ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


ວັນທີ 6 ພຶດສະພາ 2022 ຜ່ານມາ, ຢູ່ທີ່ຫ້ອງປະຊຸມຫ້ອງວ່າການແຂວງໄຊຍະບູລີ ໄດ້ຈັດກອງປະຊຸມປະເມີນການຈັດຕັ້ງປະຕິບັດກົດໝາຍ ຈໍານວນ 4 ສະບັບຄື: ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍຊັບສິນຂອງລັດ ແລະ ກົດໝາຍວ່າດ້ວຍແຮ່ທາດ ທີ່ຕິດພັນກັບວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໂດຍການເປັນປະທານຂອງທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ, ປະທານສະພາປະຊາຊົນແຂວງ, ເຂົ້າຮ່ວມມີທ່ານ ສົມຈິດ ຈັນທະວົງ ຮອງເຈົ້າແຂວງໆໄຊຍະບູລີ; ບັນດາທ່ານຄະນະປະຈຳສະພາປະຊາຊົນແຂວງ, ສະມາຊິກສະພາປະຊາຊົນແຂວງ; ຫົວໜ້າພະແນກການ-ອົງການ, ກົມກອງ ແລະ ເຈົ້າເມືອງ 11 ເມືອງເຂົ້າຮ່ວມ.
ກອງປະຊຸມໄດ້ຮັບຟັງລາຍງານການປະເມີນການຈັດຕັ້ງປະຕິບັດກົດໝາຍ 4 ສະບັບ ຈາກພະແນກການກ່ຽວຂ້ອງ; ພ້ອມດຽວກັນນັ້ນ, ບັນດາທ່ານທີ່ເຂົ້າຮ່ວມກອງປະຊຸມ ກໍໄດ້ປະກອບຄໍາຄິດຄຳເຫັນ ໂດຍໄດ້ຍົກໃຫ້ເຫັນດ້ານດີ-ຜົນໄດ້ຮັບ, ດ້ານອ່ອນ-ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເພື່ອເປັນທິດທາງ ແລະ ວິທີຈັດຕັ້ງປະຕິບັດໃນຕໍ່ໜ້າ.
ໃນຕອນທ້າຍກອງປະຊຸມ, ທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ, ປະທານສະພາປະຊາຊົນແຂວງ ໄດ້ມີຄຳເຫັນ ແລະ ໃຫ້ທິດຊີ້ນໍາຕໍ່ກອງປະຊຸມ ເພື່ອຮັບປະກັນການປະເມີນການຈັດຕັ້ງປະຕິບັດກົດໝາຍ 4 ສະບັບໃຫ້ມີປະສິດທິພາບ ສະເໜີໃຫ້ບັນດາທ່ານຜູ້ແທນກອງປະຊຸມ ເວົ້າລວມ, ເວົ້າສະພາະ ບັນດາພະແນກການ ແລະ ພາກສ່ວນ ທີ່ກ່ຽວຂ້ອງ ນໍາເອົາເນື້ອໃນຈິດໃຈກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍຢ່າງເລິກເຊີ່ງ ແລະ ໃຫ້ໄດ້ຮັບຜົນດີ; ໃຫ້ອົງການປົກຄອງແຂວງ ສັງລວມ ບັນດາເນື້ອໃນທີ່ສໍາຄັນ ລາຍງານລັດຖະບານ (ຜ່ານຫ້ອງວ່າການສໍານັກງານນາຍົກລັດຖະມົນຕີ) ເພື່ອກະກຽມລາຍງານຕໍ່ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ຊີ້ນໍາໃຫ້ບັນດາພະແນກການ ລາຍງານຕໍ່ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II; ພ້ອມທັງສືບຕໍ່ສັງລວມ ແລະ ລາຍງານໃຫ້ສາຍຕັ້ງ ເພື່ອຮັບຊາບ ແລະ ມີທິດຊີ້ນໍາ; ໃຫ້ບັນດາພະແນກການ ສຶບຕໍ່ກວດກາ ແລະ ປະເມີນນິຕິກໍາຕ່າງໆ ທີ່ພົວພັນເຖິງ ວະລາແຫ່ງຊາດ ຫຼື ວຽກງານອື່ນໆ ທີ່ຕິດພັນກັບບັນຫາສໍາຄັນຂອງທ້ອງຖິ່ນ ລວມທັງ ນິຕິກໍາໃຕ້ກົດໝາຍ ໃຫ້ເປັນປົກກະຕິ, ຜ່ານການຈັດຕັ້ງປະເມີນ ມີຂໍ້ສະດວກ-ຫຍຸ້ງຍາກ ໃຫ້ລາຍງານຕໍ່ ອົງການປົກຄອງແຂວງ, ສາຍຕັ້ງເປັນປົກກະຕິ ແລະ ມີກົນໄກປະສານງານກັບ ສະພາປະຊາຊົນແຂວງ ໃຫ້ປົກກະຕິ; ສຶບຕໍ່ເອົາໃຈໃສ່ວຽກງານເຊື່ອມຊືມ ໃນການເຜີຍແຜ່ກົດໝາຍ ແລະ ນິຕິກໍາໃຕ້ກົດໝາຍ; ພ້ອມທັງ ມີກົນໄກປະສານງານ ລະຫວ່າງ ສູນກາງ ກັບ ທ້ອງຖິ່ນ, ແຂວງ ກັບ ເມືອງ ໃຫ້ດີຂື້ນ; ໃຫ້ຄະນະເລຂາທິການສະພາປະຊາຊົນແຂວງ ສົມທົບກັບອົງການປົກຄອງແຂວງ ສະຫຼຸບສັງລວມ ລາຍງານຜົນກອງປະຊຸມໃຫ້ຄະນະປະຈໍາສະພາແຫ່ງຊາດ ໃນເວລາອັນຄວນ; ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ກະກຽມເນື້ອໃນ ເພື່ອນໍາເຂົ້າແລກປ່ຽນໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX.
(ພາບ, ຂ່າວ: ນີ່ຕູ່ ປະສິດທິພົງ)