ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນວັນທີ 28 ກໍລະກົດຜ່ານມາ, ຕາມວາລະແມ່ນມື້ທີ 2 ຂອງກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ສະຫວັນນະເຂດ ຊຸດທີ II ໂດຍການເປັນປະທານຂອງທ່ານ ກົງແກ້ວ ມີວໍລະຈັກ ປະທານສະພາປະຊາຊົນແຂວງ, ໂດຍການເຂົ້າຮ່ວມຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ, ມີບັນດາການນຳຂັ້ນເເຂວງ, ບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ພ້ອມດ້ວຍພະແນກການ, ອົງການທີ່ກ່ຽວຂ້ອງ.
ໃນວາລະກອງປະຊຸມມື້ນີ້, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ຮັບຟັງບົດລາຍງານ ກ່ຽວກັບຄວາມຄືບໜ້າໃນການຈັດຕັ້ງປະຕິບັດວາວະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຈາກຫົວໜ້າພະແນກແຜນການ ແລະ ການລົງທຶນແຂວງ; ບົດລາຍງານກ່ຽວກັບຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຈາກຫົວໜ້າກອງບັນຊາການ ປກສ ແຂວງ; ບົດລາຍງານຂອງຄະນະປະຈຳສະພາປະຊາຊົນແຂວງ ຕໍ່ບົດລາຍງານກ່ຽວກັບຄວາມຄືບໜ້າໃນການຈັດຕັ້ງປະຕິບັດວາວະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ຈາກປະທານຄະນະກຳມະການເສດຖະກິດ, ແຜນການ ແລະ ການເງິນ; ບົດລາຍງານກ່ຽວກັບການປະຕິບັດພາລະບົດບາດຕິດຕາມກວດກາທົ່ວໄປທີ່ຕິດພັນກັບການຈັດຕັ້ງປະຕິບັດວາລະແຫ່ງຊາດ ຈາກຫົວໜ້າອົງການໄອຍະການປະຊາຊົນແຂວງ; ຫລັງຈາກນັ້ນ, ປະທານກອງປະຊຸມ ກໍໄດ້ມີຄຳເຫັນເຈາະຈີ້ມ ແລະ ໃຫ້ທິດຊີ້ນຳໃນການປະກອບຄຳເຫັນຕໍ່ບົດລາຍງານດັ່ງກ່າວ ພ້ອມເປີດໂອກາດໃຫ້ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ປະກອບຄຳຄິດຄຳເຫັນໃສ່ບົດລາຍງານໃຫ້ມີຄວາມຖືກຕ້ອງສອດຄ່ອງ ເຮັດໃຫ້ການຈັດຕັ້ງປະຕິບັດວາລະແຫ່ງຊາດໄດ້ຮັບປະສິດທິຜົນ.
ໃນວາລະພາກບ່າຍ, ກອງປະຊຸມ ໄດ້ຮັບຟັງບົດລາຍງານກ່ຽວກັບຂໍ້ສະດວກ, ຂໍ້ຫຍຸ້ງຍາກໃນການຕັດສິນຄະດີອາຍາ, ຄະດີແພ່ງ, ກົນໄກການປະສານສົມທົບໃນການດຳເນີນຄະດີຂອງສານປະຊາຊົນແຂວງ, ສານປະຊາຊົນເຂດ ໂດຍຕິດພັນກັບການປະຕິບັດວາລະແຫ່ງຊາດ ຈາກທ່ານປະທານສານປະຊາຊົນແຂວງ; ບົດລາຍງານກ່ຽວກັບຂໍ້ສະດວກ, ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານຖະບຽນສານ ແລະ ການຈັດຕັງປະຕິບັດຄຳຕັດສິນຂອງສານທີ່ນຳໃຊ້ໄດ້ຢ່າງເດັດຂາດ, ການຂຶ້ນບັນຊີເຕົ້າໂຮມຊັບສິນທີ່ສານຕັດສິນເປັນຂອງລັດ ໃນໄລຍະຜ່ານມາ ຈາກທ່ານຫົວໜ້າພະແນກຍຸຕິທຳແຂວງ; ບົດປະກອບຄຳເຫັນຂອງຄະນະປະຈຳສະພາປະຊາຊົນແຂວງ ຕໍ່ບົດລາຍງານຂອງອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ພະແນກຍຸຕິທຳແຂວງ ຈາກປະທານຄະນະກຳມະການຍຸຕິທຳ ແລະ ປກຊ-ປກສ. ຈາກນັ້ນ, ປະທານກອງປະຊຸມ ກໍໄດ້ມີຄຳເຫັນເຈາະຈີ້ມ ແລະ ໃຫ້ທິດຊີ້ນຳໃນການປະກອບຄຳເຫັນຕໍ່ວຽກງານດັ່ງກ່າວ ພ້ອມນັ້ນ, ບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ກໍໄດ້ສຸມສະຕິປັນຍາ ປະກອບຄຳຄິດຄຳເຫັນ ໃສ່ 3 ບົດລາຍງານດັ່ງກ່າວ ຢ່າງກົງໄປກົງມາ ແລະ ສ້າງສັນ.
(ພາບ ແລະ ຂ່າວ: ກົງທະນູຄຳ ພິພັດເສລີ)