ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

        ສະພາປະຊາຊົນ ນະຄອນຫຼວງວຽງຈັນ ຈັດຕັ້ງປາຖະກະຖາ ເນື່ອງໃນໂອກາດ ວັນຍຶດອຳນາດ 23 ສິງຫາ ຄົບຮອບ 47 ປີ (23 ສິງຫາ 1975-23 ສິງຫາ 2022), ວັນລັດຖະທໍາມະນູນແຫ່ງ ສປປ ລາວ ຄົບຮອບ 31 ປີ (15 ສິງຫາ – 15 ສິງຫາ 2022) ແລະ ມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI.

ໃນຕອນເຊົ້າຂອງວັນທີ 13 ກັນຍາ 2022 ຢູ່ທີ່ຫ້ອງປະຊຸມສຳນັກງານ ຫ້ອງວ່າການນະຄອນຫຼວງວຽງຈັນ ໄດ້ຈັດຕັ້ງປາຖະກະຖາ ໂດຍການເປັນປະທານ ຂອງທ່ານ ນາງ ລຳພອຍ ສີອັກຄະຈັນ, ກຳມະການປະຈຳພັກ ນະຄອນຫຼວງ ຮອງປະທານ ສະພາປະຊາຊົນ ນະຄອນຫຼວງວຽງຈັນ, ມີບັນດາຮອງປະທານ ຄະນະກຳມະການ, ຄະນະເລຂາທິການ ຫົວໜ້າ-ຮອງຫົວໜ້າຂະແໜງ ແລະ ພະນັກງານ-ລັດຖະກອນ ຂອງສະພາປະຊາຊົນ ເຂົ້າຮ່ວມຢ່າງພ້ອມພຽງ.

ທ່ານ ນາງ ລຳພອຍ ສີອັກຄະຈັນ ໄດ້ກ່າວຫວນຄືນມູນເຊື້ອປະຫວັດຄາມເປັນມາ ຂອງການຕໍ່ສູ້ກູ້ຊາດທີ່ມີປະສາດອັນຍາວນານ ເຊິ່ງສະແດງໃຫ້ເຫັນເຖິງໄລຍະທີ່ເຂັ້ມແຂງ, ຈະເລີນຮຸ່ງເຮືອງ ແລະ ມີທັງໄລຍະອ່ອນແອ, ຊຸກໂຊມເປັນເມືອງຂຶ້ນຂອງສັກດິນາຕ່າງດ້າວຫຼາຍຍຸກຫຼາຍສະໄໝຜ່ານມາ. ຈາກນັ້ນ, ກໍ່ໄດ້ສະແດງໃຫ້ເຫັນເຖິງມູນເຊື້ອວັນຍຶດອຳນາດ 23 ສິງຫາ ເຊິ່ງເປັນຂີດໝາຍສຳຄັນຂອງປວງຊົນລາວບັນດາບັນດາເຜົ່າ, ເປັນມູນເຊື້ອຮັກຊາດຢ່າງດູດດື່ມ ຂອຊາວລາວທີ່ຕໍ່ສູ້ຢ່າງພິລະອາດຫານບໍ່ຍອມຈຳນົນ, ຫວງແຫນສັນຕິສຸກ, ບໍ່ຍອມໃຫ້ຊາດໃດມາກົດຂີ່ຂົ່ມເຫັງປະຊາຊົນລາວທັງຊາດໄດ້ລຸກຂຶ້ນຕໍ່ສູ້ຕ້ານພວກລ່າເມືອງຂື້ນແບບເກົ່າ ແລະ ແບບໃໝ່ ຢ່າງເນື່ອງນິດລຽນຕິດ ຂອງເລົ່ານັກຮົບປະຕິວັດໃນເມື່ອກ່ອນ ໂດຍພາຍໃຕ້ການນຳພາຂອງ ພັກປະຊາຊົນ ປະຕິວັດລາວ ເຮັດໃຫ້ປວງຊົນລາວທັງຊາດ ຍາດໄດ້ໄຊຊະນະໂດຍນຳໃຊ້ 3 ບາດຂ້ອນຍຸດທະສາດ, ໄຊຊະນະດັ່ງກ່າວແມ່ນໝາກຜົນຂອງການຕໍ່ສູ້ອັນຍືດເຍື້ອຍາວນານ ຂອງປະຊາຊົນລາວບັນດາເຜົ່າ ເພື່ອຍຶດອຳນາດການປົກຄອງປະເທດ (ແບບບົວບໍ່ຊໍ້ານ້ຳບໍ່ຂຸ່ນ) ເຊິ່ງແມ່ນໄຊຊະນະທີ່ປະຕິບັດຕາມແນວທາງອັນຖືກຕ້ອງ ແລະ ການນຳພາອັນສະຫຼາດສ່ອງໃສຂອງພັກ ທັງແມ່ນໝາກຜົນແຫ່ງຄວາມສາມັກຄີເປັນຈິດໜຶ່ງໃຈດຽວ ຂອງປວງຊົນລາວທັງຊາດ. ພ້ອມນັ້ນ, ຍັງໄດ້ຍົກໃຫ້ເຫັນເຫັນເຖິງຄວາມໝາຍຄວາມສຳຄັນ ຂອງລັດຖະທຳມະນູນ ແຫ່ງ ສປປ ລາວ ເຊິ່ງລັດຖະທຳມະນູນເປັນກົດໝາຍພື້ນຖານ ຂອງຊາດ, ເປັນກົດໝາຍພື້ນຖານ ຂອງລະບອບປະຊາທິປະໄຕ ປະຊາຊົນລາວເພື່ອສຶກສາອົບຮົມ ປະຊາຊົນລາວບັນດາເຜົ່າ  ໃຫ້ຍົກສູງນ້ຳໃຈຮັກຊາດ, ຮັກລະບອບໃໝ່ ເພີ່ມຄວາມສາມັກຄີປອງດອງທົ່ວປວງຊົນລາວທັງຊາດເປັນຂີດໝາຍໃໝ່ແຫ່ງການຫັນໄປສູ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແລະ ສ້າງລັດແຫ່ງກົດໝາຍເທື່ອລະກ້າວ ລັດຖະທຳມະນູນເປັນການຢັ້ງຢືນຕໍ່ຊາວໂລກກ່ຽວກັບຄວາມເປັນເອກະລາດ ແລະ ພື້ນແຜ່ນດິນອັນຄົບຖ້ວນ ຂອງ ສປປ ລາວ ຕາມແນວທາງປ່ຽນແປງໃໝ່ແນໃສ່ເຮັດໃຫ້ປະເທດຊາດມັ່ງຄັ່ງເຂັ້ມແຂງ, ປະຊາຊົນ ຮັ່ງມີຜາສຸກ, ສັງຄົມມີຄວາມປອງດອງ, ມີປະຊາທິປະໄຕ, ຍຸຕິທຳ ແລະ ສີວິໄລ.

ໃນຕອນທ້າຍ ທ່ານ ນາງລຳພອຍ ສີອັກຄະຈັນຍັງໄດ້ ເຜີຍແຜ່ເອກະສານ ມະມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI ໃຫ້ຜູ້ເຂົ້າຮ່ວມກອງປະຊຸມໃນຄັ້ງນີ້ໄດ້ເຊື່ອມຊຶມ ຕື່ມອີກ.