ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 19 ກໍລະກົດ 2022 ຢູ່ທີຫ້ອງປະຊຸມສະພາປະຊາຊົນແຂວງ ສະພາປະຊາຊົນແຂວງໄດ້ເປີດກອງປະຊຸມຮ່ວມກັບອົງການປົກຄອງແຂວງ ເພື່ອກະກຽມເນື້ອໃນດໍາ​ເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ໂດຍການເປັນປະທານຮ່ວມຂອງ ທ່ານ ສີວິໄລ ແສງຈະເລີນ ຮອງເຈົ້າແຂວງແຂວງຊຽງຂວາງ ແລະ ທ່ານ ວຽງໄຊ ສີວິໄລ ຮອງປະທານສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງຂອງແຂວງ, ຄະນະເລຂາທິການສະພາປະຊາຊົນແຂວງ, ຫົວໜ້າ-ຮອງຫົວໜ້າຂະແໜງ ແລະ ພະນັກງານສະພາປະຊາຊົນແຂວງເຂົ້າຮ່ວມ.

ເພື່ອກະກຽມຄວາມພ້ອມທາງດ້ານເນື້ອໃນໃຫ້ແກ່ການດໍາເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ໃຫ້ຮັບປະກັນທາງດ້ານເນື້ອໃນ ແລະ ມີຄຸນນະພາບ ເຊິ່ງຄາດຄະເນວ່າ ຈະເປີດກອງປະຊຸມດັ່ງກ່າວໃນຕັ້ນເດືອນ ສິງຫາ 2022 ນີ້. ໃນທີ່ປະຊຸມທ່ານ ວຽງໄຊ ສີວິໄລ ໄດ້ຜ່ານບັນດາຫົວຂໍ້ທີ່ຈະນໍາເຂົ້າພິຈາລະນາ ແລະ ຮັບຮອງຢູ່ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ມີຄື: ບົດລາຍງານໂດຍສັງເຂບຂອງທ່ານເຈົ້າແຂວງກ່ຽວກັບສະພາບພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ບົດລາຍງານຂອງພະແນກແຜນການ ແລະ ການລົງທຶນແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022, ບົດລາຍງານຂອງພະແນກການເງິນແຂວງກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022, ການຈັດຕັ້ງປະຕິບັດບັນດາຄາດໝາຍຂອງເປົ້າໝາຍການພັດທະນາແບບຢືນຍົງ (SDGs) ຂອງພະແນກສຶກສາ ແລະ ພະແນກສາທາລະນະສຸກແຂວງ, ການຈັດຕັ້ງປະຕິບັດແຜນການທ່ອງທ່ຽວຕິດພັນກັບການປ້ອງກັນ ແລະ ການຮັບມືກັບການແຜ່ລະບາດຂອງພະຍາດໂຄວິດ19, ບົດລາຍງານຂອງພະແນກການທີ່ກ່ຽວຂ້ອງກ່ຽວກັບຄວາມຄືບໜ້າການຈັດຕັ້ງປະຕິບັດ 2 ວາລະແຫ່ງຊາດ, ບົດລາຍງານສະພາບການປັບປຸງກົງຈັກການຈັດຕັ້ງຂອງອົງການປົກຄອງແຂວງ, ພິຈາລະນາ ແລະ ຮັບຮອງເອົານິຕິກຳລຸ່ມກົດໝາຍຄື: ຮ່າງຂໍ້ຕົກລົງວ່າດ້ວຍການສົງເສີມ, ຄຸ້ມຄອງການລົງທືນພາຍໃນ ແລະ ຕ່າງປະເທດ, ວຽກງານການກະກຽມຄວາມພ້ອມງານມະຫາກໍາກິລາແຫ່ງຊາດ, ບົດໂອ້ລົມຂອງທ່ານເຈົ້າແຂວງກ່ຽວ ກັບການຈັດຕັ້ງ ປະຕິບັດແຜນພັດທະນາເສດຖະກິດ-ສັງຄົມ, ບົດລາຍງານການເຄື່ອນໄຫວວຽກງານຂອງສະພາປະຊາຊົນແຂວງ. ໃນທີ່ປະຊຸມບັນດາຜູ້ແທນກອງປະຊຸມໄດ້ສຸມສະຕິປັນຍາປະກອບຄໍາ, ຄໍາເຫັນຢ່າງກົງໄປກົງມາ ເພື່ອເຮັດໃຫ້ ກອງປະຊຸມດັ່ງກ່າວມີຄວາມພ້ອມດ້ານຕ່າງໆ ທີ່ສາມາດເປີດ ໄດ້ໃນຕົ້ນເດືອນສິງຫາ 2022 ຕາມແຜນການ ທີ່ວາງໄວ້.

ໃນຕອນທ້າຍຂອງກອງປະຊຸມ ທ່ານວຽງໄຊ ສີວິໄລ ໄດ້ມີຄໍາເຫັນໂອລົມ ຕໍ່ກັບສະພາປະຊາຊົນແຂວງ ແລະ ບັນດາພະແນກການ ຈົ່ງພ້ອມການກະກຽມເນື້ອໃນ ທີ່ຂົງເຂດຕົນຮັບຜິດຊອບ ໃຫ້ສໍາເລັດ ​ເອົາ​ໃຈ​ໃສ່ຄວາມຮັບຜິດຊອບ​ໜ້າ​ວຽກ​ຂອງ​ຕົນ​ໃຫ້​ເຮັດ​ລ້ອນໜ້າ​ທີ່ຕາ​ມາ​ການມອບ​ໝາຍ​.

ສະພາປະຊາຊົນແຂວງຊຽງຂວາງ

ຂ່າວໂດຍ: ນາງ ສຸກສະຫວັນ ອິນທະແສງ