ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

​ໃນ​ວັນ​ທີ 3 ມິຖຸນາ 2022 ຢູ່​ທີ່​ຫ້ອງ​ປະຊຸມ​ສະພາ​ປະຊາຊົນ ​ໄດ້​ເປີດ​ກອງ​ປະຊຸມເປີດ​ບັ້ນ​ແຂ່ງ​ຂັນ-ຍ້ອງຍໍຮັກ​ຊາດ ​ແລະ ພັດທະນາ ປະ​ຈໍາປີ 2022 ໂດຍ​ການ​​ເປັນ​ປະທານ​​ຂອງ​ທ່ານ ວຽງ​ໄຊ ສີວິ​ໄລ ຄະນະ​ປະ​ຈໍາ​-ຮອງ​ປະທານ​ສະພາ​ປະຊາຊົນ​ແຂວງ, ​ມີ​ຄະນະ​ປະ​ຈໍາ​ສະພາ​ປະຊາຊົນ​ແຂວງ, ບັນດາ​​ຄະນະ​ກໍາມະການ, ຄະນະ​ເລຂາທິການ, ພະ​ແນ​ກພາຍ​ໃນ​ແຂວງ, ຫົວໜ້າ-ຮອງ​ຫົວໜ້າຂະ​ແໜງ ​ແລະ ພະນັກງານ​ສະພາ​ປະຊາຊົນ​ແຂວງ​ເຂົ້າ​ຮ່ວມ.

ເພື່ອເປັນການຊຸກຍູ້ ແລະ ສ້າງໃຫ້ພະນັກງານ-ລັດຖະກອນຂອງ​ສະພາ​ປະຊາຊົນ​ແຂວງ ເປັນເຈົ້າຕົນເອງ, ສ້າງຄວາມເຂັ້ມແຂງໝັກແໜ້ນດ້ວຍຕົນເອງ, ມີສະຕິເຄົາລົບຕໍ່ການຈັດຕັ້ງ ແລະ ມີຄວາມຮັບຜິດຊອບສູງຕໍ່ໜ້າທີວຽກງານ, ມີຄວາມຕື່ນຕົວໃນການປະຕິບັດໜ້າທີ່, ຍົກສູງໃນການສ້າງສາພັດທະນາຕົນເອງໃຫ້ກາຍເປັນຄົນທີມີຄວາມຮູ້, ຄວາມສາມາດ, ມີຄຸນສົມບັດສິນທຳປະຕິວັດ ແລະ ເປັນແບບຢ່າງທີ່ດີຕາມລະບຽບລັດຖະກອນວາງອອກ ​ແລະ ​ເປັນ​ການສົ່ງເສີມການປະຕິບັດນະໂຍບາຍຍ້ອງຍໍຜົນງານຕ່າງໆ ໃຫ້ແກ່ການຈັດຕັ້ງ ແລະ ບຸກຄົນດີເດັ່ນ ຕິດພັນກັບການສ້າງຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາໃຫ້ຖືກຕ້ອງສອດຄ່ອງກັບລະບຽບກົດໝາຍ, ແທດເໝາະກັບຜົນງານຕົວຈິງ ຢ່າງເປັນຂະບວນຟົດຟື້ນ ແລະ ຕໍ່ເນື່ອງ.​ ກອງ​ປະຊຸມ ​ໄດ້​ຜ່ານ​​ແຜນ​ແຂ່ງຂັນ-​ຍ້ອງຍໍ​ຮັກ​ຊາດ ​ແລະ ພັດທະນາ ຂອງ​ສະພາ​ປະຊາຊົນ​ແຂວງ ປະ​ຈໍາ​ປີ 2022 ເພື່ອບັນລຸຕາມແຜນການແຂ່ງຂັນຍ້ອງຍໍ ຂອງສະພາປະຊາຊົນແຂວງປະຈຳປີ 2022​ ໄດ້ວາງ 4 ຄາດໝາຍຄື:ສູ້ຊົນຈັດຕັ້ງປະຕິບັດບັນດາວຽກງານທັງໝົດໃນສະພາປະຊາຊົນແຂວງ ໃຫ້ສໍາເລັດ 85% ຂຶ້ນໄປ, ຮັບປະກັນປະຕິບັດຕາມແຜນວຽກ ແລະ ຕາມກຳນົດເວລາ, ຮັບປະກັນຜົນສຳເລັດວຽກງານ ທາງດ້ານປະລິມານ ແລະ ຄຸນນະພາບ, ຮັບປະກັນວຽກງານໃຫ້ມີຄວາມຖືກຕ້ອງຕາມພາລະບົດບາດ, ສິດ ​ແລະ ໜ້າທີ່​ຂອງ​ຕົນ​ທີ່​ຮັບຜິດຊອບ ​ແລະ ​ໃນ​ກອງ​ປະຊຸມ​ຍັງ​ໄດ້​ຈັບ​ມື​ເປີດບັ້ນ​ແຂ່ງ​ຂັນ-ຍ້ອງຍໍຮັກ​ຊາດ ​ແລະ ພັດທະນາ ປະ​ຈໍາປີ 2022 ຂ​ອງ​ສະພາ​ປະຊາຊົນ​ແຂວງ​ຂຶ້ນ​ຍ່າງ​ເປັນ​ທາງ​ການ. ​ໃນ​​ໂອກາດ​ດັ່ງກ່າວ​ຍັງ​ໄດ້​ຮັບ​ຟັງ​ການ​ແນະ​ນໍາ​ການຈັດ​ຕັ້ງ​ປະຕິບັດບັ້ນ​ແຂ່ງ​ຂັນ-ຍ້ອງຍໍຮັກ​ຊາດ ​ແລະ ພັດທະນາ ຈາກ​ຕ່າງໜ້າພະ​ແນ​ກພາຍ​ໃນ​ແຂວງ ​ເພື່ອ​ເຮັດ​ໃຫ້​​ແຜນການ​ທີ່​ໄດ້​ວາ​ງໄວ້​ ​ໃຫ້​ໄດ້ຮັບ​ຜົນ​ສໍາ​ເລັດ​ຕາມ​ລະດັບ​ຄາດໝາຍທີ່​ວາງ​ໄວ້.

ໃນ​ຕອນ​ທ້າຍ ທ່ານ ວຽງ​ໄຊ ສີວິ​ໄລ ​ໄດ້​ມີ​ຄໍາ​ເຫັນ​​ໂອ້ລົມ​ຕໍ່​ພິທີ ​ເຊິ່ງທ່ານໄດ້​ໃຫ້​ພະນັກງານ​ສະພາ​ປະຊາຊົນ​ແຂວງ ຈົ່ງ​ສືບ​ຕໍ່​ພັດທະນາ​ຕົນ​ເອງ​ໃນ​ການ​ການ​ຊອກ​ຮູ້​ຮໍ່​າຮຽນວຽກງານ​ຈາກ​ດ້ານ​ຕ່າງໆ ​ເພື່ອ​ນໍາ​ໃຊ້​ເຂົ້າ​ວຽກງານ​ໃຫ້​ດີ​ຂຶ້ນ​ກວ່າ​ເກົ່າ, ກໍ່ສ້າງ​ຊ່ວຍ​ເຫຼືອ​ເຊິ່ງກັນ ​ແລະ ກັນ,  ​ເອົາ​ໃຈ​ໃສ່​ປະຕິບັດ​ແຜນການແຂ່ງຂັນຍ້ອງຍໍ ຂອງສະພາປະຊາຊົນແຂວງປະຈຳປີ 2022​ ໄດ້ວາງ 4 ຄາດໝາຍ ​ໃຫ້​ມີ​ຜົນ​ສໍາ​ເລັດ​ສູງ.

ສະພາປະຊາຊົນແຂວງຊຽງຂວາງ

ຂ່າວ​​​ໂດຍ: ນາງ ສຸກສະຫວັນ ອິນທະແສງ