ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

             ວັນທີ 23 ກັນຍາ 2022 ນີ້ ທີ່ສູນສົ່ງເສີມເຕັກນິກກະສິກໍາ ແລະ ປ່າໄມ້ ຮ່ວມມື ລາວ – ຫວຽດນາມ ໄດ້ຈັດກອງພົບປະແລກປ່ຽນບົດຮຽນ ລະຫວ່າງ ສະພາປະຊາຊົນແຂວງ ກັບ ພະແນກກະສິກໍາ ແລະ ປ່າໄມ້ແຂວງ ຂື້ນ ໂດຍການເປັນປະທານ ຂອງທ່ານ ຄອນປະພັນ ເລືອງສີຈັນທອງ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງ, ມີບັນດາທ່ານ ຄະນະປະຈໍາສະພາປະຊາຊົນແຂວງ, ຄະນະກຳມະການ, ຄະນະເລຂາທິການ, ການນໍາຂອງພະແນກກະສິກໍາ ແລະ ປ່າໄມ້ແຂວງ ຕະຫຼອດຮອດພະນັກງານ – ລັດຖະກອນ ທັງສອງພາກສ່ວນເຂົ້າຮ່ວມຢ່າງພ້ອມພຽງ.
              ໃນວາລະດໍາເນີນກອງປະຊຸມ ໄດ້ຮັບຟັງການລາຍງານ ການຈັດຕັ້ງປະຕິບັດ ແລະ ການຄຸ້ມຄອງກິດຈະກໍາທີ່ ສສ ຫວຽດນາມ ໃຫ້ທຶນຊ່ວຍເຫຼືອ ໂດຍຫຍໍ້ຈາກຫົວໜ້າສູນເປັນຕົ້ນ: ປະຫວັດຄວາມເປັນມາ ຂອງສູນ ເຊິ່ງສູນບ້ານອົ້ງແມ່ນສູນໜື່ງທີ່ຂຶ້ນກັບ ພະແນກກະສິກໍາ ແລະ ປ່າໄມ້ແຂວງ, ສ້າງຕັ້ງຂຶ້ນໃນປີ 2017, ມີເນື້ອທີ່ທັງໝົດ 15,2 ເຮັກຕາ, ສູນແຫ່ງນີ້ແມ່ນທຶນຊ່ວຍເຫຼືອຈາກ ສສ ຫວຽດນາມ ແລະ ທຶນສົມທົບ ຂອງລັດຖະບານ ສປປ ລາວ ໃນນາມເຈົ້າຂອງໂຄງການຝ່າຍລາວແມ່ນກົມສ່ົງເສີມ ແລະ ສະຫະກອນ ກະຊວງກະສິກໍາ ແລະ ປ່າໄມ້, ຝ່າຍຫວຽດນາມ ສູນສົ່ງເສີມແຫ່ງຊາດ ກະຊວງກະສິກໍາ ແລະ ພັດທະນາຊົນນະບົດຫວຽດນາມ, ມູນຄ່າໂຄງການກໍ່ສ້າງ 44 ຕື້ດົງ ແລະ ທຶນສົມທົບ ຂອງລັດຖະບານລາວໃນມູນຄ່າ 1,195 ລ້ານກີບ ໃນການຈັດຕັ້ງປະຕິບັດແຕ່ລະກິດຈະກໍາ ພາຍໃນສູນໄດ້ຍົກໃຫ້ເຫັນຂໍ້ສະ ດວກ, ຂໍ້ຫຍຸ້ງຍາກ ກ່ຽວກັບການຈັດຕັ້ງປະຕິບັດວຽກງານໃນໄລຍະຜ່ານມາ, ຈາກນັ້ນທັງສອງພາກສ່ວນ ໄດ້ພ້ອມກັນປະກອບຄໍາເຫັນແລກປ່ຽນບົດຮຽນນໍາກັນ ຢ່າງກົງໄປກົງມາ ແລະ ໄດ້ຮັບຟັງການຊີ້ແຈ້ງບາງບັນຫາຈາກ ທ່ານ ໄຈເພັດ ເຮືອງຖາວອນ ຮັກສາການຫົວໜ້າ ພະແນກກະກໍາ ແລະ ປ່າໄມ້ແຂວງ.
                ຕອນທ້າຍ ຍັງໄດ້ຮັບຟັງການໂອ້ລົມ ຂອງທ່ານປະທານ ກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ການນໍາຂອງພະແນກກະສິກໍາ ແລະ ປ່າໄມ້ແຂວງ ທີ່ໄດ້ເອົາໃຈໃສ່ຊີ້ນໍາ – ນໍາພາການຈັດຕັ້ງປະຕິບັດວຽກງານໃນໄລຍະຜ່ານມາ ໂດຍສະເພາະການປະຕິບັດວຽກງານຢູ່ພາຍໃນສູນເຫັນວ່າມີຜົນສໍາເລັດຫຼາຍດ້ານ ພ້ອມທັງຮຽກຮ້ອງພະແນກ ແລະ ສູນ ເປັນເຈົ້າການລົງຊຸກຍູ້, ໃຫ້ການຊ່ວຍເຫຼືອດ້ານເຕັກນິກການປູກ, ການລ້ຽງ ແກ່ປະຊາຊົນ, ຈັດຕັ້ງບໍລິຫານກອງທຶນທີ່ມີໃຫ້ເກີດດອກອອກຜົນ, ຊອກຫາວິທີຜະລິດແນວພັນຕ່າງໆ ເພື່ອສະໜອງຕາມຄວາມຮຽກຮ້ອງຕ້ອງການ ແລະ ປະສານສົມ ທົບກັບພາກສ່ວນກ່ຽວຂ້ອງຊອກຕະຫຼາດເພື່ອສົ່ງອອກສິນຄ້າກະສິກໍາ ໂອກາດດຽວກັນນີ້ ຍັງໄດ້ລົງເບິ່ງບັນດາກິດກະກໍາຕ່າງໆ ຂອງສູນຕື່ມອີກ.
ພາບແລະຂ່າວໂດຍ ນັກຂ່າວ ສພຂ ຫົວພັນ.