ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນບ່າຍຂອງວັນທີ 27 ພຶດສະພາ 2022 ນີ້ ສະພາປະຊາຊົນແຂວງຫລວງນໍ້າທາ ໄດ້ເປີດກອງປະຊຸມປະຈຳເດືອນພຶດສະພາ ຂຶ້ນທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ເຂົ້າຮ່ວມມີຄະນະຮອງປະທານສະພາປະຊາຊົນແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຄະນະເລຂາທິການ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການພາຍໃນສະພາປະຊາຊົນແຂວງ ເຂົ້າຮ່ວມທັງໝົດ 38 ຄົນ, ຍິງ 16 ຄົນ.

 

ກອງປະຊຸມໄດ້ຮັບຟັງຮ່າງບົດລາຍງານການເຄື່ອນໄຫວວຽກງານ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022 ຂອງຄະນະປະຈຳສະພາປະຊາຊົນແຂວງ, ຊື່ງໃນໄລຍະ 6 ເດືອນຕົ້ນປີຜ່ານມາ ຄະນະປະຈຳສະພາປະຊາຊົນແຂວງ ໄດ້ເອົາໃຈໃສ່ຊີ້ນຳ-ນຳພາ ສຶກສາອົບຮົມການເມືອງແນວຄິດໃຫ້ສະມາຊິກພັກ, ບັນດາຄະນະກຳມະການ, ຄະນະເລຂາທິການ ແລະ ພະນັກງານ-ລັດຖະກອນ ໃຫ້ມີຄວາມຮັບຜິດຊອບສູງໃນການປະຕິບັດຄຳສັ່ງ, ລະບຽບການ ແລະ ມາດຕະການຕ່າງໆຂອງພັກ, ລັດ ແລະ ໄດ້ຈັດຕັ້ງປະຕິບັດຕາມພາລະບົດບາດ ສິດ ແລະ ໜ້າທີ່ ເປັນຕົ້ນ ດ້ານນິຕິກຳ, ດ້ານການຕົກລົງບັນຫາສຳຄັນຂອງທ້ອງຖິ່ນ, ດ້ານການຕິດຕາມກວດກາ ແລະ ໄດ້ລົງເຜີຍແຜ່ຜົນສຳເລັດກອງປະຊຸມສະໄຫມສາມັນເທື່ອທີ 2 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນແຂວງຊຸດທີ II ໄດ້ທັງໝົດ 60 ຈຸດ, ມີຜູ້ເຂົ້າຮ່ວມທັງໝົດ 4,204 ຄົນ, ຍິງ 2,020 ຄົນ ພ້ອມທັງນຳເອົາເຄື່ອງນຸ່ງຫົ່ມ, ອຸປະກອນການຮຽນ-ການສອນ ແລະ ເຄື່ອງອຸປະໂພກອື່ນໆ ມອບໃຫ້ເຂດຫ່າງໄກສອກຫລີກ ລວມມູນຄ່າທັງໝົດ 135,850,000 ກີບ, ສຳລັບທິດທາງແຜນການເຄື່ອນໄຫວ 6 ເດືອນທ້າຍປີ 2022 ແມ່ນຈະສືບຕໍ່ຊີ້ນຳ-ນຳພາ ແລະ ສຶກສາອົມຮົມການເມືອງແນວຄິດໃຫ້ພະນັກງານ-ລັດຖະກອນພາຍໃນສະພາປະຊາຊົນແຂວງ ມີແນວຄິດອຸ່ນອ່ຽນທຸ່ນທ່ຽງ, ມີຄຸນສົມບັດສິນທຳປະຕິວັດ, ເຊື່ອໝັ້ນຕໍ່ການນຳພາຂອງພັກ, ເຄົາລົບລັດຖະທຳມະນູນ, ກົດໝາຍຂອງລັດ, ເອົາໃຈໃສ່ປະຕິບັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ, ຫຼັງຈາກນັ້ນຍັງໄດ້ຮັບຟັງແຈ້ງການເລກທີ 376/ພຕທ, ວັນທີ 26 ພຶດສະພາ 2022 ວ່າດ້ວຍເລື່ອງການກວດກາໜັງສືຜ່ານແດນທາງລັດຖະການ ແລະ ໜັງສືຜ່ານແດນທົ່ວໄປຂອງຕົນເອງ, ພ້ອມດຽວກັນນັ້ນຜູ້ເຂົ້າຮ່ວມກອງປະຊຸມຍັງໄດ້ແລກປ່ຽນປະກອບຄຳຄິດເຫັນຕໍ່ກັບຮ່າງບົດສະຫຼຸບລາຍງານການເຄື່ອນໄຫວວຽກງານ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022 ເພື່ອເຮັດໃຫ້ມີເນື້ອໃນຄົບຖ້ວນສົມບູນ ແລະ ສາມາດນຳໄປຈັດຕັ້ງປະຕິບັດຕໍ່ໜ້າໃຫ້ມີຄຸນນະພາບ.

ພ້ອມນັ້ນຍັງໄດ້ແລກປ່ຽນປະກອບຄຳຄິດເຫັນ, ຄຳສະເໜີ, ຂໍ້ສະດວກ,​ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານພາຍໃນສະພາປະຊາຊົນແຂວງຢ່າງເປັນຂະບວນຟົດຟື້ນ ເພື່ອເຮັດໃຫ້ວຽກງານການເຄື່ອນໄຫວພາຍໃນສະພາປະຊາຊົນແຂວງມີຄວາມສະດວກ, ຖຶກຕ້ອງ, ວ່ອງໄວ ແລະ ມີຄຸນນະພາບຂຶ້ນກວ່າເກົ່າ.

ນາງ ວັນນີ ແຝງບົວວັນ