ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 22 ເມສາ 2022 ທີ່ຜ່ານມາ, ກອງປະຊຸມຝຶກອົບຮົມການສ້າງຄວາມເຂັ້ມແຂງ ໃຫ້ແກ່ພະນັກງານ-ລັດຖະກອນ ພາຍໃນສະພາປະຊາຊົນ ນະຄອນຫຼວງວຽງຈັນ ແລະ ຄະນະຊ່ວຍວຽກ ຂອງຄະນະສະມາຊິກສະພາປະຊາຊົນ ນະຄອນຫຼວງວຽງຈັນ ປະຈໍາເຂດເລືອກຕັ້ງເມືອງ ທົ່ວນະຄອນຫຼວງ ໄດ້ອັດລົງດ້ວຍຜົນສຳເລັດອັນຈົບງາມ ພາຍຫຼັງທີ່ໄດ້ດໍາເນີນມາເປັນເວລາ 03 ວັນ ໂດຍການເປັນປະທານຂອງ ທ່ານ ນາງ ລຳພອຍ ສີອັກຄະຈັນ ກຳມະການປະຈຳພັກ ນະຄອນຫຼວງ, ຮອງປະທານສະພາປະຊາຊົນ ນະຄອນຫຼວງວຽງຈັນ ມີບັນດາທ່ານກຳມະການຄະນະປະຈຳ, ຮອງປະທານຄະນະກຳມະການ ສະພາປະຊາຊົນ ແລະ ສຳມະນາກອນທີ່ກ່ຽວຂ້ອງເຂົ້າຮ່ວມ ເຊິ່ງເຕັມໄປດ້ວຍບັນຍາກາດອັນຟົດຟື້ນ ແລະ ສ້າງສັນ ບົນພື້ນຖານຄວາມເປັນເຈົ້າການ ແລະ ຄວາມຮັບຜິດຊອບສູງ ຂອງບັນດາທ່ານທີ່ເຂົ້າຮ່ວມກອງປະຊຸມ.
      
ກອງປະຊຸມຝຶກອົບຮົມຄັ້ງນີ້ ເນື້ອແທ້ແມ່ນເພື່ອເປັນການປະສານງານ, ເປັນການເຕົ້າໂຮມ, ປຶກສາຫາລື ແລະ ແລກປ່ຽນບົດຮຽນຂອງບັນດາພະນັກງານ ທີ່ເຮັດວຽກເປັນເສນາທິການ ໃຫ້ແກ່ການນໍາຂອງສະພາປະຊາຊົນ ນະຄອນຫຼວງວຽງຈັນ ແລະ ຄະນະສະມາຊິກ ສະພາປະຊາຊົນ ປະຈໍາເຂດເລືອກຕັ້ງເມືອງ ເພື່ອຍົກສູງປະສິດທິພາບການຮັບໃຊ້ວຽກງານໃຫ້ແກ່ການນໍາ ໃຫ້ນັບມື້ມີຄຸນະພາບສູງຂຶ້ນ ເຊິ່ງກອງປະຊຸມໄດ້ຮັບຟັງບົດຮຽນ ແລະ ແລກປ່ຽນຄໍາຄິດຄໍາເຫັນ ພ້ອມທັງສ້າງຄວາມເປັນເອກະພາບຕໍ່ເນື້ອໃນຕ່າງໆ ຄື:
1. ບົດຮຽນ ແລະ ວິທີການຂຽນແຜນການລົງຕິດຕາມກວດກາ ການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ ແລະ ແຜນງົບປະມານ.
2. ບົດຮຽນ ແລະ ວິທີການຂຽນແຜນການລົງຕິດຕາມກວດກາ ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ.
3. ບົດຮຽນ ແລະ ວິທີການຂຽນແຜນການ ລົງຕິດຕາມກວດກາ ຄໍາຮ້ອງທຸກ ແລະ ຄໍາສະເໜີຂອງປະ ຊາຊົນ.
4. ບົດຮຽນການຕິດຕາມກວດກາວຽກງານ ໃນຂົງເຂດເສດຖະກິດ.
5. ຄວາມຮູ້ພື້ນຖານດ້ານພິທີການ ແລະ ມາລະຍາດທາງສັງຄົມ.
6. ຄວາມຮູ້ພື້ນຖານ ໃນການບໍາລຸງຮັກສາ ແລະ ການແກ້ໄຂບັນຫາເບື້ອງຕົ້ນ ໃນການນໍາໃຊ້ອຸປະກອນໄອທີ ພາຍໃນຫ້ອງການ;
7. ມະຕິຂອງຄະນະປະຈໍາ ສະພາປະຊາຊົນ ນະຄອນຫຼວງວຽງຈັນ ສະບັບເລກທີ 066/ຄປຈ, ລົງວັນທີ 13 ສິງຫາ 2021 ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະສະມາຊິກ ສະພາປະຊາຊົນ ນະຄອນຫຼວງວຽງຈັນ ປະຈໍາເຂດເລືອກຕັ້ງເມືອງ.
       
ໃນຕອນທ້າຍ, ກອງປະຊຸມກໍໄດ້ຮັບຟັງການໂອ້ລົມຈາກ ທ່ານ ນາງ ລຳພອຍ ສີອັກຄະຈັນ ກຳມະການປະຈຳພັກ ນະຄອນຫຼວງ, ຮອງປະທານ ສະພາປະຊາຊົນ ນະຄອນຫຼວງວຽງຈັນ ເຊິ່ງທ່ານໄດ້ຕີລາຄາສູງ ຕໍ່ຄວາມເອົາໃຈໃສ່ໃນການຄົ້ນຄວ້າ, ປຶກສາຫາລື, ປະກອບຄໍາຄິດຄໍາເຫັນ ໃນແຕ່ລະຫົວຂໍ້ ແລະ ຄວາມມີລະບຽບວິໄນ ໃນການເຂົ້າຮ່ວມກອງປະຊຸມ. ພ້ອມທັງເນັ້ນໃຫ້ຜູ້ເຂົ້າຮ່ວມກອງປະຊຸມທຸກທ່ານ ນໍາເອົາໝາກຜົນຂອງການດໍາເນີນກອງປະ ຊຸມຄັ້ງນີ້, ໄປເປັນພື້ນຖານນໍາໃຊ້ເຂົ້າໃນຂອບເຂດວຽກງານທີ່ຕົນຮັບຜິດຊອບ ໃຫ້ດີຂື້ນກວ່າເກົ່າ.
       
ພາບ ແລະ ຂ່າວ: ນາງ ພອນທິບ ອິນທິລາດ