ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

 

ເຊົ້າວັນໃໝ່ ຂອງວັນທີ 3 ສິງຫາ 2022 ເວລາ 8:00 ນາທີ ສະພາປະຊາຊົນແຂວງໄຊສົມບູນ ໄຂກອງປະຊຸມສະໄໝສາມັນ ເທື່ອທີ 3 ຂຶ້ນທີ່ສະໂມສອນເມືອງອະນຸວົງ ໂດຍພາຍໃຕ້ການເປັນປະທານຂອງ ທ່ານ ແດງ ປະທຸມທອງ ຮອງເລຂາພັກແຂວງ,​ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 18, ປະທານສະພາປະຊາຊົນແຂວງໄຊສົມບູນ ຊຸດທີ II, ເຂົ້າຮ່ວມມີ ທ່ານ ພອຍຄໍາ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ, ຄະນະພັກ, ຄະນະນໍາແຂວງ, ມີຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງໄຊສົມບູນ ປະຈໍາເຂດເລືອກຕັ້ງ 5 ເມືອງ

ທ່ານ ຫົວໜ້າ, ຮອງຫົວໜ້າພະແນກ,​ ອົງການ, ກົມກອງ, ອົງການຈັດຕັ້ງ, ແນວລາວສ້າງຊາດ ຕະຫຼອດຮອດ ບັນດາບໍລິສັດລັດວິສາຫະກິດຕ່າງໆ ອ້ອມຂ້າງແຂວງໄຊສົມບູນເຂົ້າຮ່ວມຢ່າງພ້ອມພຽງ.

ໃນທາມກາງບັນຍາດກາດອັນຟົດຟື້ນນີ້ ທ່ານ ແດງ ປະທຸມທອງ ປະທານກອງປະຊຸມ ທ່ານ ໄດ້ກ່າວບົດສູນທອນພົດເປີດ ແລະ ພ້ອມກ່າວຈຸດປະສົງທີ່ສໍາຄັນ ເພື່ອດໍາເນີນກອງປະຊຸມໃນຄັ້ງນີ້.

ຜູ້ແທນ ແລະແຂກໄດ້ຮັບຟັງບົດລາຍງານໂດຍສັງເຂບ ຂອງທ່ານເຈົ້າແຂວງໄຊສົມບູນ ກ່ຽວກັບການຈັດຕັ້ງປະຕິບັດແຜນພັດທະນເສດຖະກິດ-ສັງຄົມ, ແຜນງົບປະມານ ປະຈໍາ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2022 ໂດຍທ່ານ ພອຍຄໍາ ຮຸ່ງບຸນຍວງ ເຈົ້າແຂວງໄຊສົມບູນ, ຮັບຟັງການລາຍງານ ການຈັດຕັ້ງປະຕິບັດແຜນງົບປະມານ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນ ທ້າຍປີ 2022 ໂດຍທ່ານ ປອ ທອງປະເສີດ ໄຊຍະລາດ ຫົວໜ້າພະແນກການເງິນແຂວງ; ຮັບຟັງບົດລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ ປະຈໍາ 6 ເດືອນຕົ້ນປີ ແລະທິິດທາງແຜນການ 6 ເດືອນທ້າຍປີ 2022 ໂດຍທ່ານ ພູພັດ ສິງທາວົງໄຊ ຮອງຫົວໜ້າພະແນກແຜນການ ແລະການລົງທຶນແຂວງ; ຮັບຟັງບົດລາຍງານການຈັດຕັ້ງປະຕິບັດວຽກງານການແກ້ໄຂຄວາມທຸກຍາກ ໂດຍທ່ານ ປອ ພຸດ ອິນທະວົງ ຮັກສາການ ຫົວໜ້າພະແນກກະສິກໍາ ແລະ ປ່າໄມ້ແຂວງ ຕາມມະຕິຂອງສະພາປະຊາຊົນແຂວງ ສະບັບເລກທີ 21/ສພຂ-ຊບ, ລົງວັນທີ 18 ກຸມພາ 2022.

ພາຍຫຼັງ ຮັບຟັງການລາຍງານຈາກພະແນກການດັ່ງກ່າວສໍາເລັດແລ້ວ ທ່ານ ຄໍາພູທອນ ວົງພະຈັນ ກໍາມະການພັກແຂວງ, ຮອງປະທານສະພາປະຊາຊົນແຂວງ ຕາງໜ້າໃຫ້ແກ່ຄະນະປະຈໍາສະພາປະຊາຊົນແຂວງ ປະກອບຄໍາເຫັນຕໍ່ບົດລາຍງານການຈັດຕັ້ງແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການ ປະຈໍາ 6 ເດືອນທ້າຍປີ 2022 ແລະ ທ່ານ ປະທານກອງປະຊຸມ ໄດ້ມີຄໍາຖາມເຈາະຈີ້ມ ແລະ ໃຫ້ທິດຊີ້ນໍາ ໃນການປະກອບຄໍາເຫັນ ແລ້ວບັນດາທ່ານ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 5 ເມືອງ ໄດ້ສຸມສະຕິປັນຍາຄວາມຮູ້ຄວາມສາມາດ ແລະ ຜັດປ່ຽນກັນ ປະກອບຄໍາເຫັນຕໍ່ບົດລາຍງານຕ່າງໆ ທີ່ກ່າວມາຂ້າງເທິງນີ້ ເຊິ່ງມີຫຼາຍບັນຫາ ທີ່ສະທ້ອນຕໍ່ສັງຄົມພາຍແຂວງໄຊສົມບູນ.

ການປະກອບຄໍາເຫັນຂອງ ບັນດາທ່ານ ສະມາຊິກສະພາແຫ່ງຊາດ ແລະ ສະພາປະຊາຊົນແຂວງໄຊສົມບູນນັ້ນ ແມ່ນເປັນຄໍາສະເໜີທີ່ຢາກໃຫ້ ສະພາປະຊາຊົນແຂວງໄຊສົມບູນ ແລະ ບັນດາພະແນກການທີ່ກ່ຽວຂ້ອງ ໄດ້ແກ້ໄຂຜົນກະທົບກໍຄື: ການຈັດຊັນແບ່ງປັນງົບປະມານໃຫ້ແກ່ຂັ້ນແຂວງໂດຍສະເພາະ ແມ່ນຂັ້ນເມືອງ ທີ່່ຍັງຫຍຸ້ງຍາກຂາດເຂີນບໍ່ພຽງພໍນໍາໃຊ້ເຄື່ອນໄຫວວຽກງານທາງການ; ໂຄງການລົງທຶນຂອງລັດ; ການຂຸດຄົ້ນບໍ່ແຮ່ ແມ່ນມີຜົນກະທົບຕໍ່ສັງຄົມ, ມີຄວາມເດືອດຮ້ອນໄປຮອດ ພໍ່ແມ່ປະຊາຊົນບັນດາເຜົ່າ; ປະຊາຊົນຈັບຈອງທີ່ດິນຊະຊາຍ; ການປູກຝັງ-ລ້ຽງສັດ; ການນໍາໃຊ້ເສັ້ນທາງພາຍໃນແຂວງໄຊສົມບູນ; ການຍຸບຫ້ອງການບາງຈໍານວນໃຫ້ຂຶ້ນກັບຫ້ອງການເຕັກໂນໂລຊີ ແລະ ການສື່ສານ; ການສຶກສາໃຫ້ເນັ້ນໜັກແກ່ຄູສອນມີຈັນຍາບັນໃນການສິດສອນ; ຊຸກຍູ້ສົງເສີມໃຫ້ຄອບຄົວຜູ້ທຸກຍາກຫຼຸດລົງຈາກຄວາມທຸກຍາກ; ປະຊາຊົນຜູ້ຊົມໃຊ້ບໍລິການທາງດ້ານສຸຂະພາບ; ການບໍລິການ-ການທ່ອງທ່ຽວແຂວງ ແລະ ບັນດາທ່ານ ພາກສ່ວນທີ່ກ່ຽວຂ້ອງໄດ້ ຕອບຄໍາຊັກຖາມ, ຊີ້ແຈງ-ອະທິບາຍ, ໃຫ້ຄວາມກະຈາງແຈ້ງ ເພື່ອຄວາມໂປ່ງໃສ ໃຫ້ແກ່ກອງປະຊຸມໃນຄັ້ງນີ້.

(ນາງ ອໍາໄພພອນ ແກ້ວວິໄລ)