ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 20 ເມສາ 2022, ສະພາປະຊາຊົນ ນະຄອນຫຼວງວຽງຈັນ ໄດ້ດໍາເນີນກອງປະຊຸມຝຶກອົບຮົມ ການສ້າງຄວາມເຂັ້ມແຂງໃຫ້ແກ່ພະນັກງານ-ລັດຖະກອນ ພາຍໃນສະພາປະຊາຊົນ ນະຄອນຫຼວງວຽງຈັນ ແລະ ຄະນະຊ່ວຍວຽກຂອງຄະນະສະມາຊິກ ສະພາປະຊາຊົນ ນະຄອນຫຼວງວຽງຈັນ ປະຈຳເຂດເລືອກຕັ້ງເມືອງ ທົ່ວນະຄອນຫຼວງ ໂດຍການເປັນປະທານຂອງ ທ່ານ ນາງ ລໍາພອຍ ສີອັກຄະຈັນ ກຳມະການປະຈຳພັກ ນະຄອນຫຼວງ,​ ຮອງປະທານ ສະພາປະຊາຊົນ ນະຄອນຫຼວງວຽງຈັນ ເຂົ້າຮ່ວມໂດຍ ທ່ານບຸນທາມ ພຸດທະວົງສາ ຮອງປະທານຄະນະສະມາຊິກ ສະພາແຫ່ງຊາດ ປະຈຳເຂດເລືອກຕັ້ງທີ 1, ຮອງປະທານສະພາປະຊາຊົນ ນວ, ບັນດາທ່ານກຳມະການຄະນະປະຈຳ ສະພາປະຊາຊົນ ນວ, ຮອງປະທານຄະນະກຳມະການ ຂອງສະພາປະຊາຊົນ ນວ, ຄະນະເລຂາທິການ, ວິທະຍາກອນທີ່ຖືກເຊີນ, ສໍາມະນາກອນຈາກ 09 ເມືອງ ນວ ແລະ ພະນັກງານພາຍໃນສະພາປະຊາຊົນ ນວ ເຊິ່ງຈະໄດ້ດຳເນີນໃນລະຫວ່າງວັນທີ 20-22 ເມສາ 2022 ເປັນເວລາ 03 ວັນລັດຖະການ ທີ່ເມືອງວັງວຽງ, ແຂວງວຽງຈັນ.

ທ່ານ ນາງ ລຳພອຍ ສີອັກຄະຈັນ ກຳມະການປະຈຳພັກ ນະຄອນຫຼວງ,​ ຮອງປະທານ ສະພາປະຊາຊົນ ນະຄອນຫຼວງ ໄດ້ກ່າວວ່າ: ກອງ​ປະຊຸມ​ຝຶກ​ອົບຮົມ​ຄັ້ງ​ນີ້, ​ແມ່ນຈັດ​ຂຶ້ນ​ເພື່ອຍົກລະດັບຄວາມຮູ້ຄວາມສາມາດ ໃນການເປັນເສນາທິການດ້ານຕ່າງໆ ແກ່ພະນັກງານວິຊາການ ໃຫ້​ມີ​ປະສິດທິພາບ​ເພີ່ມ​ຂຶ້ນ, ທັງ​ຢູ່​ໃນ​ໄລຍະ​ທີ່​ພວກ​ເຮົາກໍາລັງ​ກະ ກຽມກອງ​ປະຊຸມ ​ສະ​ໄໝສາມັນ ​ເທື່ອ​ທີ 3 ຂອງ​ສະພາ​ປະຊາ​ຊົນ ນະຄອນຫຼວງ​ວຽງຈັນ ຊຸດ​ທີ II. ດັ່ງ​ນັ້ນ, ການຝຶກອົບຮົມກ່ຽວກັບການປະຕິບັດພາລະບົດບາດ ການເປັນເສນາທິການໃຫ້ແກ່ ສະພາປະຊາຊົນ ຈຶ່ງ​ມີ​ຄວາມ​ສໍາຄັນ​ເປັນ​ຢ່າງ​ຍິ່ງ ​ແລະ ​ເປັນ​ໂອກາດ​ດີ ທີ່​ຈະໄດ້ຍົກລະດັບຄວາມຮູ້, ຄວາມສາມາດ ແລະ ແລກປ່ຽນຄວາມ​ຄິດ​ເຫັນ​​ເຊິ່ງກັນ ​ແລະ ກັນ ໃນການປະຕິບັດໜ້າທີ່ວຽກງານໃນໄລຍະຜ່ານມາ.

ການປະຕິບັດພາລະບົດບາດເປັນເສນາທິການ​ຮອບດ້ານໃຫ້ແກ່ ສະພາປະຊາຊົນ ເປັນຕົ້ນ ການກະກຽມເນື້ອໃນກອງປະຊຸມ ຂອງສະພາປະຊາຊົນ, ການຄົ້ນຄວ້າວິເຄາະວິໄຈບັນຫາ ເພື່ອສະໜອງຂໍ້​ມູນ-ຂ່າວສານ​ ໃຫ້​ແກ່​ການ​ນໍາ​ຂອງ​ສະພາ​ປະຊາຊົນ ນະຄອນຫຼວງ​ວຽງຈັນ ໃນໄລຍະຜ່ານມາ ກໍມີ​ຫຼາຍ​ດ້ານ​ທີ່​ມີ​ການ​ຫັນປ່ຽນຢ່າງ​ຕັ້ງໜ້າ ແລະ ​ໄດ້​ຮັບ​ປະສິດທິ​ຜົນ​ເປັນ​ກ້າວໆ ຊຶ່ງ​ສະ​ແດງ​ອອກ ໃນການ​ດໍາ​ເນີນ​ກອງ​ປະຊຸມ ຂອງສະພາປະຊາຊົນ ແລະ ກອງ​ປະຊຸມ​ຄະນະ​ປະຈໍາ​ ກໍ​ລ້ວນ​ແຕ່​ໄດ້​ຮັບ​ຜົນ​ສໍາ​ເລັດ​ຕາມຄາດໝາຍທີ່ວາງໄວ້. ​ແຕ່​ຄຽງຄູ່​ກັບ​ຜົນ​ສໍາ​ເລັດ​ທີ່​ກ່າວ​ມາ​ນັ້ນ, ການ​ປະຕິບັດ​ພາລະບົດບາດຂອງ​​​ເສນາ​ທິການ ຈໍານວນໜຶ່ງກໍ່ຍັງ​ພົບ​ຄວາມ​ຫຍຸ້ງຍາກ​ຫຼາຍ​ບັນຫາ ​ແລະ ຍັງ​ບໍ່ທັນ​ກໍາ​ແໜ້ນ​ໄດ້​ເຖິງ​ພາລະ​ບົດບາດ ຂອງສະພາປະຊາຊົນ ທີ່ໄດ້ກໍານົດໄວ້ໃນກົດໝາຍ ສະພາປະຊາຊົນຂັ້ນແຂວງ. ເວົ້າລວມ, ເວົ້າສະເພາະກໍ່ຄືພາລະບົດບາດຂອງບັນດາກົງຈັກການຈັດຕັ້ງພາຍໃນ ຂອງສະພາປະຊາຊົນ ທີ່ຕົນຮັບຜິດຊອບຢ່າງລະອຽດ ເຮັດໃຫ້ການເຄື່ອນໄຫວວຽກງານບາງດ້ານມີຄວາມຊັກຊ້າ, ການຂີດຂຽນເອກະສານຍັງບໍ່ທັນລະອຽດ, ໂດຍສະເພາະການ​ສ້າງ​ເອກະສານທາງລັດຖະການ, ການ​ບັນທຶກ, ການ​ສ້າງແຜນການ, ການສະຫຼຸບສັງ​ລວມ ແລະ ການວິ​ເຄາະ​ວິ​ໄຈບັນຫາ  ຕໍ່ກັບຜົນຂອງການຕິດຕາມກວດກາ, ບັນດາເນື້ອໃນທີ່ນໍາເຂົ້າພິຈາລະນາໃນກອງປະຊຸມຂອງສະພາປະຊາຊົນ ຍັງບໍ່ທັນລະອຽດເລິກເຊິ່ງ, ການສະແດງທັດສະນະວິຊາການຕໍ່ເນື້ອໃນຕ່າງໆຍັງມີໜ້ອຍ. ດັ່ງນັ້ນ, ເພື່ອ​ຍົກ​ສູງ​ປະສິດທິພາບ​ ການເປັນເສນາທິການ ​ຮັບ​ໃຊ້​ວຽກງານ​ໃຫ້​ແກ່​ການ​ນໍາ ຂອງສະພາປະຊາຊົນ ນະຄອນຫຼວງວຽງຈັນ ​ໃຫ້​ນັບ​ມື້​ມີ​ຄຸ​ນະພາ​ບສູງ​ຂຶ້ນ, ພ້ອມທັງ​ເຮັດ​ໃຫ້​ອົງການ​ຂອງ​ພວກ​ເຮົາ​ເປັນ​ເສນາ​ທິການ​ທີ່​ເຂັ້ມ​ແຂງ ​ໃຫ້​ແກ່​ສະພາ​ແຫ່ງ​ຊາດ. ດ້ວຍ​ເຫດ​ນີ້, ພວກ​ເຮົາ​ຈຶ່ງ​ໄດ້​ຈັດ​ກອງ​ປະຊຸມ​ຝຶກ​ອົບຮົມ​ນີ້​ຂຶ້ນ ຊຶ່ງ​ຈະ​ໄດ້​ພ້ອມ​ກັນ​ແລກປ່ຽນຄໍາ​ຄິດ​ຄໍາ​ເຫັນ ​ແລະ ສ້າງ​ຄວາມ​ເປັນ​ເອກະ​ພາບຕໍ່​ເນື້ອ​ໃນ ດັ່ງ​ນີ້:

  1. ບົດຮຽນ ແລະ ວິທີການຂຽນແຜນການລົງຕິດຕາມກວດກາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ.
  2. ບົດຮຽນ ແລະ ວິທີການຂຽນແຜນການລົງຕິດຕາມກວດກາ ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ.
  3. ບົດຮຽນ ແລະ ວິທີການຂຽນແຜນການ ລົງຕິດຕາມກວດກາ ຄໍາຮ້ອງທຸກ ແລະ ຄໍາສະເໜີຂອງປະ ຊາຊົນ.
  4. ບົດຮຽນການຕິດຕາມກວດກາວຽກງານ ໃນຂົງເຂດເສດຖະກິດ.
  5. ຄວາມຮູ້ພື້ນຖານດ້ານພິທີການ ແລະ ມາລະຍາດທາງສັງຄົມ.
  6. ຄວາມຮູ້ພື້ນຖານ ໃນການບໍາລຸງຮັກສາ ແລະ ການແກ້ໄຂບັນຫາເບື້ອງຕົ້ນ ໃນການນໍາໃຊ້ອຸປະກອນໄອທີ ພາຍໃນຫ້ອງການ.
  7. ເຜີຍແຜ່ມະຕິຂອງຄະນະປະຈໍາ ສະພາປະຊາຊົນ ນະຄອນຫຼວງວຽງຈັນ ສະບັບເລກທີ 066/ຄປຈ, ລົງວັນທີ 13 ສິງຫາ 2021 ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະສະມາຊິກ ສະພາປະຊາຊົນ ນະ ຄອນຫຼວງວຽງຈັນ ປະຈໍາເຂດເລືອກຕັ້ງເມືອງ.

ບັນດາ​ຫົວ​ຂໍ້ດັ່ງກ່າວລ້ວນແລ້ວແຕ່ມີ​ຄວາມ​ສໍາຄັນ​ ​ເພາະ​ພົວພັນ​ໂດຍ​ກົງ​ເຖິງ​ການ​ຍົກ​ສູງ​ປະສິດທິ​ພາບ​ໃນການ​ປະຕິບັດວຽກງານ​ເສນາ​ທິການ ​ໃຫ້​ແກ່​ການ​ນໍາ​ຂອງ​ສະພາ​ປະຊາຊົນ ນະຄອນຫຼວງ​, ໜ່ວຍສະມາຊິກ ສະພາປະຊາຊົນ ປະຈໍາເຂດເລືອກຕັ້ງເມືອງ ​ແລະ ການ​ກະກຽມ​ເນື້ອ​ໃນ​ຮອບດ້ານ​ໃຫ້​ແກ່​ການ​ດໍາ​ເນີນ​ກອງ​ປະຊຸມຕ່າງໆ ຂອງສະພາ​ປະຊາຊົນ. ດັ່ງນັ້ນ, ຈຶ່ງ​ສະ​ເໜີບັນດາ​ທ່ານ ຄົ້ນຄວ້າ​ປະກອບ​ຄວາມ​ຄິດ​ຄວາມ​ເຫັນ​ຢ່າງ​ສ້າງສັນ ​ແລະ ມີ​ເຫດ​ມີ​ຜົນ ​ເພື່ອ​​ເຮັດ​ໃຫ້​ກອງ​ປະຊຸມ​ຝຶກ​ອົບຮົມ​ຄັ້ງ​ນີ້​ໄດ້​ຮັບໝາກຜົນ​ຕາມ​ຄາດໝາຍທີ່​ວາງ​ໄວ້ ​ແລະ ສາມາດ​​ນໍາ​ເອົາ​ໄປ​ໃຊ້​ໃນໜ້າວຽກຕົວ​ຈິງ.

(ນາງ ພອນທິບ ອິນທິລາດ)