ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 ໃນຕອນເຊົ້າວັນທີ 16 ກັນຍາ 2022, ຢູ່ທີ່ຫ້ອງປະຊຸມສະພາປະຊາຊົນ ແຂວງສະຫວັນນະເຂດ ໄດ້ຈັດພິທີປາຖະກະຖາເລົ່າຄືນມູນເຊື້ອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 20 ປີ ( 09 ກັນຍາ 2002 ຫາ 09 ກັນຍາ 2022 ) ແລະ ວັນຊາດສາທາລະນະລັດສັງຄົມນິຍົມຫວຽດນາມ ຄົບຮອບ 77 ປີ ( 02 ກັນຍາ 1945 ຫາ 02 ກັນຍາ 2022 ) ໂດຍການເປັນປະທານ ແລະ ປາຖະກະຖາຂອງທ່ານ ພັອ ສຸລິວຽງ ຊ່ຽນສະຫວັນ ປະທານສະຫະພັນນັກຮົບເກົ່າແຂວງສະຫວັນນະເຂດ, ມີບັນດາທ່ານໃນຄະນະປະຈໍາ, ປະທານ-ຮອງປະທານກຳມະການ, ຄະນະເລຂາທິການ,ຫົວໜ້າ-ຮອງຫົວໜ້າຂະແໝງ, ຕະຫຼອດຮອດພະນັກງານ-ລັດຖະກອນ ພາຍໃນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.

ເນື້ອໃນເອກະສານທີ່ນຳມາປາຖະກະຖາໃນຄັ້ງນີ້ ແມ່ນໄດ້ເລົ່າເຖິງມູນເຊື້ອ ແລະ ການເຕີບໃຫຍ່ຂະຫຍາຍຕົວຂອງສະຫະພັນນັກຮົບເກົ່າແຫ່ງຊາດລາວ ທີ່ເວົ້າເຖິງທາດແທ້ ແລະ ຜົນງານອັນພົ້ນເດັ່ນໃນການເຄື່ອນໄຫວປະກອບສ່ວນໃນພາລະກິດເຄື່ອນໄຫວປະຕິວັດຊາດ, ປະຊາທິປະໄຕ, ປົກປັກຮັກສາ ແລະ ສ້າງສາພັດທະນາປະເທດຊາດ. ນັກຮົບແມ່ນຜູ້ທີ່ມີຄວາມອົງອາດກ້າຫານຊຳນິຊຳນານໃນການສູ້ຮົບ, ແມ່ນນັກຕໍ່ສູ້ປະຈັນບານໂດຍກົງຢູ່ສະໜາມຮົບ, ນັກຮົບກອງທັບປະຊາຊົນລາວແມ່ນຜູ້ທີ່ໄດ້ຝຶກອົບຮົມເຊື່ອມຊຶມທາງດ້ານທິດສະດີການເມືອງ, ບຳລຸງກໍ່ສ້າງທາງດ້ານວິຊາການທະຫານ, ສິນລະປະຍຸດ-ຍຸດທະວິທີ ແລະ ວິຊາສະເພາະອື່ນໆຢູ່ພາຍໃນກົມກອງ, ຈາກບັນດາໂຮງຮຽນຢູ່ພາຍໃນ ແລະ ຕ່າງປະເທດ, ແມ່ນພົນທະຫານທີ່ມີຊັ້ນ ແຕ່ຊັ້ນ 2 ເຖິງຊັ້ນ ວາທີ ເຊິ່ງມີເຄື່ອງໝາຍຊັ້ນ, ເຄື່ອງໝາຍເຫຼົ່າທັບ ແລະ ເຄື່ອງແບບສະເພາະ. ນັກຮົບເກົ່າລາວແມ່ນອະດີດນັກຮົບປະຕິວັດ ໃນຖັນແຖວປະກອບອາວຸດຂອງປະຊາຊົນລາວ ແມ່ນນາຍ ແລະ ພົນທະຫານ, ນາຍ ແລະ ພົນຕຳຫຼວດທີ່ໄດ້ຮັບບຳນານ, ບຳເນັດ ຫຼື ເສຍອົງຄະຍ້ອນການສູ້ຮົບ, ຮັບໃຊ້ການສູ້ຮົບ, ການປະຕິບັດໜ້າທີ່ໃນການປົດປອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ. ໃນປີ 2002 ກົມການເມືອງສູນກາງພັກ ໄດ້ອອກມະຕິສະບັບເລກທີ 68/ກມສພ ລົງວັນທີ 09 ກັນຍາ 2002 ວ່າດ້ວຍການສ້າງຕັ້ງສະຫະພັນນັກຮົບເກົ່າແຫ່ງຊາດ, ອົງການຈັດຕັ້ງສະຫະພັນນັກຮົບເກົ່າແຫ່ງຊາດລາວ ແມ່ນອົງການຈັດຕັ້ງມະຫາຊົນຂອງພັກ ເຊິ່ງຢູ່ພາຍໃຕ້ການນຳພາ-ຊີ້ນຳຂອງຄະນະບໍລິຫານງານສູນກາງພັກ ແລະ ກົມການເມືອງສູນກາງພັກ, ມີຖານະຄືກັບອົງການຈັດຕັ້ງຂອງພັກ-ລັດ ແລະ ອົງການຈັດຕັ້ງອື່ນຂອງພັກ ເຄື່ອນໄຫວພາຍໃຕ້ລັດຖະທຳມະນູນ ແລະ ກົດໝາຍ ແຫ່ງ ສປປລາວ, ສະຫະພັນນັກຮົບເກົ່າແຫ່ງຊາດລາວມີລະບົບສາຍໃຍການຈັດຕັ້ງປະກອບດ້ວຍ 4 ຂັ້ນຄື: ຂັ້ນສູນກາງ, ຂັ້ນແຂວງ, ກຳແພງນະຄອນ ແລະ ເຂດພິເສດ, ຂັ້ນຮາກຖານ ( ຂັ້ນບ້ານ ).

ໃນພິທີດຽວກັນນີ້ກໍ່ຍັງໄດ້ຮັບຟັງການເລົ່າເຖິງມູນເຊື້ອວັນຊາດສາທາລະນະລັດສັງຄົມນິຍົມຫວຽດນາມ ຄົບຮອບ 77 ປີ ( 02 ກັນຍາ 1945 ຫາ 02 ກັນຍາ 2022 ) ໂດຍທ່ານ ນາງ ພູທອນ ແກ້ວພູວົງ ຮອງປະທານສະພາປະຊາຊົນແຂວງເຊິ່ງທ່ານໄດ້ຍົກໃຫ້ເຫັນເຖິງໄລຍະການຕໍ່ສູ້ຍາດເອົາອຳນາດການປົກຄອງ ປີ 1930 ຫາ 1945 ເຊິ່ງມາໃນວັນທີ 29 ສິງຫາ 1985 ປະຊາຊົນຊາວຫວຽດນາມໄດ້ໂຮມຊຸມນຸມມິດຕິ້ງທີ່ສະໜາມຫຼວງບາດິງ, ປະທານໂຮ່ຈີ່ມິນ ຕາງໜ້າຄະນະລັດຖະບານຊົ່ວຄາວ ໄດ້ອ່ານຖະແຫຼງການເອກະລາດ, ປະກາດສ້າງຕັ້ງສາທາລະນະລັດປະຊາທິປະໄຕຫວຽດນາມ ປະເທດສາທາລະນະລັດປະຊາທິປະໄຕຫວຽດນາມ ( ປະຈຸບັນ ສາທາລະນະລັດສັງຄົມນິຍົມຫວຽດນາມ ) ໄດ້ຮັບການແຕ່ງຕັ້ງຂຶ້ນຢ່າງເປັນທາງການ ແລະ ກໍ່ສ້າງລັດທິສັງຄົມນິຍົມລັດທຳອິດໃນຂົງເຂດອາຊີ, ໄຊຊະນະຂອງການປະຕິວັດ ເດືອນສິງຫາ ຫວຽດນາມ ມັນແມ່ນໄຊຊະນະຄັ້ງທຳອິດຂອງລັດທິມາກ-ເລນິນ ຢູ່ໃນປະເທດໜຶ່ງທີ່ເປັນຫົວເມືອງຂຶ້ນ ແລະ ເຄິ່ງສັກດີນາ ມັນແມ່ນໄຊຊະນະຂອງແນວຄິດ, ແນວທາງປະຕິວັດຊາດ-ປະຊາທິປະໄຕຂອງປະທານໂຮ່ຈີມິນ ແລະ ພັກກອມມູນິດຫວຽດນາມແມ່ນການປະຕິວັດປົດປ່ອຍຊາດທີ່ພົ້ນເດັ່ນໃນສະຕະວັດທີ XX.