ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

               ວັນທີ 19 ສິງຫາ 2022 ນີ້, ສະພາປະຊາຊົນ ແຂວງຫົວພັນ ໄດ້ຈັດກອງປະຊຸມ ເຊື່ອມຊຶມບັນດາເອກະສານສຳຄັນຕ່າງໆ ຂອງພັກ-ລັດ ຢູ່ທີ່ຫ້ອງປະຊຸມ ສະພາປະຊາຊົນແຂວງ ພາຍໃຕ້ການເປັນປະທານຂອງ ທ່ານ ສົມສັກ ດອນຈານິດ ກຳມະການພັກແຂວງ, ຮອງປະທານສະພາປະຊາຊົນແຂວງ ແລະ ມີບັນດາທ່ານ ຄະນະປະຈໍາ, ຄະນະເລຂາທິການ ຕະຫລອດຮອດ ພະນັກງານ-ລັດຖະກອນ ພາຍໃນສະພາປະຊາຊົນແຂວງເຂົ້າຮ່ວມ ຢ່າງພ້ອມພຽງ.
ວາລະກອງປະຊຸມ ໄດ້ຮັບຟັງການເຜີຍແຜ່ ມະຕິ ກອງປະຊຸມຄົບຄະນະ ຄັ້ງທີ 4 ຂອງຄະນະບໍລິຫານງານສູນກາງພັກ ສະໄໝທີ XI; ມະຕິ ກອງປະຊຸມຄົບຄະນະ ຂອງຄະນະບໍລິຫານງານພັກແຂວງຫົວພັນ ຄັ້ງທີ 8 ສະໄໝທີ X; ດຳລັດ ວ່າດ້ວຍການປະຢັດ ແລະ ຕ້ານການຟູມເຟືອຍ ແລະ ມະຕິຂອງຄະນະປະຈຳ ສະພາແຫ່ງຊາດ ວ່າດ້ວຍການປະຕິບັດນະໂຍບາຍ ຕໍ່ພະນັກງານ-ນັກຮົບ ຂອງກຳລັງ ປກຊ-ປກສ ທີ່ປະຕິບັດໜ້າທີ່ ຢູ່ສະພາແຫ່ງຊາດ ແລະ ສະພາປະຊາຊົນແຂວງ ຈາກບັນດາທ່ານ ຄະນະປະຈຳ ສະພາປະຊາຊົນແຂວງ.
ການເຊື່ອມຊຶມເອກະສານຄັ້ງນີ້, ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ, ຮັບຮູ້,ເຂົ້າໃຈເລິກເຊິ່ງ ທັງເປັນການສຶກສາອົບຮົມ ໃຫ້ພະນັກງານ-ລັດຖະກອນ ມີຄຸນທາດທາງດ້ານການເມືອງ, ຄຸນສົມບັດສິນທຳປະຕິວັດໜັກແໜ້ນ ມີນ້ຳໃຈຮັກຊາດ, ຮັກບ້ານເກີດເມືອງນອນ ແລະ ເປັນເຈົ້າການ ຕັດສິນໃຈ ພ້ອມກັນບຸກບືນ ໃນການຍູ້ແຮງພັດທະນາການແກ້ໄຂຄວາມທຸກຍາກ, ອຸປະສັກໃນໄລຍະທີ່ສະພາບວິກິດ ເສດຖະກິດ-ການເງິນ, ໄພເງິນເຟີ້ ແລະ ສິ່ງທ້າທາຍອື່ນໆ. ມີຄວາມຮັບຜິດຊອບສູງຕໍ່ໜ້າທີ່ວຽກງານຂອງຕົນ, ເປັນເຈົ້າການເຂົ້າຮ່ວມໃນການໃນການປະຕິບັດ ນະໂຍບາຍປະຢັດ ແລະ ຕ້ານການຟູມເຟືອຍ ແນໃສ່ຫັນປ່ຽນຈາກສັງຄົມທີ່ມີຄວາມນິຍົມຊົມໃຊ້ແບບຟູມເຟືອຍ ມາເປັນສັງຄົມທີ່ມີການຜະລິດ, ຊົມໃຊ້ຜະລິດຕະພັນພາຍໃນ ເພື່ອປະກອບສ່ວນເຂົ້າໃນການ ພັດທະນາປະເທດຊາດ ໃຫ້ຈະເລີນກ້າວໜ້າຂຶ້ນເລື້ອຍໆ.
ພາບ ແລະ ຂ່າວ ໂດຍ ນັກຂ່າວ ສພຂ ຫົວພັນ.