ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າຂອງວັນທີ 07 ເມສາ 2022 ນີ້ ສະພາປະຊາຊົນແຂວງຫລວງນ້ຳທາ ໄດ້ປາຖະກະຖາວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນຄົບຮອບ 61 ປີ( 05 ເມສາ 1961 –05 ເມສາ 2022 ) ແລະ ເຊື່ອມຊືມມະຕິກອງປະຊຸມເປີດກວ້າງຄົບຄະນະບໍລິຫານງານສະຫະພັນກຳມະບານແຂວງຄັ້ງທີ 3 ສະໄໝທີ VIII ໂດຍການເປັນປະທານຂອງ ທ່ານ ຈັນທະສຸລິນ ໝັ້ນປະດິດ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 3 ແຂວງຫລວງນ້ຳທາປະທານຄະນະກຳມະການຍຸຕິທຳແລະປກຊ-ປກສ, ໃຫ້ກຽດເຂົ້າຮ່ວມໂດຍ ທ່ານ ມີໄຊ ມີວິໄລ ກຳມະການຄະນະປະຈຳສະພາປະຊາຊົນແຂວງ ເລຂາທິການສະພາປະຊາຊົນແຂວງ, ມີບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຄະນະເລຂາທິການ, ຫົວໜ້າ, ຮອງຫົວໜ້າຂະແໜງພ້ອມດ້ວຍພະນັກງານວິຊາການເຂົ້າຮ່ວມທັງໝົດ 30 ທ່ານ, ຍິງ12 ທ່ານ.

ໃນພິທີທ່ານຈັນທະສຸລິນໝັ້ນປະດິດສະມາຊິກສະພາແຫ່ງຊາດປະຈຳເຂດເລືອກຕັ້ງທີ 3 ແຂວງຫລວງນ້ຳທາປະທານຄະນະກຳມະການຍຸຕິທຳແລະປກຊ-ປກສໄດ້ເລົ່າຄືນມູນເຊື້ອວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ

ຄົບຮອບ 61 ປີ ເຊິ່ງ ກຳລັງປ້ອງກັນຄວາມສະຫງົບແມ່ນກຳລັງປະກອບອາວຸດປະຕິວັດ ອັນແຫລມຄົມຂອງພັກ ໂດຍແມ່ນພັກປະຊາຊົນ ປະຕິວັດລາວ ເປັນຜູ້ສ້າງຕັ້ງ, ນຳພາເດັດຂາດ, ໂດຍກົງ ແລະ ຮອບດ້ານ, ເປັນກຳລັງທີ່ມາຈາກປະຊາຊົນ, ໂດຍປະຊາຊົນ ແລະ ເພື່ອຮັບໃຊ້ສິດຜົນປະໂຫຍດຂອງປະຊາຊົນລາວບັນດາເຜົ່າ, ກຳລັງປ້ອງກັນຄວາມສະຫງົບປະຊາຊົນ ໄດ້ກຳເນີດ ແລະ ເຕີບໃຫຍ່ຂະຫຍາຍຕົວໃນຂະບວນການຕໍ່ສູ້ປົດປ່ອຍຊາດຕ້ານຈັກກະພັດຜູ້ຮຸກຮານ, ປົກປັກຮັກສາ ແລະ ສ້າງສາພັດທະນາປະເທດຊາດເວລາໃດກໍມີມູນເຊື້ອຕໍ່ສູ້ອັນອົງອາດກ້າຫານ, ມີນ້ຳໃຈເສຍສະຫລະເດັດດ່ຽວ      ໜຽວແໜ້ນບໍ່ຍອມຈຳນົນ, ມີຄວາມຊື່ສັດບໍລິສຸດ ແລະ ມີຄວາມສັດຊື່ບໍລິສຸດ ແລະ ມີຄວາມສາມັກຄີເປັນປຶກແຜ່ນແໜ້ນໜາ.

ພ້ອມນັ້ນຍັງໄດ້ຮັບຟັງມະຕິກອງປະຊຸມເປີດກວ້າງຄົບຄະນະບໍລິຫານງານສະຫະພັນກຳມະບານແຂວງຄັ້ງທີ 3 ສະໄຫມທີ VIII ເຊິ່ງກອງປະຊຸມໄດ້ເປັນເອກະສັນກັນຮັບຮອງເອົາທິດທາງແຜນການ ແລະ ວຽກງານຈຸດສຸມໃນປີ 2022 ຕົ້ນຕໍແມ່ນເລັ່ງໃສ່ຈັດຕັ້ງປະຕິບັດມະຕິກອງປະຊຸມໃຫຍ່ ສະຫະພັນກຳມະບານລາວທົ່ວແຂວງ ຄັ້ງທີ VIII ແລະ ແຜນພັດທະນາກຳມະບານແຂວງ ແຂວງ 5 ປີ ຄັ້ງທີ IV ໂດຍຮັບປະກັນເຮັດໃຫ້ການຈັດຕັ້ງກຳມະບານແຕ່ລະຂັ້ນມີຄວາມສະຫງົບທາງດ້ານການເມືອງ-ແນວຄິດ ໂດຍສະເພາະໃນໄລຍະທີ່ພວກເຮົາພວມປະເຊິີນໜ້າກັບການລະບາດຂອງເຊື້ອພະຍາດໂຄວິດ-19 ທີ່ໜັກໜ່ວງ ແລະ ແກ່ຍາວ, ບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ບັນຫາຢາເສບຕິດ ເປັນເຈົ້າການຈັດຕັ້ງປະຕິບັດທິດທາງແຜນການໃຫ້ປະກົດຜົນເປັນຈິງ, ເອົາໃຈໃສ່ຕິດຕາມ, ກວດກາ, ປັບປຸງ ຂະຫຍາຍການຈັດຕັ້ງ ແລະ ສະມາຊິກກຳມະບານ ເຂົ້າສູ່ຫົວໜ່ວຍແຮງງານ, ຮັບປະກັນໄດ້ທາງດ້ານປະລິມານ ແລະ ຄຸນນະພາບ, ຊຸກຍູ້ການຈັດຕັ້ງກຳມະບານແຕ່ລະຂັ້ນ ປະເມີນຜົນການຈັດຕັງປະຕິບັດຂໍ້ແຂ່ງຂັນ 5 ເປັນເຈົ້າ ໃຫ້ໄດ້ 85% ຂຶ້ນໄປໃນທົ່ວແຂວງ, ສືບຕໍ່ປະສານສົມທົບ ແລະ ຮ່ວມມືກັບຄະນະກຳມະການສາມຝ່າຍຂັ້ນແຂວງໃຫ້ກົມກຽວກັນ, ສືບຕໍ່ຊຸກຍູ້ສະມາຊິກກອງທຶນມອບພັນທະປະຈຳປີ 2022 ໃຫ້ຄົບຖ້ວນ ແລະ ປະຕິບັດນະໂຍບາຍຕໍ່ສະມາຊິກກອງທຶນຕາມກົດລະບຽບ, ເອົາໃຈໃສ່ເຮັດຫໜ້າທີ່ປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກກຳມະບານ, ເພີ່ມທະວີຄວາມສາມັກຄີພາຍໃນຄະນະບໍລິຫານງານ ເພື່ອອຳນວຍຄວາມສະດວກໃຫ້ແກ່ການເຄື່ອນໄຫວວຽກງານກຳມະບານ

ພາບ ແລະ ຂ່າວ ນາງ ອຳພອນ ສີປະເສີດ