ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ເນື່ອງໃນໂອກາດການສະເຫຼີມສະຫຼອງວັນສ້າງຕັ້ງແຂວງອຸດົມໄຊ ຄົບຮອບ 60 ປີ ແລະ ວັນສ້າງຕັ້ງກຳລັງປ້ອງກັນຄວາມສະຫງົບແຂວງອຸດົມໄຊ ຄົບຮອບ 60 ປີ, ໃນຕອນເຊົ້າຂອງພຸດວັັນທີ 13 ກໍລະກົດ 2022 ນີ້, ທ່ານ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ຮອງປະທານ ສພຂ, ບັນດາທ່ານຄະນະປະຈໍາ ສພຂ, ສະມາຊິກ ສພຂ, ຄະນະເລຂາທິການ ແລະ ພະນັກງານ ສພຂ ໄດ້ເຂົ້າອວຍພອນວັນສ້າງຕັ້ງກຳລັງປ້ອງກັນຄວາມສະຫງົບ ແຂວງອຸດົມໄຊ ຄົບຮອບ 60 ປີ ຢູ່ທີ່ກອງບັນຊາການປ້ອງກັນຄວາມສະຫງົບແຂວງ, ໂດຍການຮັບຕ້ອນຂອງທ່ານ ພັອ ສີວອນ ໄຊຍະວົງ ກຳມະການປະຈຳພັກແຂວງ, ຫົວໜ້າກອງບັນຊາການປ້ອງກັນຄວາມສະຫງົບ ແຂວງອຸດົມໄຊ, ມີບັນດາທ່ານຄະນະພັກ, ຄະນະນໍາຂອງກອງບັນຊາການປ້ອງກັນຄວາມສະຫງົບແຂວງເຂົ້າຮ່ວມ.

ທ່ານ ນ. ວັນສີ ພວງມະໄລ ເລຂາທິການສະພາປະຊາຊົນແຂວງ ໄດ້ຕາງໜ້າຄະນະປະຈໍາ ສພຂ, ຂຶ້ນກ່າວກອນອວຍພອນວັນສ້າງຕັ້ງກຳລັງປ້ອງກັນຄວາມສະຫງົບແຂວງອຸດົມໄຊ ຄົບຮອບ 60 ປີ ແລະ ທ່ານ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ຮອງປະທານ ສພຂ ໄດ້ມີຄໍາເຫັນເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ ກໍາລັງປ້ອງກັນຄວາມສະຫງົບແຂວງອຸດົມໄຊ ທີ່ໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວຽກງານຂອງຕົນໄດ້ດີຕະລອດມາ, ເຮັດໃຫ້ແຂວງອຸດົມໄຊ ມີຄວາມສະຫງົບໂດຍພື້ນຖານ.

ຫຼັງຈາກນັ້ນທ່ານ ພັອ ສີວອນ ໄຊຍະວົງ ກຳມະການປະຈຳພັກແຂວງ, ຫົວໜ້າກອງບັນຊາການປ້ອງກັນຄວາມສະຫງົບແຂວງອຸດົມໄຊ ໄດ້ສະແດງຄວາມຂອບໃຈທ່ານ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ຮອງປະທານ ສພຂ, ບັນດາທ່ານຄະນະປະຈໍາ ສພຂ, ສະມາຊິກ ສພຂ, ຄະນະເລຂາທິການ ແລະ ພະນັກງານ ສພຂ ທີ່ໃຫ້ຄວາມສໍາຄັນຕໍ່ວັນສ້າງຕັ້ງກໍາລັງດັ່ງກ່າວ, ໄດ້ໃຫ້ການສະໜັບສະໜູນ ແລະ ຮ່ວມມືທາງດ້ານວຽກງານຕ່າງໆມາດີໂດຍຕະຫຼອດ ແລະ ໄດ້ມີຄໍາເຫັນໃຫ້ຮູ້ວ່າ: ກຳລັງປ້ອງກັນຄວາມສະຫງົບແຂວງອຸດົມໄຊ ໄດ້ຮັບການສ້າງຕັ້ງຂຶ້ນໃນວັນທີ 4 ເມສາ 1962 ໂດຍເອີ້ນວ່າ: ກຳລັງປ້ອງກັນສຳນັກງານ ໃນໄລຍະນັ້ນ ກຳລັງປ້ອງກັນໄດ້ມີການເຄື່ອນໄຫວຕາມພາລະບົດບາດ ແລະ ໄດ້ຮັບການປັບປຸງ, ມີການເຕີບໃຫຍ່ຂະຫຍາຍຕົວຕາມສະພາບການພັດທະນາເສດຖະກິດ-ສັງຄົມ ແລະ ມີຄວາມທັນສະໄໝ ປະກອບສ່ວນເຂົ້າໃນການປະຕິບັດວຽກງານມີຄວາມສະດວກ, ວອງໄວຂຶ້ນກວ່າເກົ່າ. ທ່ານໄດ້ມີຄໍາເຫັນຕື່ມວ່າ: ຜ່ານການຈັດຕັ້ງປະຕິບັດວຽກງານທີ່ຜ່ານມາ, ຖ້າຫາກວ່າບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ເຫັນວ່າມີຫາງສຽງກ່ຽວກັບບັນຫາໃດ, ວຽກງານໃດໜຶ່ງ ກໍ່ໃຫ້ສົ່ງຂ່າວມາຫາ ເພື່ອຈະແກ້ໄຂວຽກງານດັ່ງກ່າວໃຫ້ດີຂຶ້ນກວ່າເກົ່າ ແລະ ສືບຕໍ່ໃນການຮັກສາມູນເຊື້ອອັນພິລະອາດຫານ, ມູນເຊື້ອດີງາມຂອງກໍາລັງປ້ອງກັນຄວາມສະຫງົບແຂວງອຸດົມໄຊ, ສືບຕໍ່ປົກປັກຮັກສາ ແລະ ສ້າງສາພັດທະນາແຂວງອຸດົມໄຊ ໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້.ພາບ/ຂ່າວ: ແສງພອນ ອິນນະລົງ.