ຕອນເຊົ້າວັນທີ 22 ມີນາ 2023 ຢູ່ທີ່ຫ້ອງປະຊຸມຂອງສະພາປະຊາຊົນແຂວງ ໄດ້ຈັດພິທີເຜີຍແຜ່ກົດໝາຍວ່າດ້ວຍ ການປະກັນສັງຄົມ ສະບັບປັບປຸງປີ 2019 ຂື້ນ ພາຍໃຕ້ການເປັນປະທານຂອງທ່ານ ວຽງໄຊ ສັກລຳດວນ ຮອງເລຂາທິການສະພາປະຊາຊົນແຂວງ, ໃຫ້ກຽດເຜີຍແຜ່ໂດຍ ທ່ານ ນາງ ລັດຕະນະ ພົມມະຈັນ ຫົວໜ້າຫ້ອງການປະກັນສັງຄົມແຂວງ ມີຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການເຂົ້າຮ່ວມຢ່າງພ້ອມພຽງ.

ກົດໝາຍວ່າດ້ວຍ ການປະກັນສັງຄົມ ສະບັບປັບປຸງປີ 2019 ສະບັບນີ້ລວມທັງໝົດມີ 12 ພາກ, 123 ມາດຕາ ພ້ອມດຽວກັນ ຍັງໄດ້ນຳເອົາຄວາມຮູ້ທີ່ເປັນພື້ນຖານກ່ຽວກັບວຽກງານການປະກັນສັງຄົມພາຍໃນແຂວງຕ່າງໆ ມາເຜີຍແຜ່ໃຫ້ພະນັກງານລັດຖະກອນພາຍໃນສະພາປະຊາຊົນແຂວງ ໄດ້ຮັບຮູ້ເຊື່ອມຊຶມ ແລະ ເຂົ້າໃຈຢ່າງເລິກເຊິ່ງຕໍ່ກັບວຽກງານການປະກັນສັງຄົມ ນອກນັ້ນຍັງ ໄດ້ມີການສົນທະນາແລກປ່ຽນ, ປະກອບຄຳຄິດເຫັນຕໍ່ກັບວຽກງານດັ່ງກ່າວທີ່ຍັງພົບເຫັນຄວາມຫຍຸ້ງຍາກ, ບໍ່ທັນເຂົ້າໃຈ ໃນໄລຍະຜ່ານມາ ຢ່າງເປັນຂະບວນຟົດຟື້ນ, ທັງນີ້ ກໍເພື່ອເຮັດໃຫ້ວຽກງານການປະກັນສັງຄົມ ໄດ້ຮັບການປັບປຸງ ແລະ ຖຶກຕ້ອງສອດຄ່ອງຕາມຄວາມເປັນຈິງຂຶ້ນກວ່າເກົ່າ.