ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

 

ໃນວັນທີ 4 ສິງຫາ 2022 ສະພາປະຊາຊົນແຂວງໄຊສົມບູນ ສືບຕໍ່ດໍາເນີນກອງປະຊຸມສະໄໝສາມັນ ເທື່ອທີ 3​ ທີ່ສະໂມສອນເມືອງອະນຸວົງ ໂດຍພາຍໃຕ້ການເປັນປະທານຂອງ ທ່ານ ແດງ ປະທຸມທອງ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 18 ປະທານສະພາປະຊາຊົນແຂວງໄຊສົມບູນ ເຂົ້າຮ່ວມມີ ທ່ານ ພອຍຄໍາ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ ແລະ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງໄຊສົມບູນ ແລະ ບັນດາທ່ານ ຫົວໜ້າ, ຮອງຫົວໜ້າພະແນກ, ອົງການ, ກົມກອງ ອົງການຈັດຕັ້ງ ແນວລາວສ້າງຊາດ ຕະຫຼອດຮອດບັນດາບໍລິສັດລັດວິສາຫະກິດອ້ອມຂ້າງແຂວງເຂົ້າຮ່ວມຢ່າງພ້ອມພຽງ.

ໃນທີ່ປະຊຸມໄດ້ສືບຕໍ່ດໍາເນີນ ຮັບຟັງແຜນການຜັນຂະຫຍາຍ ວາລະແຫ່ງຊາດ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງແຂວງໄຊສົມບູນ ແລະ ຮັບຟັງບົດລາຍງານກ່ຽວກັບການຈັດຕັ້ງປະຕິບັດ ດໍາລັດ 414/ລບ, ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ນໍາສະເໜີໂດຍ ທ່ານ ສຸກສະຫວາດ ວົງພູມເຫຼັກ ຄະນະປະຈໍາພັກແຂວງ, ຮອງເຈົ້າແຂວງໄຊສົມບູນ ໂດຍທ່ານ ໄດ້ໃຫ້ຮູ້ເຖິງຜົນສໍາເລັດການຈັດຕັ້ງປະຕິບັດວຽກງານຈຸດສຸມ ຕາມດໍາລັດ 414/ລບ ປະຈໍາ 6 ເດືອນຕົ້ນປີ ຄືດັ່ງນີ້:

ວຽກງານປ້ອງກັນຊາດ-ປ້ອງກັນຄວາມສະຫງົບ, ການປະຕິບັດນະໂຍບາຍການລົງທຶນ, ດ້ານອຸດສາຫະກໍາ ແລະ ການຄ້າ, ດ້ານກະສິກໍາ ແລະ ປ່າໄມ້, ດ້ານການທ່ອງທ່ຽວ, ດ້ານພະລັງງານໄຟຟ້າ, ດ້ານບໍ່ແຮ່, ດ້ານການບໍລິການເຊື່ອມຈອດ-ເຊື່ອມໂຍງ, ດ້ານການສົ່ງເສີມຊັບພະຍາກອນມະນຸດ, ການແບ່ງຂັ້ນຄຸ້ມຄອງດ້ານງົບປະມານ, ກອງທຶນພັດທະນາແຂວງໄຊສົມບູນ ແລະ ດ້ານບຸກຄະລາກອນຂອງແຂວງໄຊສົມບູນ.

ຮັບຟັງບົດລາຍງານ ການຈັດຕັ້ງປະຕິບັດວຽກງານ ຂອງອົງການໄອຍະການປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ໂດຍທ່ານ ຈຸນດາ ຄໍາບຸນມີ ຫົວໜ້າອົງການໄອຍະການແຂວງ ໂດຍທ່ານ ໄດ້ໃຫ້ຮູ້ວ່າ ອົງການໄອຍະການປະຊາຊົນແຂວງໄດ້ເໜັ້ນນັກ ທາງດ້ານຄະດີອາຍາຂັ້ນຕົ້ນ ແລະ ຂັ້ນອຸທອນ, ການແກ້ໄຂຄະດີແພ່ງ ຂັ້ນຕົ້ນ ແລະ ຄະດີຂັ້ນອຸທອນ, ວຽກງານສັ່ງຟ້ອງ ແລະ ການຕິດຕາມກວດກາການປະຕິບັດກົດໝາຍໃນການດໍາເນີນຄະດີຢູ່ສານ, ວຽກງານການຕິດຕາມກວດກາການປະຕິບັດຄໍາຕັດສິນຂອງສານ, ການຕິດຕາມກວດກາການປະຕິບັດກົດໝາຍໃນສະຖານທີ່ກັກຕົວ, ສະຖານທີ່ກັກຂັງ, ຄ້າຍຄຸມຂັງ-ດັດສ້າງ;

ຮັບຟັງບົດລາຍງານການຈັດຕັ້ງປະຕິບັດວຽກງານ ຂອງສານປະຊາຊົນແຂວງ ກ່ຽວກັບການຈັດຕັ້ງປະຕິບັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ໂດຍທ່ານ ສົມໝາຍ ບຸດຕາວົງ ປະທານສານປະຊາຊົນແຂວງ ໂດຍທ່ານ ໄດ້ໃຫ້ຮູ້ວ່າ ໃນໄລຍະ 6 ເດືອນຜ່ານມາ ສານປະຊາຊົນແຂວງ ໄດ້ຮັບສໍານວນຄະດີເຂົ້າມາຫາສານ 43 ເລື່ອງ, ແກ້ໄຂ 28 ເລື່ອງ ຄ້າງ 15 ເລື່ອງ; ມີຄະດີອາຍາ 33 ເລື່ອງ ແກ້ໄຂ 22 ເລື່ອງ ຄ້າງ 11 ເລື່ອງ, ຕັດສິນລົງໂທດຈໍາເລີຍທັງໝົດ 37 ຄົນ,ໃນນີ້ມີ ຢາບ້າ 17 ເລື່ອງ, ໄດ້ຕັດສິນ 14 ເລື່ອງ, ຄ້າງ 3 ເລື່ອງ. ນອກຈາກເຮັດໜ້າທີ່ຕັດສິນ, ພິພາກສາຄະດີແລ້ວ ຍັງໄດ້ຄຸ້ມຄອງມະຫາພາກຕໍ່ສານປະຊາຊົນ ເຂດທີ່ຂຶ້ນກັບ ໂດຍເອົາໃຈໃສ່ກວດກາຄະດີຕັດສິນຂອງສານຂັ້ນຕົ້ນ, ສະຖິຕິສານ, ສະຖິຕິຄະດີ ແລະ ອອກໃບແຈ້ງໂທດເລກ 3 ໃຫ້ພໍ່ແມ່ປະຊາຊົນ.

ຮັບຟັງບົດລາຍງານການຈັດຕັ້ງປະຕິບັດວຽກງານ ຂອງຄະນະປະຈໍາສະພາປະຊາຊົນແຂວງ ແຕ່ກອງປະຊຸມສະໄໝສາມັນ ເທື່ອທີ ຫາ ກອງປະຊຸມສະໄໝສາມັນ ເທື່ອທີ 3 ແລະ ທິດທາງແຜນການຮອດກອງປະຊຸມສະໄໝສາມັນ ເທື່ອທີ 4 ໂດຍ ທ່ານ ນາງ ຂັນກາບ ໄຊຍະກຸມມານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 18, ຄະນະປະຈໍາ ເລຂາທິການສະພາປະຊາຊົນແຂວງ.

(ນາງ ອໍາໄພພອນ ແກ້ວວິໄລ)