ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ສະພາປະຊາຊົນແຂວງ ສະຫວັນນະເຂດ ສໍາເລັດການເຄື່ອນໄຫວລົງພົບປະ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 03 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ບັນດາເຂດເລືອກຕັ້ງເມືອງ-ນະຄອນ

ຕ.ລ. 3, 2022 | ເຂດ 13 ສະ​ຫວັນນະເຂດ

ການໂຄສະນາ​ເຜີຍ​ແຜ່​ຜົນສຳ​ເລັດກອງປະຊຸມສະໄໝສາມັນ ເທື່ອທີ 03 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ຄະນະປະຈໍາສະພາປະຊາຊົນແຂວງ ຕົກລົງເຫັນດີໃຫ້ແຕ່ລະຄະນະລົງເຄື່ອນໄຫວກໍານົດເວລາ 03 ວັນ/ຄະນະ/ເມືອງ-ນະຄອນ. ຊຶ່ງການເຄື່ອນໄຫວລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດຂອງກອງປະຊຸມໃນຄັ້ງນີ້ ໄດ້ຮັບການຕ້ອນຮັບ ຢ່າງອົບອຸ່ນຈາກຄະນະນໍາຂອງເມືອງ ລວມ​ໄປ​ເຖິງອໍານາດການປົກຄອງ ພໍ່ແມ່ປະຊາຊົນ ທີ່ໄດ້​ເອົາໃຈໃສ່​ໃຫ້​ຄວາມ​ສຳຄັນ​ຕໍ່​ກັບ​ຜູ້​ແທນ​ປະຊາຊົນ ໃນ​ການ​ພົບ​ປະເຜີຍແຜ່ບັນດາ​ເນື້ອ​ໃນ​ຕ່າງໆ​ ຂອງ​ກອງ​ປະຊຸມ​ໃນຄັ້ງນີ້​​ເປັນຢ່າງ​ດີ. ມີບັນດາທ່ານສະມາຊິກສະພາແຫ່ງຊາດ ທີ່ປະຈໍາຢູ່ສູນກາງ ເຂົ້າຮ່ວມຈໍານວນ 08 ທ່ານ, ຍິງ 02 ທ່ານ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ທີ່ເປັນທັງສະມາຊິກສະພາປະຊາຊົນແຂວງ 11 ທ່ານ, ຍິງ 02 ທ່ານ ແລະ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ-ນະຄອນ ເຂົ້າຮ່ວມ ຈໍານວນ 39 ທ່ານ, ຍິງ 12 ທ່ານ ລວມທັງໝົດ 58 ທ່ານ, ຍິງ 16 ທ່ານ.

ແຜນໃນການເຄື່ອນໄຫວລົງພົບປະຜູ້ມີສິດເລືອກຕັ້ງ ແລະ ໂຄສະນາເຜີຍແຜ່ຜົນສໍາເລັດກອງປະຊຸມ ຊຶ່ງມີທັງໝົດ 15 ຄະນະ ແລະ ກໍານົດເລີ່ມຈັດຕັ້ງປະຕິບັດເຄື່ອນໄຫວ ນັບແຕ່ວັນທີ 01 ຫາ 30 ກັນຍາ 2022. ການລົງພົບປະຜູ້ມີສິດເລືອກຕັ້ງໃນເທື່ອນີ້ ແມ່ນເພື່ອນໍາເອົາຜົນສໍາເລັດກອງປະຊຸມສະໄໝສາມັນ ເທື່ອທີ 03 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໂດຍຕິດພັນກັບ 02 ວາລະແຫ່ງຊາດ, ການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ, ແຜນພັດທະນາເສດຖະກິດ-ສັງຄົມ ເພື່ອໃຫ້ພະນັກງານ-ລັດຖະກອນ, ພະນັກງານບໍານານ, ທະຫານຕໍາຫຼວດ ຕະຫຼອດຮອດພໍ່ແມ່ປະຊາຊົນບັນດາເຜົ່າ ໃນຖານະຜູ້ມີສິດເລືອກຕັ້ງ ໄດ້ຮັບຮູ້ເຊື່ອມຊຶມ. ເຊິ່ງໃນໄລຍະການພົບປະໃນແຕ່ລະຈຸດໄດ້ມີການສົນທະນາແລກປ່ຽນຄໍາຄິດຄໍາເຫັນ ໃນແຕ່ລະບັນຫາ, ເຮັດໃຫ້ຜູ້ມີສິດເລືອກຕັ້ງໃນແຕ່ລະຈຸດນັບທັງ ອໍານາດການປົກຄອງ ໄດ້ຮັບຮູ້ ແລະ ເຂົ້າໃຈ ຕໍ່ກັບພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງເປັນຢ່າງດີ, ການ​ລົງພົບປະຜູ້ມີສິດເລືອກຕັ້ງ ໃນຊຸດນີ້ແມ່ນຈະໄດ້ເຄື່ອນໄຫວໃນຂັ້ນເທສະບານເມືອງ-ນະຄອນ 15 ຈຸດ, ກໍາລັງປະກອບອາວຸດ 01 ກົມກອງ ແລະ ຢູ່ກຸ່ມບ້ານ 43 ຈຸດ, ລວມມີ 59 ຈຸດ, ເຊິ່ງມີຈໍານວນຜູ້ເຂົ້າຮ່ວມທັງໝົດ 8.037 ຄົນ, ຍິງ 2.925 ຄົນ, ການລົງເຄື່ອນໄຫວໃນຄັ້ງນີ້ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແລະ ສະມາຊິກສະພາປະຊາຊົນແຂວງ ໄດ້ລະດົມ ແລະ ມອບເຄື່ອງຊ່ວຍເຫຼືອ ເປັນຕົ້ນແມ່ນ: ເຄື່ອງສຽງ (ຊຸດໂທລະໂຄ່ງ) 02 ຊຸດ, ແອັມ 02 ໜ່ວຍ, ອຸປະກອນການ ຮຽນ, ອຸປະກອນກິລາ ແຈວລ້າງມື, ຜ້າອັດປາກ ແລະ ເຄື່ອງນຸ່ງຮົ່ມຈໍານວນໜຶ່ງ ມອບໃຫ້ຄະນະນໍາຂອງເມືອງ ເພື່ອນໍາໄປແຈກຢາຍປະຊາຊົນຕາມຄວາມເໝາະສົມ ນອກຈາກນີ້ ຍັງໄດ້ປະກອບສ່ວນປ່ວຍລູກປາຢູ່ໜອງລວມບ້ານ ນາກະລາ ເມືອງສອງຄອນ ແລະ ບ້ານນາບໍ່ ເມືອງ ໄຊພູທອງ ຊຶ່ງລວມເປັນມູນຄ່າ ທັງໝົດ 108.767.000 ກີບ.ພາຍຫຼັງທີ່ສໍາເລັດໃນການເຜີຍແຜ່ຂອງກອງປະຊຸມ ບັນດາທ່ານຫົວໜ້າຄະນະກໍ່ໄດ້ເປີດໂອກາດໃຫ້ອຳນາດການປົກຄອງເມືອງ, ບ້ານ, ຈຸດສຸມ ແລະ ພໍ່ແມ່ປະຊາຊົນ ໄດ້ສະເໜີ, ປະກອບຄໍາຄິດຄໍາເຫັນ ມາຍັງອົງການປົກຄອງແລະ ພາກສ່ວນກ່ຽວຂ້ອງ ເຊີ່ງສາມາດສັງລວມຄຳສະເໜີໄດ້ທັງໝົດ 297 ຄໍາສະເໜີ, ໃນນີ້ ສະມາຊິກສະພwwqາປະຊາຊົນແຂວງ ແລະ ການນໍາຂອງເມືອງ ໄດ້ຊີ້ແຈງໃຫ້ຜູ້ມີສິດເລືອກຕັ້ງແລ້ວ 106 ຄໍາສະເໜີ, ສໍາລັບຄໍາສະເໜີທີ່ຍັງບໍ່ໄດ້ຊີ້ແຈງ ມີຈໍານວນ 191 ຄໍາສະເໜີ. ເຊິ່ງບັນຫາທີ່ຜູ້ມີສິດເລືອກຕັ້ງສະເໜີຫຼາຍທີ່ສຸດແມ່ນ ຂົງເຂດເສດຖະກິດ ແລະ ການເງິນ ເປັນຕົ້ນແມ່ນ ການກໍ່ສ້າງສ້ອມແປງເສັ້ນທາງ, ຂົວ, ການກໍ່ສ້າງຄອງຊົນລະປະທານ, ການຂະຫຍາຍຕາຂ່າຍໄຟຟ້າ, ບັນຫາຄ່າຄອງຊີບ, ອັດຕາເງິນເຝີ້, ລາຄາສິນຄ້າທີ່ສູງ, ການຊົດເຊີຍຜົນກະທົບຂອງໂຄງການກໍ່ສ້າງເຂື່ອນໄຟຟ້າເຊລະນອງ 1; ຂົງເຂດວັດທະນະທໍາ-ສັງຄົມ ມີ: ບັນຫາຕົວເລກລັດຖະກອນຄູ, ຄູອາສາ, ຄຸນນະພາບການສອນຂອງພະນັກງານຄູ, ອຸປະກອນການຮຽນ ແລະ ຂົງເຂດຍຸຕິທໍາ ແລະ ປກຊ-ປກສ ມີ: ບັນຫາຢາເສບຕິດ, ການກິດດື່ມຊຸມແຊວນໍ້າກະທ້ອມ ແລະ ກິນດື່ມກາເຟ ທີ່ມີສານເສບຕິດ.

ຕໍ່ບັນດາຄຳສະເໜີດັ່ງກ່າວ ຄະນະກໍາມະການ ແລະ ຄະນະເລຂາທິການສະພາປະຊາຊົນແຂວງ ໄດ້ປະສານສົມທົບ ແລະ ມອບໃຫ້ພາກສ່ວນກ່ຽວຂ້ອງ ຊີ້ແຈງຕໍ່ຄໍາສະເໜີດັ່ງກ່າວ ຕາມພາລະບົດບາດ, ສິດ ແລະໜ້າທີ່ ຂອງແຕ່ລະພາກສ່ວນ ບົນພື້ນຖານກົດໝາຍ, ນິຕິກໍາຕ່າງໆທີ່ກ່ຽວຂ້ອງ ແລະ ສະພາບຄວາມເປັນຈິງ, ແລ້ວຈະໄດ້ຊີ້ແຈງໃຫ້ພາກສ່ວນຕ່າງໆ ຮັບຊາບໃນໄລຍະເວລາທີ່ເໝາະສົມ.