍ ບຸນຕາ ເທບພະວົງ ຮອງປະທານກໍາມາທິການແຜນການ ການເງິນ ແລະ ການກວດສອບ, ສະຫາຍ ບຸນປອນ ບຸດຕະນະວົງ ອະດີດຮອງປະທານສະພາແຫ່ງຊາດ ແລະ ມອບຫຼຽນກາລະນຶກ 65 ປີ ຂອງຊາວໜຸ່ມ ໃຫ້ສະມາຊິກຊາວໜຸ່ມສະພາແຫ່ງຊາດ ລວມທັງໝົດ 165 ສະຫາຍ.

(ພາບ ແລະ ຂ່າວ: ສອນສັກ ວັນວິໄຊ)